انا دخلت المجلس قبل كدة كذا مرة .. هوا الحقيقة مجهز بتجهيزات أولية لأطفاء الحريق و فيه طفاية حريق كبيرة كل 7 متر تقريباَ و خراطيم إطفاء و حنفيات حريق و لكن هناك بعض الملاحظات :
-العساكر اللي شغالين هناك عساكر "طيبين" زي اللي بنشوفهم في الشارع .. يعني التجهيزات في الحالة دي ولا ليها لازمة طالما مفيش اللي يستعملها
-المجلس من جوة منطقة عشوائية بكل ما تحمله الكلمة من معني .. بمعني إنك لو دخلت بعربية متعرفش تمشي جوة .. انا دخلت و الاقي ناس راكنة في اماكن غريبة زيها زي الشارع و تخش في حتة و ترجع تاني بضهرك عشان واحد جي في وشك ! مع إنه واسع جدا بس مفيش تنظيم .. أو بمعني أصح بيعكس صورة البلد اللي بيديرها
-قوات الأمن اللي عند المجمع في البطيخ .. انا بشوفهم موقفين عربيات الأمن المركزي مركونة في وضعيات غريبة و موقفة الشارع و ملهومش دعوة بالشارع خالص بالعكس بيساعدوا الناس تركن هناك صف تاني و تالت يعني متربيين عالغلط و الإهمال .. انا شفت مرة في شارع الشيخ ريحان عربية واقفة صف تالت بالورب يعني نصها في الشارع و متغطية و عسكري ساند بياكل ساندوتش عليها !
بإختصار .. المجلس و المنطقة أصلا مفيهاش نظام و انا غير متعجب .. و معتقدش أصلا إن قوات الإطفاء عندنا محترفة لأطفاء الحريق لأن إحنا كل حاجة عندنا شغالة بنظام "مشي حالك" .. و ساعة الجد ده بيبان أوي اوي لأن مبيبقوش قده .. العاشرة مساء بيقولك الهليكوبتر بتغلط و ترمي المياه علي الجمهور بدل المبني .. و رجل الإطفاء قاعد يرش عالمبني أكنه بيرش قدام كشك بدل ما يرش جوة في النار !
-ملحوظة : جميع موظفين مجلس الشوري كان المفروض يقبضوا بكرة و مرتباتهم إحترقت .
المفضلات