الموضوع: مساعدة في بيجو 307

المشاركة الأصلية كتبت بواسطة daliag

ممكن مساعدتكم يا جماعه انا محتاره بين بيجو 307 موديل 2007 او 2008 حسب ما الاقي واحده كويسه وبين البي واي دي f3 2011 و البريليانس fsv 2011 لان التلاته نفس الفئه السعريه في المستعمل وده الاشكال الوحيده اللي عاجباني بالنسبه للمبلغ اللي معايه واتوماتيك لان مش بسوق غيره ومن ناحية الراحه في سواقة العربيه لان كان معايه هوندا ياباني قبل كده وانهي احسن من حيث فخامة العربيه ورقيها وسط اللعربيات وده مهم جدا بالنسبه لي لان العربيه هتعد معايه مش اقل من 4 او 5 سنين وقرايبنا بيدققوا شويه فاننا محتاره انهي فيهم شكللها يفضل لادام اكتر ميبطلش او ميقدمش بسرعه انتوا شايفين موضة الفوانيس عموما اتغيرت معلش انتوا عارفين النساء بتفكر بطريقه مختلفه شويه وانا كنت عاوزه اركب سيدان لكن شكل البيجو الوحيده الهاتش باك اللي من فئتهم السعريه عاجباني انا عارفه اكيد في اعتبارات تانيه زي قطع الغيار

بس انا اولياتي الشكل والراحه في السواقه والفخامه وطبعا قلة المشاكل في العربية ممكن مساعده في الاختيار مع ذكر اسباب الاختيار

طيب هوا كدا فاضل أيه تاني ؟؟
الحاجات دي تخليني أقولك هاتي بيجو أو أي عربية أوروبي بس زيرو,
عشان تاخد الشكل والراحة والسواقة والفخامة.

أو هاتي بيجو أو أي عربية أوروبي أستعمال,
عشان تاخدي برضه نفس الحاجات بس هتصرفي عليها من وقت للتاني
لأن اي عربية في عمر البيجو موديل ٢٠٠٧ او ٢٠٠٨ يعني بقالها من ٦ ل ٧ سنين شغالة هتبدأ تطلب منك قطع غيار بجانب جدول الصيانة العادي.

جدول الصيانة العادي تغير زيت وفلتر زيت كل ١٠ الاف, وكل ٣٠ الف هتزودي فلاتر ومعاهم, وكل ٥٠ ل ٦٠ هتغيري سيور وبوجيهات.

أما قطع الغيار اللي ممكن تطلبها منك عربية موديل ٢٠٠٧ عموماً
أولاً شغل عفشة ودا ينطبق علي البيجو والكوري والياباني والصيني, وانا لسه عاملة قريب ومن غيرة العربية مكنتش مريحة ولسه عايز أغير حاجات لاني مغيرتش كل الحاجات اللي أتهلكت من طرقنا الحلوة,,
ممكن طلمبة بنزين وساعتها لو مش هتغيريها لي التوكيل ب ١٨٠٠ ل ٢٢٠٠ ودا متوسط الاسعار بالنسبة للبيجو والياباني والصيني,
ولو تعرفي ميكانيكي كويس هتغيري لها موتور بس هيبقي ب ٩٠ ل ٢٠٠ جنية.

آنتي محددتش عايزة تشتري ف رينج كام, بس من كلامك أنا أفضلك ال fsv لانها مش وحشة وموتورها تويوتا ياباني علي حد علمي وعفشتها حلوة مش زي باقي العربيات الصيني.
ممكن مش هتبقي مريحة ولا شكل زي البيجو, بس هيا المشكلة كلها إنك تلاقي بيجو نضيفة إنهارده ومش عاملة كيلومتر عالي.

لانك لو مجبتيهاش نضيفة وصاحبها كان مهمل في صيانتها او بيعملها صيانة عند ميكانيكي علي الرصيف.
هتكرهي نفسك واليوم اللي جبتيه فيها.
لو جبتيها نضيفة, ممكن تقعديها معاكي أكتر من ال ٥ سنين اللي بتتكلمي عنهم لان قطع غيارها بقت معقولة جداً وفي رينج العربيات الكوري والصيني.
بس البيجو قطع غيارها معمرة وأحسن في العفشة والثبات عموماً عن الصيني,

ولو عايزة تركبي سيدان وشكل ومتعطلش ولا تطلب قطع غيار ل ٣ أو ٤ سنين قدام,
ممكن تبصي عال بيجو ٣٠١ سعرها ممتاز جداً كعربية زيرو أوروبي ومواصفات مقابل سعر.

شوفي انتي معاكي كام وعندك إستعداد تتحملي مصاريف شوية لما تجيبي أي عربية موديل ٢٠٠٧ او ٢٠٠٨
ولا تدفعي ازيد وتجيبي حاجة ٢٠١١ او ٢٠١٢ وتصرف أقل لسنتين قدام.

المشاركة الأصلية كتبت بواسطة lilly

السلام عليكم معلش يا جماعه انا لسه عضوه جديده معاكم اولا ربنا يكرم الاستاذ محمود و مشكله عربيته ان شاء الله تتحل
انا متابعه المنتدى و قريت كل كلمه اتكتبت عن البيجو301 و معجبه جدداااااااااااااا بيه من حيث الاسم-الشكل-عوامل الامان اللى فيها و من تعليقكم على الموتور و التكييف و الثبات -و الحاجات دى انا مفهمش فيها كويس بس انا واثقه فى كلامكم-
انا ان شاء الله نويت احجزها و غالبا هتكون مانيوال بس بابا و اخويا بيحاولو يقنعونى اجيب كورى ذى الريو او الاكسنت ار بى على اساس ان اى ميكانيكى بيفهم فيهم على عكس البيجو اللى غالبا لازم تروح التوكيل و لو لا قدر الله وقفت بيا فى الشارع-سواء دلوقتى او بعد كام سنه- محدش هيفهم فيها و مينفعش حد يجيلى بميكانيكى علشان تقوم يعنى لازم تتقطر لحد التوكيل او مركز خدمه
انا مش عارفه هل وجهه نظرهم صح و اشترى الكورى ولا اتوكل على الله و اشترى البيجو فياريت يا جماعه حد يساعدنى انا فى الحيره دى بقالى تلات شهور و عايزه اخلص
و اخيرا انا اسفه انى تطفلت على موضوع استاذ محمود ده لانى مش عارفه ازاى اكتب موضوع على المنتدى
و شكرا مقدما

الكلام اللي انا حاكط لك تحتيه خط دا,, من الأسطاير اللي عملها الشعب المصري,
العربية مش بتقف في الشارع من غير سبب. وفيه ميكابسكية كتير بيفهمو في البيجو وشغالين في الجديد.

وأي عربية بتتعملها الصيانة الدورية مش هتقف بيكي في الشارع إلا في حالات شاذة.

مع العلم إن كل العربيات الجديدة سواء الكوري والياباني لو أوتوماتيك وكانت بعيدة عن البيت او مركز الخدمة لازم تتقطر لو المسافة أكبر من ٥٠ كيلو.
مركز الخدمة سواء توكيل او ميكانيكي (فاهم مش هيجرب علي العربية),

أي عربية جديدة بيكون ليها ضمان كا متوسط ٣ سنين او ١٠٠ ألف كيلو, وقطع غيار البيجو ٣٠١ الجديدة فيها حاجات أرخص من الريو كمثال علي دا الفوانيس الامامية وتيل الفرامل.
وعربية في العموم أمان أكتر من الكوري وبتنزل فيها كل عوامل الأمان أستاندرد مش أوبشن.

في عربيات كوري لحد إنهارده بتنزل من غير أيموبلايزر ولا abs ولا ٢ أيرباج.!

أخر حاجة انتي قلتي عايزة العربية مانيوال,, البيجو ٣٠١ مانيوال فيها إيموبلايزر و Abs+Ebd و ٢ أيرباج
الكيا الريو مفهاش ٢ ايرباج فيها واحدة بس,, ومفهاش Abs

البيجو ب ١٠٧.٩٠٠ جنية
والريو بكام عشا مش فاكر ب ١١٧ الف جنية تقريبا.؟!!

يبقي أيه ؟

ماشي انتي بتتكلمي علي عربية أستعمال وعربية جديدة.
أي عربية ستعمال هتصرف في أول سنة من أمتلاكم ليها نفس رينچ المبلغ اللي دفعتيه في الفورد وأقري الرد اللي كتبته فوق ل داليا.
انا لسه مثلاً عامل شغل ف العفشة ومخلصتش كل الشغل اللي فيها ومكلفني لدلوقتي ٢٠٠٠ جنيه ولسه عايز أعمل شغل تاني.

لكن العرببة الجديدة عموماً زي ال ٣٠١ مش هتطلب منك أي حاجة غير بنزين وزيت كل ١٠ الاف كيلو والصيانات العادية لحد ٣ سنين علي الأقل.

الشكر لله وربنا يكرمك ويوفقك في الأختبار,
وهبا ال ٣٠١ أفضل صفقة في السوق حالياً كعربية من ناحية السعر مع المواصفات اللي بتقدمهالك كعربية أوروبي.
وإن شاء الله يكون وشها حلو عليكي.

أبقي راجعي المشاركتين دول هيفيدوكي,

http://www.nilemotors.net/Nile/37955...post3875192082

http://www.nilemotors.net/Nile/38028...post3875200422