الموضوع: رجاء بخصوص البنزين

أزمة البنزين بتضرب القاهرة بقوة و المحطات كلها مستفة و موقفة الشوارع من الصبح
رجاء لكل انسان مصري مسلم او مسيحي ........ يحترم اخواته و يراعيهم
- التزم بطابور المحطة لأنك مش احسن من باقي الناس ولا اذكى ولا اشطر منهم , لو ما التزمتش هما احسن منك و انت اناني و دنيء
- لما ربنا يكرمك و توصل بالسلامة ان شاء الله , يا ريت ما تبقاش اناني و تفول عربيتك عالآخر , يعني 20 ولا حتى 30 لتر يمشوك , ال10 ولا ال20 لتر اللي هاتسيبهم فاضيين في التنك بتاعك دول هياخدهم واحد مزنوق في بنزين لو انت اخدتهم المحطة هاتقفل و هو على بابها , و هايتشل و يتنقط و ممكن عربيته تقف بيه

يا ريت في الايام الصعبة دي نخلينا قلبنا على بعض و نبعد شوية عن الانانية الى حد الغباء اللي طول ما هي فينا هايفضل حالنا في الحضيض كده

انت تشيل بنزين عشان كمان كام يوم (ممكن) ما تلاقيش و قصادك واحد تاني مش هيلاقي بنزين يمشيه النهارده و المحطة هاتقفل في وشه ؟ ولا انت تاخد شوية يمشوك كام يوم و هو ياخد شوية يمشوه كام يوم و بعدها يحلها ربنا ؟

حط في حساباتك اخر واحد هايقف على باب المحطة قبل ما تقفل على طول , لو سبت له 10 لتر هايمونهم و يمشي , طب تخيل ان 100 واحد عملوا زي كده , يبقى المحطة هاتخدم 100 واحد كمان و الازمة هاتخف بمقدار 100 عربية لمدة يومين , طب تخيل ده ما حصلش , يبقى ال 100 عربية دول هايقفوا في طابور البنزينة من الفجر , و بالتالي استمرار للأزمة
لو حسبتها بطريقة جماعية هتلاقي الحسبة اسهل , هو اختيار مش سهل انك تؤثر غيرك على نفسك , لكن هو ده الصح فعلا

الكلام ده مالوش دخل بالازمة سببها مين ولا ايه , الكلام هنا ان فيه ازمة و لو الناس ما شالتش بعضها يبقى الازمة بطبيعة الحال هاتزيد , زي ما كنت باقول لك , احنا ممكن يكون عندنا 1000 عربية على باب محطة بنزين لأن فيه 1000 عربية تانيين فيهم بنزين هايستعملوه بعد 4 او 5 ايام

لما كل واحد فينا يقول نفسي و بس و الباقي مش مهم ........ يبقى احنا كده عرفنا احنا ليه ادنى اهل الارض , لأن نفس الواحد مننا لما بيوصل بيكمل بنفس الثقافة , انا و بس و الباقي بعد كده , و يرجع الباقيين يقولوا هو مفضل نفسه علينا ليه

مش مختلفين ان الدولة لازم تحلها , لكن في نفس الوقت الناس لو احترموا نفسهم مع بعض مش هياكلوا في بعضهم , و ده حتى واحد من مقاييس التحضر , و من هدى الاسلام كمان

لو مقتنع شير و وصل المعنى ده لكل معارفك




منقول