الموضوع: هل ده عيب فى بيجو 508

بس انا كنت عايز اضيف ان مركز صلاح سالم ماشوفتش معاهم حاجة وحشة محترمين جدا فى التعامل .

المشاركة الأصلية كتبت بواسطة leitosr

أنا روحت لهم مرة غيرة زيت وفلتر زيت وفلتر هوا وفلتر تكييف, وكانت التجربه أكتر من ممتازة من ناحية الوقت والمكان وعمل الصيانة, ودي كانت ممتازة..

تاني مرة ربنا وعدني بمهندس ربنا يسامحة أسمه مصطفي,
روحت أغير زيت كانت العربية عاملة 60 ألف, وكنت مغير عندهم الحاجات اللي قلتها فوق علي 40 ألف,
قالي عايز صيانة ال 60 ألف قلت له أنا مغير الحاجات بتاعت ال60 من فترة وعايز أغير زيت بس.

راح كاتب في الورقة برضه صيانة 60 ألف, ولما أستغيبت العربية لأني بغير زيت بس.
طلعت لاقيتهم وش الموتور مفكوك, ومطلعين البوجيهات ورامينها علي الطربيزة وهيا كانت لسه جديدة ومغيرها في غمرة من أقل من 10 الاف كيلو, ومطلعين كل الفلاتر بره هوا وتكييف, وفاكك سير المجموعة وبيفك في جنب الماتور عشان يغير سير الكاتينة..

قلت له أنت بتعمل أيه, أنا طالب تغير زيت بس, قالي اللي مكتوب في ورقة التشغيل صيانة 60 ألف.
حط نفسك مكاني تعمل أيه ساعتها ؟؟؟

المهم أنا دخلت لمهندسين الأستقبال من اللي أتعمل في العربية والمهندسين كلهم بقو يبصو لي وميتكلموش ويرجعو يبصو لمصطفي دا وهوا ساكت,
وقعدو يحاولو يقنعوني أغير الحاجات دي لأنها محتاجة تغير, ويقولي لي الفلتر وسخ, البوجيهات منفسة,, كان معايا فاتورة صيانة ال40 ألف في الطابلوة طلعتهالم فا كله أتخرصص..

وفي الأخر دفعوني 290 مصنعية تغير زيت وفلتر بس !!!
قله لهم أنا مش هدفع 290 عشان غلطة المهندس, ومش مشكلتي,
ومن هنا لهنا يقولي لي العربية أخدت وقت من التشغيل ومشينا عربيات تانية جات بعدك وقعدو ويهرو في الكلام, ولما دخلت لمدير المركز كان راجل محترم جداً وقالي هعوضهالك, ودا اللي هداني لأنو عوضهالي فعلاً في حاجة تانية,,,

المهم أنا من قريفتي يومها وعشان كنت عايز العربية تتقفل وتركب فيها الحاجة وأمشي,
دفعت ال 290 وطلبت تربيط عفشة من غير ما أدفع مليم عشان ممشيش من عندهم حاسس أني أتضحك عليا في المبلغ دا,
لسه هيبصو بعض, كنت هشتم, قامو ندهو علي بتاع الورشة يربط لي عشفة,
وأخدت العربية ومشيت,,

لو حابب أرفع لك صورة الفاتورة زيادة تأكيد علي كلامي بأني دافع 290 جنيه مصنعية تغير زيت في بيجو صلاح سالم قولي وأرفعهالك مفيش مشكلة.

يمكن أنا تجربتي كانت وحشة, لأن المرة اللي قبلها كانت التجربة فوق الممتازة,
بس لو كان المركز كويس مكنش دفعني المبلغ دا في تغيير زيت.

عندك حق فى كل اللى قولته طبعا بس انا حعتب عليك فى حاجة صغيرة يعنى المهندس مفهمش او مش محترم بس يا راجل مش تقرا كتب ايه فى امر الشغل كنت ريحت نفسك وعموما حصل خير و ان شاء الله متتكررش تانى .

المشاركة الأصلية كتبت بواسطة LeitoSR

أنا قريت أمر الشغل فعلاً, ودا كان بعد ما سألني هتعمل أيه وقلت له هغير زيت بس..
ولما لاقيته بص في عداد العربية وكتب صيانة 60 قلت لا زيت بس, وأني مغير الفلاتر والسيور في الصيانة اللي فاتت عندهم,,

قالي ماشي هغيرة عشان يريحني وراح سلمها للفني من غير ما يعدلها,!!
مع أني مأكد عليه أكتر من مرة زيت بس, وكنت كمان جايب لهم الزيت معايا,
لاني غيرت لشيل من بعد ال 30 ألف لما لاحظت إن الموتور بيسخن ب 6000 كيلو علي غيار الزيت بتاع موبيل بتاعهم وصوته بيعلي بشكل ملحوظ فغيرت لزيت شيل علي نصيحة من أحمد عمارة ومن 2010 وأنا ماشي عليه, ومش بحط موبيل أبداً في أي عربية.
فابقيت في أي صيانة بجيب الزيت من شيل وبروح أغير الزيت بالفلتر عند أي مركز خدمة.

ودي نصيحتي ليك اللي حبيت أقولها لك,, شوف الزيت اللي يناسبك من دلوقتي في السوق من شيل ولا ليكوي مولي ولا زادو الجديد دا ناس كتير بتشكر فيه,
ولما تيجي تغير غير عليه وخده معاك مش هيقولو لأ,,
وأبعد عن موبيل لأنه بجد أسوء زيت في السوق.


بس أنت عندك حق, كان المفروض أخليه يغريها وانا واقف معاه, بدل ما يحصل العك دا,
والحمدلله علي كل شئ.

شكرا على النصيحة وانا كنت لاحظت حاجة فى ال 308 مش عارف طبيعى ولا ايه العربية صوتها بيكون مسموع عند سرعة 120- 130 قبل كده عادى وبعد السرعة دى عادى برضة محدش عنده فكره ده ممكن يكون ايه ولا ده لى علاقة باللى حضرتك قولته استاذ Leito

المشاركة الأصلية كتبت بواسطة leitosr

الصوت اللي بيجي علي سرعة معينة ويروح بعدها وبيكون في رينج 10 ل 20 كيلو علي العداد,
بيكون في الغالب من الكاوتش مش من الموتور ولا من العفشة ولا جسم العربية,

لأنو لو الصوت من الماتور هيفضل يزيد مع السرعة,
ولو من العفشة وأحتكاك الهواء بجسم العربية هيكون دائم وهيزيد برضه مع السرعة.



أنا الموضوع دا حصلي لما غيرت كاوتش العربية اللي كانت نازلة بيه ل kumho الكوري, بعد أربع سنين من عمر الكاوتش الأصلي
وغيرت ل kumho علي نصيحة من أستاذ محمد نيل هنا عشان كان أوفر بكتير من التورانزا بتاع بريدجستون وفر الأربع كاوتشات أيامها كانو بحوالي 2000 وشوية,
البريدجستون كان ب 4500 وكان فيه منه مضروب مالي السوق.!!

فجيبت الكومهو ومعايا لدلوقتي وزي الفل, كان ممتاز وناعم جدا ومفيش صوت أول ما جبته,
بس بعد شهرين ظهر صوت ونة علي سرعة ما بين 90 - 100 أو 110
قبل السرعات دي وبعدها مفيش صوت,,
وكان مضايقني جداً لان دي السرعة اللي بمشي عليها طول الوقت,

في حاجة أسمها tire rotation المفروض تتعمل كل فترة بس أحنا مش بنعمل الكلام دا,
أنك تغير مكان الكاوتشات مع بعضها عشان تحافظ عليها وعلي النقشة وتديها عمر أطول,

وعشان لو في كاوتشة بيتاكل بشكل أعلي بسبب مشكلة في العفشة في جنب من الجوانب الأربعة في العربية لما تغيرها مع واحدة تانية بتحافظ عليها من الضغط اللي عليها.

دا ال diagram بتاع ال tire rotation





دلوقتي أنت ظبط ضغط الهواء, وفضي هوا الكاوتش كله وأملاه نيتروجين عند بريدجستون,
ولو دا كاوتش ال 308 وعمر الكاوتش داخل في ال 3 سنين,, خلي ضغط الكوتش علي 30 بس عشان ميبقاش ناشف علي العفشة ويريح العربية في المطبات وميعملش صوت,,

أخر حاجة دلوقتي أنقل الكاوتش اللي قدام ورا,, واللي ورا قدام,,
وبعد 2000 أو 4000 كيلو أنقل الكاوتش اللي في الجنب اليمين للشمال, والشمال لليمين,
وشوف الصوت هيروح ولا لأ,

أنا عملتها مرتين تقريباً لحد ما ظبط والصوت راح لوحدة بعد بحوالي 4000 أو 5000 كيلو من ال tire rotation. ومفيش صوت دلوقتي

أعتقد كان في مشكلة في نقشة من الكاوتشات, وهيا اللي كانت عاملة صوت الونة دي,
ولما غيرت مكانها كذا مرة يا أتمسحت الطبقة اللي كانت عاملة الونة دي يا أتظبطت.

ومع الحاجات دي عشان تظبط كله, أظبط زوايا العربية عند حد بالكمبيوتر عندنا ب 20 جنيه تقريباً,
ورصرص العجل بالمرة عند بريدجستون وأنت بتملاة نيتروجين عشان تاخد أحسن نتيجة.

انا بعمل الكلام ده فعلا انى ابدل العجل والعجل مظبوط على 30 نيتروجين بس هو حقيقى العجلتين اللى قدام شكلهم متبهدل شوية حشوف الموضوع ده بس انصحك جرب كونتيننتال او يفضل ميشلان اجمد انواع الاطارات فعلا عن تجربة البريدجستون دى اى كلام جرب وحتدعيلى بغض النظر عن سعرهم هو طبعا غالى وشكرا لاهتمامك .