الموضوع: حكايتي مع الالتو (تقرير شراء وترخيص واستلام)

بسم الله الرحمن الرحيم والصلاة والسلام علي اشرف المرسلين سيدنا محمد اما بعد:

طبعا في البدايه باحب اوجه الشكر للاستاذ عمرو المشرف علي منتدي سوزوكي علي نصائحه الغاليه قبل اختيار نوع السياره وشرائها...

انا هابدا من الاول خالص في شهر 12 اللي فات لما اخدت قرار شراء سياره جديده وبحكم اني طبيب بشري وتقريبا شغلي في اكثر من مكان حطيت مواصفات الشراء:

تكون صغيره وموفره في البنزين وسعرها معقول...(خدوا بالكم انا باتكلم قبل انفجار الاسعار اللي حصل في يناير)

كان قدامي اكتر من خيار الماروتي والالتو والسبارك والسبرانزا الصغيره والبيكانتو...

وبعد تباديل وتوافيق فكرت قررت اني اختار الالتو واستبعدت الباقيين لاسباب مختلفه...

طبعا القرار كان اني اجيبها قسط حسب الامكانيات الماديه...وبدأت الخطوات:

اولا: روحت المعرض واديتله صوره من البطاقه..المفروض اني كنت اخد عرض اسعار اوديه البنك بس كخدمه من المعرض هو قالي انا هاخلصلك كل حاجه...وبالفعل جالي علي البيت وعلي الشغل استعلام من البنك وكلموني قالولي روح امضي الموافقه جت...

ثانيا: روحت البنك ومضيت الشيكات واخدت 3 جوابات مختومين بشعار البنك...

ثالثا: روحت المعرض بال 3 جوابات ودفعت المقدم واستلمت العريبه..

اخيرا: روحت بعد يومين مع مندوب المعرض بالعربيه وعملت فحص شامل واشتريت طفاية الحريق وعلقت نمر واليوم اتكلف 850 جنيه باكرامية المندوب...


نيجي بقي لانبطباعي عن العربيه
: العربيه جميله وصغيره وواضح انها موفره في البنزين..السحب كويس والتكييف محستش انه بيأثر علي السحب( يمكن عشان انا لسه في التليين)
علي معلوماتي انها مافيهش باور بس هي ناعمه لدرجة ان زميلي اللي كان راكب معايا معرفش انها مافيهش باور وهو سايقها..
من جوه اوسع من شكلها من بره يعني يمكن تشيل 3 ورا..شنطة العربيه صغيره الي حد ما...

العيوب لسه ما ظهرتش معايا بس النصيحه العامه: كل عربيه فيها مميزات وعيوب,انا العربيه ده فيها كل اللي انا عاوزه بالحجم ده ممكن واحد تاني يحتاج مساحه اكبر او سعه لتريه اكبر, يبقي من الاخر مفيش حاجه اسمها عربيه حلوه وعريبه وحشه...فيه حاجه اسمها العربيه ديه مناسبه للي انا عاوزه وامكانياتي الماديه ولا لا...وتحت امركم في اي استفسار...