الموضوع: الحمدلله علي كل حال - عملت حادثة بعربيتي

بسم الله الرحمن الرحيم

السلام عليكم ورحمة الله وبركاته

أخواني الأعزاء في قسم سيات نايل موتورز
أسعد الله صباحكم بكل الخير

امبارح كنت في مدينة نصر ونزلت رايح وسط البلد
خرجت من مدينة نصر الساعة 4 العصر
خط سيري كان - الطيران - نفق الطيران، يوسف عباس - العروبة - صلاح سالم
بعد مرتفع حديقة الأزهر - نزلت علي السيدة عائشة
في الملف قبل السيدة عائشة - أتفاجئت بسيارة فرملت أمامي علي مسافة 4 او 5 متر علي اقصي تقدير
كانت سرعتي حوالي بين 40 و 50 كم/ساعة
مسكت فرامل جامدة جداً وبالفعل يا دوب لمسته بالفوانيس والشبكة وسمعتهم اتكسروا
بس المفاجأة التانية ان جت سيارة اخري من الخلف وراحت داخلة في عربيتي خليتني خبطت اكتر في السيارة اللي قدامي

ملابسات الحادث
دخلت ملف السيدة عائشة علي الواسع عشان امسك اقصي يساري لأني طالع كوبري السيدة عائشة
في الحارة اللي علي يميني علي طول (بس قدامي بمسافة) عربية بيجو 406 وقدامها فيرنا
اتفاجأ قائد الفيرنا بمعزة Goat بتعبر الطريق مسرعة
بتاع الفيرنا مسك فرامل ولأن العربيات مش بتسيب مسافات كبيرة في الحتة دي نظراً لأزدحامها
فما كان من قائد البيجو إلا انه يفرمل ويغير حارته ويدخل علي حارتي
انا اتفاجأت بالبيجو قدامي وعلي مسافة 5 متر متوقف تماماً
مسكت فرامل وراه والعربية زحفت لحد لما خبطت فيه وكسرت الفوانيس والشبكة
عربيته اعلي مني فطبعا انا دخلت تحت اكصدامه
ملحقتش اخد نفسي وكان لابس فيا من ورا عربية افيو
طبعا خلاني كملت علي الكبوت والأكصدام الأمامي (لأن عربيتي وشها رفع لما سيبت الفرامل)
والأكصدام الخلفي والشنطة عندي راحو في داهية (لدرجة النمرة الخلفية اتطبقت)

وقفنا احنا الثلاثة نتفرج علي العربيات
البيجو - الله اكبر ولا اي حاجة
الأفيو - الله اكبر ولا اي حاجة - فقط الأكصدام اتفك من احد اجنابه والشبكة اتهزت
العبد لله - كبوت + اكصدام امامي + صدر كامل + الفوانيس والأشارات + الرفرف اليمين + اكصدام خلفي + باب شنطة + الأجناب جمب الشنطة + الطابلوه اتكسر

الحمدلله علي كل شئ
بتاع البيجو عرض عليا المساعدة - بس انا رفضت وقولته الحمدلله وقدر الله وماشاء فعل

الحمدلله

مفيش اي دروس مستفادة - لأن ببساطة احنا ال4 اتفاجأنا بالموقف (المعزة)
ومن وجهة نظري - احنا الأربعة ضحية ومفيش حد غلطان

الحمدلله

ربنا يستر طريقكم جميعاً

والله المستعان
،
،