الموضوع: مشاجرة بسبب ركن سيارة مصرع شخص واصابه 11 في حلوان

م/ جوده
اولاً اهلا وسهلا بحضرتك

ثانياً احب اوضح لك ان انا متفهم مشكله الركنه اللي انت بتعاني منها تماماً لانها مشكله عامه بيعاني منها معظم الناس
بس سامحني انا شايف كلامك مش مظبوط ولا اللي بيرمي قشر لب وزباله على عربيه حضرتك عشان متركنش تحت بيته تاني صح ولو الكلام ده حصل في اي حته محترمه في العالم كان زمان سعاتك داخل في مشاكل وقضايا لا حصر لها
حضرتك طالما بتقول انكم سايبين 2 متر امام البيت ده على عينى وراسي بس ده ميعطيش الحق لحضرتك تمنع حد من الركنه لانه بتركك ليهم من البدايه فحضرتك كده سبتهم يضموا للشارع ومش المفروض كل واحد عاوز يركن يكون عنده العقود والرسوم الهندسية لكل عماره عشان يعرف حته الارض دي تبه الشارع ولا بتاعت حضرتك
يبقى لو كنت عاوز تحافظ على حقك في الركنه يبقى كان من الاول تعمل تصميم العماره بشكل يضم الاتنين متر دول داخل زمام المنزل وتدخل تركن وتخرج براحتك (اكيد ساعتها محدش هيدخل يركن جوه بيتك) اول كان من الافضل يتعمل جراج تحت البيت وساعتها تركن عربيه و اتنين وثلاثه كمان من غير ماحد يزعجك)
لكن طالما حضرتك فرط في حقك من البدايه يبقى مش من حق حضرتك تلوم الناس انها تفرط في حقها في الركنه في شارع عام (ومتقليش ان ده مش شارع عام ودول 2 متر انا سايبهم عشان طالما حضرتك سبتهم ومضمتهمش للعماره بشكل او باخر بقى ملكيه عامه عند الناس لانهم مكانوش مع حضرتك وانت بتبني ولا يعرفوا انك سايبهم من الاساس)
سامحني واتمنى ان يتسع صدرك لوجهه نظري
انتم مرضيتوش تعملوا جراج عشان تستغلوا مساحه الارض لاقصى درجه وتعملوا مساحات داخليه اكبر داخل الشقق رغم ان كان باديكم تعملوا جراج خاص وبتعاقبوا الناس اللي ممكن تكون شاريه شقه ولا ماجراها ومفيش في ايديها تعمل حاجه عشان مش هي اللي بانيه ياريت متقوليش هو اشترى ليه في عماره مفيهاش جراج لان حضرتك اللي باني عماره خاصه معملتش جراج اصلاً

ثالثاً حضرتك بتقول انها مناطق شعبيه والاماكن قليله والكلام ده طيب ما من باب اولى بقى اللي ساكن في مناطق راقيه (او اللي بيقولوا عليها راقيه ذي المهندسين والزمالك والمعادي ومصر الجديده ومدينه نصر وغيره وغيره ..... ) يمنع حضرتك مش من انك تركن بس لأ كمان من انك تدخل المنطقه اصلاً وهيكون اعذارهم من وجهت نظرهم منطقيه برضوا تحب حضرتك اقولك هتبقى اعذارهم ايه
- احنا دافعين فلوس كتير اوي ومش معقول ندفع كل ده ومنلاقيش نركن عربياتنا
- المنطقه بقت زحمه جداً ومش ناقصه ناس من بره تيجي تتفسح عندنا (على الرغم ان حضرتك ممكن تكون مش رايح تتفسح ولا حاجه وتكون رايح شغل او بتقضى مصلحه ولا بتزور حد لكن من وجهه نظرهم حضرتك بتتفسح)
- العمارات عندنا 11 و 12 دور والشقق كتير واحنا بقى اولى من اللي جاي من بره مش عاجبه ميجيش
- انا مش فاهم الناس دي جايين يقرفونا في منطقتنا المنطقه هاديه وجميله والناس اللي جايه من بره دي هما اللي مبوظنها لازم نخنق عليهم عشان ميجوش تاني (ودي بقى بتنطبق بشكل كبير على نسبه لا باس بها من الاسكندرانيه بالذات في فصل الصيف)

لو فكرنا بقى بالمبدأ بتاعك يبقى الناس دي عندها حق
هما فعلا دافعين فلوس كتير
هما فعلا اماكن الركنه مش مكفياهم هم شخصياً
هم فعلاً ملهمش ذنب انك عاوز تتفسح
وملهمش ذنب ان حضرتك ساكن في مكان مش متوفره فيه الخدمات اللي عندهم
ولا ذنبهم ان حضرتك سبت مكانك وجاي تشتغل في شركه فاتحه عندهم

هل بقى لو سبنى كل واحد يفكر في مصلحته الشخصيه بس يبقى الوضع كويس ولا من الافضل ان احنا نحترم الملكيه العامه عشان لما تروح اي حته تعرف تاخد حقك

سؤال أخير : حضرتك لو في يوم من الايام قررت تنقل ولاقيت كل واحد حاجز مكان في الشارع لنفسه هتعمل ايه ؟؟

اسف على الاطاله واتمنى ان حضرتك متزعلش من كلامي

مفيش داعي للجدل طالما الهدف مش الوصول للحق وعدم الظلم لأ الهدف .... بلطجة وخلاص وهو كده يااخواننا نايل موتورز يمثل مجتمع مصر بكل فئاته وطالما مفيش شرطة ولا قانون وواحد الحته فالشارع بتاعتي ومش عارف ايه طيب مضميتهاش للفيلا ليه!! ولا علشان تكبر مساحة ومش كل الناس زي بعض ربنا كارمهم بالتمليك وانت بتطالبه يدور علي شقة ايجارها اعلي علشان في جراج(وممكن الجراج كمان يكون متباع لناس مش من السكان) ربنا مخلقناش متساويين فالرزق اه كل واحد واخد 24 قيراط فالدنيا بس مش كلنا وعمرها ماهتبقي كلنا نبني ونسكن في ملك..اتقي الله الرحمة حلوة ودي للاسف مش موجودة عندنا وادينا شايفين غضب ربنا علي البلد نازل ازاي...مش معني ان الناس في منطقة ما بلطجية ان نكون زيهم " إِن تَكْفُرُوا فَإِنَّ اللَّـهَ غَنِيٌّ عَنكُمْ وَلَا يَرْضَىٰ لِعِبَادِهِ الْكُفْرَ وَإِن تَشْكُرُوا يَرْضَهُ لَكُمْ وَلَا تَزِرُ وَازِرَةٌ وِزْرَ أُخْرَىٰ ثُمَّ إِلَىٰ رَبِّكُم مَّرْجِعُكُمْ فَيُنَبِّئُكُم بِمَا كُنتُمْ تَعْمَلُونَ إِنَّهُ عَلِيمٌ بِذَاتِ الصُّدُورِ" واذكر نفسي واياك بحديث الحبيب صلي الله عليه وسلم "من اقتطع شبرا من الأرض ظلما ، طوقه الله إياه يوم القيامة من سبع أرضين"ومش كل من جاب عربية معاه تمن جراج ده يادوبك جايبها يعف بيها اهل بيته عن قرف المواصلات والسرقة و و و..انا افهم ان الواحد يعمل كده مضطر لكن يقول ده الحق وده الصح مش صحيح ابدا