الموضوع: مشكلتي مع جوزي معقدة ياريت القى حل مناسب

السلام عليكم
انا هكتب المشكلة الي بعاني منها
في البداية هكتب شوية اشياء مهمة لفهم المشكلة بشكل صحيح
انا امي ماتت وانا عندي 8 سنين وانا مش عايشة في مصر ولا عشت فيها ابدا ولا اعرفها عايشه طول عمري ومولوده في السعوديه
عمري دلوقتي 24 سنة
والدي متدين او بمعنى اصح متشدد وتزوج بعد وفات امي وانا عشت من بعد 8 سنين انا واخواتي مع والدي وزوجته
لحد هنا دا مجرد توضيح
المهم
بعد ماكملت سن 17 سنه كنت خلصت ثانوية خلاص بابا جوزني لواحد سعودي صاحبه عمره وقتها كان 41 سنة دخلت مرة من المدرسة وكان موجود في الصالون وشافني واتقدملي وبابا وافق
انا طبعا رفضت لكن بابا ضربني وقالي مش هسمحلك تسافري مصر تكملي تعليم ولا فيه تعليم ليكي هنا هتقدي في البيت وقلتله ماشي
لكن اصر وضربني جامد وجوزني لصاحبه دا وانا معنديش اي حد اشتكيله او اروحله انا طول عمري وحيدة واخواتي كلهم اولاد وكانوا سافروا بيدرسو جامعة
المهم تم الزواج بدون فرح بدون فستان زي اي بنت وبدون اي شروط ودفعلي مهر 15 الف ريال بابا خد منهم جزء وجبلي دهب بجزء
ورحت بيت جوزي السعودي شقة مفهاش الا اوضة نوم و طقم جلوس صغير وتلاجة وبتوجاز وتلفزيون ورسيرفر
المصيبة انه طلع متزوج وعنده 5 ومراتو متعرفش وهيا اصغر منه بسنتين وبناته الفرق بينا بسيط جدا بس مقلهمش خالص عن موضوع جوازنا
قالي انا مش هينفع انام في البيت عشان لازم اروح لولادي ومراتي قلتله طيب وانا هتسيبني لوحدي ؟ قالي متفق مع باباكي على الحجات دي
وفعلا قضى في البيت يومين ومن بعدها مش بينام في البيت وبيجي الصبح فترة ويمشي
الكلام دا استمر 7 سنين انا حملت وجبت طفلة وطبعا حملت وولدت بدون ماحد يكون جنبي في الغربة ولا تتخيلو كمية البهدلة الي شوفتها
انا طول الفترة دي مكنتش بسكت كنت بطلب من زوجي اني اتعلم على الاقل او اخرج لانه حابسني في البيت تقريبا لما حالتي النفسية بقيت زي الزفت ماعرفش حد ومبشوفش حد
فقرر انه يخليني ادرس ومن الضغط المستمر عليه خلاني ادرس عن بعد وهو كمان بيدرس معايا وبنروح امتحانات بس برضو مش بيديني اي فرصة اتعرف على اي حد لما بخلص امتحان بلقيه يفضل يرن عليا حتى قبل ماخرج من اللجنة
انا دلوقتي بس ابتديت احس بالظلم الشديد الي وقع عليا طول حياتي ومع الايام ابتديت اعرف حقوقي وواجباته وابتديت احس اني مش حاسه اني مع انسان ممكن اعتبره زوج
الان انا على نفس الحال بس معايا شهادة جامعية وبحاول ادخل دورات لغة عن طريق الانترنت بس مش عارفة اتعلم لغة خالص بحاول أسس نفسي بقدر المستطاع
عشان انا خايفه على بنتي وخايفة من مصيري انا وهي بكرة وبعده ومش عندي لا بيت ولا اهل ولا حد جنبي المصيبة اني مش عارفة حاجة فاي حاجة وحاسه اني مسجونه 24 سنة
بابا دلوقتي تعبان جدا ربنا يشفيه انا خايفه عليه وخايفه اتكلم معاه يجراله حاجة بسببي ومش عايزة احسسه باني تعبانه من كل النواحي ومش ممكن هتكلم معاه
اخواتي كل واحد مهتم بنفسه وبيكون نفسه ولايمكن يقعدو معايا ويسمعوني وخصوص انهم مش مستمرين في السعودية بيجيو وبيمشو على حسب وضعهم

انا دلوقتي لا عندي دهب زوجي باع الي اشتريته ولا عندي شقة "مساكني في شقة مفروشة" ولا عندي شغل واصلا مكتوب في اقامتي "غير مصرح له بالعمل"
وزوجي رافض يخليني اسافر لمصر ورافض يطلقني ورافض يخليني اشتغل ورافض يخليني اتعرف على حد والله اقسملكم بالله ان حتى الاكل والشرب ماليا كلمة فيه هو بيشتري الاكل من المطعم الي على مزاجه
ولبسي نفس الامر وكل حاجة في حياتي انا مليش اي ايد فيها
اخر مره زعلت واتخانقت معاه قعد يصلي "هو كل ماقعد اتخانق يفرش المصلية ويقعد يصلي لما انام من العياط" اخر مره سبته يصلي ولبست ونزلت ومعرفتش ارجع البيت وقعت اعيط في الشارع
مكنتش عارفة انا ماشيه ليه ورايحه على فين وخرجت ازاي وشريط حياتي كله شغال زي الفلم أدام عيني وبببكي على نفسي وانا بمشي في الشوارع وحاسه اني هيغمى عليا والناس بتتفرج على وحده هبلة ماشية فالليل لوحدها
لقيت عربية وقفت جنبي وكانت عربية جوزي ركبت وكنت بعيط جدا عشان انا مكنتش عايزة اشوفه تاني حاسه انه بيستحقرني وبيعاملني كاني انسانه مش بفهم وكاني طفلة او شيء شاريه وراكنه
قلتله انا بكرهك وبكره نفسي وانا معاك ومش حاسه بحياتي معاك ومش عايزة اعيش معاك وانت مش راجل وطلعت كل الي في قلبي
تخيلو رد بايه ؟ ضحك وقالي طيب انتي كنتي رايحه فين ؟ انا هعملك شقه باسمك لما يبقى معايا فلوس وهشغلك لما الاقي شغلانه محترمة وهخليكي تسافري لما ظروف مصر تتحسن
وكل حاجة هعملك وهعملك وهو طول عمره بيوعد وانا عارفه انه صعب ينفذ وعوده وظروفه الماديه وحشه لانه اخد قروض كتير وعليه مبالغ كبيرة ديون
طيب انا هصبر لامتى ؟ وهل هرتاح لو فعلا عملي شقه ؟ هل هي دي مطالبي ؟ انا كدا هيعوضني عن اي شيء ؟

جوزي عنده دلوقتي 48 سنة ومش حاسه معاه باي شيء ممكن تحسه اي وحده مع جوزها مع انه عمره ما زعل مني او اتخانق معايا ولما بتخانق وبزعل بيسكت وبيقعد يهديني مهما قلت مش بيرد خالص
بيقولي حاضر هعملك كل الي نفسك فيه هو طيب معايا بس مش بيعمل اي حاجة من وعوده يعني بيسكتني وخلاص
انا حاسه اني عايزة اعيش حياتي زي اي انسانه طبيعيه
ومش عارفة اعمل ايه واحل مشكلتي دي ازاي
بيخطر في بالي سعات اني عمري ماهلبس فستان فرح وعمري ماهيتعملي زفة وفرح وهيكون عندي اصحاب بياركولي بقول لنفسي لازم تتخطي المرحلة دي وتنسي الموضوع دا وتفكري بجدية اكتر

لكن بكل صدق وبكل واقعية مش قادرة انسى ولما بشوف فستان عروسة دموعي بتنزل بدون شعور
لكن على الاقل بتمنى القى حل يخرجني ويخرج بنتي من الوضع دا

كتبت مشكلتي في منتديات مصرية كتير وللاسف بيتم حذف الموضوع وبدون ماعرف السبب

بتمنى اسمع صوت غير صوتي وياريت التوضيح يكون كافي لفهم اسباب المشكلة

فانا مكنتش لا طامعه في مال ولا بعت نفسي