الموضوع: بيجو ٣٠١ -- ماذا عن تقفيلها في الصين بداية من ٢٠١٤

المشاركة الأصلية كتبت بواسطة ebrahim mayalo

يا جماعة هو انا احط للبيجو 301 زيت توتال ولا موبيل

حط زيت شيل,
هيا بيجو بتنصح بتوتال بس توتال اللي في مصر وحش مش حلو,
وموبيل من أسوء الزيوت الموجودة في مصر.

ممكن تراجع تجارب الأعضاء دي وتشوف نسبة التقييم في الموضوع دا فوق,,
http://www.nilemotors.net/Nile/42130-a-17.html
http://www.nilemotors.net/Nile/328721-5000.html

ودي تجربة واحد مع توتال,
http://www.nilemotors.net/Nile/3874837728-post164.html
http://www.nilemotors.net/Nile/42130...post3874837728

أنا من أول ما جبت العربية, كانت بتغير ب موبيل 1 في توكيل بيجو..
وكنت دايماً بحس أنها بتسخن بشكل ملحوظ لما بقف جنب الكبوت, بس درجة الحرارة جوا في العداد كانت بتبقي عادية, مع العلم إن دي درجة حرارة المية جوا الموتور مش درجة حرارة الزيت,,
وكنت بضايق لأن كانت الانسر عمرها ما بتسخن كدا ولا صوتها كان عالي,
وكنت بحط للانسر زيت شيل الأصفر مش الالترا الرصاصي التخليقي كامل.

المهم في مرة كنت بعمل صيانة عند مركز خدمة أحمد عمارة, ولاقيته بيغير لكل العربيات زيت شيل بس, وسألته أيه السبب مع أنهم في التوكيل وبيجو غمرة وأبو رواش بيغيرو بموبيل 1.
قالي زيت موبيل اللي في السوق مضروب,, ولزوجته وحشة ومن أسوء الزيوت في مصر..

المهم غيرت لشيل طبعاً لأنه اللي كان عنده, وعشان كنت مجرب شيل قبل كدا في اللانسر, فقولت أجربة في البيجو وأشوف الفرق عامل أزاي في اللزوجة والحرارة وصوت المكنة.
ومن ساعة ما غيرت لشيل في سنة 2010 والصوت أهدي ودرجة الحرارة معقولة جدا وفي العادي والعربية مش بتسخن من برة ولا بيطلع هبو سخن من الكبوت زي الأول الحمدلله,,

فنصيحتي ليك غير بزيت شيل ألترا التخليقي اللي علبتة رصاصي علي أسود دي,


أنا عن نفسي لما باجي أغير الزيت في توكيل بيجو أو أي مركز خدمة ليهم,
باخد معايا جركن زيت شيل من البنزينة وأروح لهم وأقولهم قبل ما يعمل أمر الصيانة أنا عايز أغير زيت وجايب الزيت معايا عشان بحط لها شيل,
لأن موبيل اللي في مصر زي الزفت, أولاً مش بيعيش أكتر من 5000 ولزوجتة بتبقي ضايعة, وبيسخن الموتور وبيخلي صوته عالي.!

وبيغيرو لي الزيت وباخد الفلتر من عندهم طبعاً وبتحاسب علي تمن الفلتر ومصنعية تغيرهم,

المشاركة الأصلية كتبت بواسطة on1touch

ياجماعه هو انتوا ليه بتقولوا ان ال 301 فءة الريو مش السيراتو مثلا ؟ ثانيا الامكانيات اللي فيها زي امكانيات الكروز 2013 مع فرق 20000 في السعر ؟ انا بشتري كروز بصراحة بتغريني جدا امكانيات وثبات ع الطريق ومقصورة كبيره ومنظمة وشيك جدا عكس ال 301 خالص و بالصدفه البحته قريت موضوعكم عن ال301 رجعت لنقطة الصفر تاني .. انتوا السبب بقي مش عارف هعمل ايه بعد ماقررت

مع أحترامي ليك, متجبش اللوم علي حد ولا تقول أنه السبب,, أنت سيد قرارك.!

والبيجو محدش قال أنها مفروض تتقارن بريو,, عشان نقول أنو الصح أنها تتقارن بسيراتو.!

اللي خلا ناس كتير تقارن البيجو 301 مع الريو الفترة اللي فاتت,, هوا فرق السعر ما بينهم لأنهم في نفس الفئة السعرية,,

أما لو هتقارن البيجو مع السيراتو الجديدو فأنت بتتكلم في فرق سعر كبير يبدأ من 50 ل 70 ألف جنية لو هتقارن العربيتين ببعض من البيز لاين للهاي لاين,
ومفيش حد بيقارن ما بين عربيتين بالشكل دا,,

بسعر السيراتو الجديد وسعر الكارينز العجيب ممكن تقارنهم بأوكتافيا, أو بيجو 3008 أو 308SW
أو حاجة من الحاجات الاوربي النضيفة,

فا الناس بتشوف معاها كام, وممكن يجيب عربية أيه وفيها مواصفات أيه بالسعر دا,,
وفي الأول والأخر كل واحد بيشوف عربية أنسب ليه حتي لو مكنتش أحسن صفقة في السوق,

أنا عن نفسي شايف البيجو أفضل صفقة في السوق من الكوري عموماً,
لأن الراحة في الأوروبي أعلي عن الكوري ودي مش محتاجة أحكي عليها ممكن أنت تجربها, والثبات والأمان نفس الكلام.

كفاية أن البيجو بتنزل من أول فئة فيها ABS+EBD+Airbag
والريو بتنزل فاضية مفهاش ولا حاجة من دووول, غير لما تجيب الهاي لاين.!
وتقولي نقارنهم ؟!!


فا أنت أقرأ عن العربيتين اللي بتقارنهم ببعض, أو شوف أيه اللي في السوق في رينج المبلغ اللي معاك,
وشوف أيه اللي في كل واحدة ومش في التانية, وشوف أيه اللي يناسبك وربنا يوفقك في الأختيار,

الكيا السيراتو مثلاً الناس كانت بتروح لها من 2008 معا أنها كانت كوري ومكنش حد بيحب أيامها الكوري ولا الصيني,
بس كله راح لها لأنها كانت نازلة في رينج ال 120 وهاي لاين فيها حساسات ركن وكاسيت mp3 وكلها حركات ودلع,, علي عكس الكوري اللي كان موجود من دايو وفيرنا.

ومن 2008 كانت هيا اللي بدأت تعمل أسم للكوري وحببت الناس فيه,
لأنها كانت بتديهم مزايا كتير مع سعر معقول, في الوقت اللي الأوروبي فيه مكنتش كل الناس بتقدر عليه مع سعرة الغالي وطبعاً تمنه فيه, وصياناته المكلفة,
في الوقت اللي كان كل السوق التفكير فيه لانسر وكورولا والباقي أوروبي.


أما دلوقي الأمر أختلف كلياً, الكوري سعرة زاد بشكل خوزعبلي.!! وبقي يديك مواصفات أقل في عربية زي الريو الجديدة مقارنة بالبيجو301,
وبقي كمان أغلي من الأوروبي زي السيراتو الجديدة والكارينز اللي سعرها مش مبرر.!

في حين إن الاوربي زي البيجو 301 سعرها معقول جدا بالنسبة لمواصفاتها وبالنسبة لعربية أوروبي بتدي راحة في السواقة وأمان عالي وتاريخها معروف, وقطع غيارها كمان سعرها في رينج الكوري يعني مش غالية,

فا أنت تاني أقرأ عن العربيتين اللي بتقارنهم ببعض, أو شوف أيه اللي في السوق في رينج المبلغ اللي معاك, وربنا يوفقك في الأختيار.

تحياتي ليك.