الموضوع: Pyd F3 ولا سبرانزا 1600 Cc

السلام عليكم

يا جماعة أنا ملاحظ إن كل واحد معاه عربية بيشكر فيها علي حساب أي عربية تانية

يعني بمعني أصح مش بيشوف أو مش عاوز يشوف غيرها

وإحنا من النوع اللي بيخاف من الجديد دايما يعني لازم نشوف حد جرب وقرر يغامر لوحده الأول علشان نقلده إن طلعت العربية كويسة

ولو طلعت وحشة يبقي إحنا كده في السليم !!

طبعا أنا متأكد إن ده منطق كل واحد بيفكر يشتري بس بالوضع الحالي كل واحد شايف عربيته فوق الكل يبقي محدش من الناس اللي عاوزة تعرف وضع كل عربية بصراحة حتعرف تأخد قرار سليم

يبقي ضروري اللي بيحث عن مميزات أي سيارة إنه يركز بحثه في المنتديات اللي خارج مصر أولا وممكن كمان يعرف معلومات إقتصادية عن الشركات المصنعة زي معدل نمو مبيعاتها ويبحث عن بعض التقارير التحليلية من جهات أجنبية عنها وتقارير عن السيارة متكاملة من حيث معدل الإصلاحات داخل الضمان علشان يشوف الناس اللي برة عاملين إيه معاها لأن غالبا رأيهم بيكون محايد جدا ومش بيحطوا رأسهم في الرمل بمعني لو إن العربية فيها أي حاجة مش عاجباهم أو عيب حيقولوا عنها بكل صراحة ده كمان لأنهم واثقين في التوكيلات بتاعتهم مش حتهضم حقوقهم نهائيا

وبالنسبة لي شخصيا أنا كنت من المغرمين جدا بالإسبرانزا وكنت لا أتصور العيش بدونها خصوصا إني نازل من لانسر 2008

ولكن ببعض البحث المعمق وصلت إلي أنها ظاهريا ممكن تكون مشجعة الواحد يشتريها ولكن فعليا تقاريها ضعيفة من حيث الجودة والمتانة مقارنة بالكثير من السيارات المماثلة ونسبة عيوب الصناعة كثيرة إلي حد ليس بصغير وليس معني ذلك أنها كل الإنتاج فيه عيوب
فضلا عن محركها صيني 100% يقال أنه تصميم ألماني ويوجد ضعف نوعا ما في التعليق الأمامي لها طبقا لشهادة بعض مالكيها

أما الـ byd فتتمتع بميزة هامة هي الإستنساخ من التيوتا كورولا في الشكل والعفشة وبمحرك ماركة ميتسوبيشي صيني ولكن فرع ميتسوبيشي اليابانية بالصين أي له مواصفات عالية وشروط صارمة في الجودة والتصنيع والمعلومة الجديدة أن الفيتيس بتاعها الأوتوماتيك ياباني الصنع من إنتاج شركة jatco اليابانية اللي بتملكها نيسان ومازدا وبتنتج الفتيس لغالبية العربيات الياباني كلها وعمليا السيارة تتمتع بقدر عالي جدا من الجودة في التصنيع والتقفيل وليس صحيحا مبالغات البعض مثل من يقول إن صباعه كان حيعدي من الصاج!! مع إحترامي الكامل له... ليه هو كان هركليز ولا جراندايزر؟؟ أنا مش بادافع عن العربية بس ده كلام مش منطقي خالص ومبالغ فيه جدا جدا

وبعدين السيارة فيها كمية كماليات عالية جدا جدا بمعني مفيش كمالية واحدة ناقصة ممكن تطلبها

وإستهلاكها إقتصادي جدا جدا وعوامل الأمان عالية جدا جدا سواء إير باج إو إختبار التصادم الأوروبي اللي ما بيعرفش يجامل أي حد بعكس الصيني اللي بيكون خفيف جدا
فبالنالي كان لازم أنقل العطا من إسبرانزا اللي إسمها أصلا شيري وإبن حسام أبو الفتوح اللي مألف لها الإسم ده إلي byd بمتهي الثقة.

وفي النهاية أرجو من كل من ينوي شراء سيارة أي كانت ماركتها يوسع دائرة بحثه ويركز علي تقارير الشركات الأجنبية المتخصة في تقييم أداء السيارات فنيا