الموضوع: وعندك كمان مشكله في فتيس فانتازيا 2010 :(:(:(

المشاركة الأصلية كتبت بواسطة leitosr

ياباشا أنت بتقول العربية مش عاملة 45 الف كيلو,, تغير فتيس أيه دا اللي بيتكلم عليه ؟!!
أكيد مستبعد يعني, ودي ناس معندهاش ضمير مش عايزة تشتغل وتتعب نفسها في التشخيص وعايزة تقلب اللي قدامها,,

أنت عندك دلوقتي مشكلة في ضغوط الزيت جوا الفتيس,
ولو كان عيب فتيس, كانت العربية هتفضل مكلبشة طول الوقت, ومش هتمشي شوية كويس زي كا كنت نازل رايح للتوكيل وفي الغالب كانت العربية باردة عشان كدا مرزعتش ولاأخدت التالت,
وشوية هتلقيها بترزع زي ما حصل معاك..
لكن مش مكلبشة طول الوقت وفيه صوت مزعج مع المشي عشان نقول تغير فتيس,,,


وسبب مشكلتك تلات حاجات, الأولي الزيت يا أما نقص بشكل كبير خلي الضغوط غير كافية عشان العربية تاخد الغيارات بشكل طبيعي, وعشان كدا العربية بترزع معاك وبتاخد التالت عشان تعرف تمشيك ودا مود في الفتيس بيدخل فيه لما بيحصل مشكلة في ضغوط الفتيس عشان تعرف تمشي لأقرب مركز خدمة, وطبعاً بتبقي تقيلة ومش بتعدي السرعة 60 كيلو في الغالب,

السبب التاني الزيت نقص برضه بس أتمشي عليه كتير وهوا ناقص فأتحرق وعمل رايش ودا بيسد الفالفات وبيعمل الرزعة دي في العربية برضه بتاخد التالت عشان تمشيك,
وفي الحالة دي المفروض الزيت ينزل ويتغير بزيت جديد والفالفات تتنضف لو سليمة,
بس عندنا بنغير عشان منفكش ونركب تاني خصوصاً أنها في الغالب بتتضرر.

السبب التالت يكون عندك مشكلة في تبريد الفتيس ودي مستبعدة,
لأن مشاكل التبريد الفتيس بيكون شغال فيها كويس بس بيهيس في الغيارات, بياخد النقلات متأخر, أو لما بتقف العربية وتيجي تطلع تاني, الأر بي أم بيعلي ومتتحركش بعدين بتطلع برزعة,

والأرجح في حالتك إن الزيت قل, بسبب تسريب أو أي عامل تاني, وانتي مشيت عليه وهوا ناقص فأتحرق ودا طبيعي,
وبعد ما تغير الزيت وتشوف اللي نازل منها شكله عامل أزاي وفيه رايش ولا لأ, هتقرر ساعتها إيه اللي مفروض تاني يتغير زي مبرد الفتيس والفالفات تتغير ولا لأ.

وحتي في أي عربية سليمة بعد 40 ل 60 ألف كيلومتر تقريباً لو مشيت عليه من غير ما يقل بيتحرق برضه,
بس مش بيعمل نتش وترزيع و في حالتك بس هيعمل لأنه ناقص كمان.

شوف كدا مثلاً دا زيت فتيس أوتوماتيك نازل من عربية فتيسها سليم ومفهوش مشاكل بعد 40 ألف كيلو متر, شوف شكله عامل أزاي مقارنة بالزيت الجديد اللي كان فيها, واللي مفروض يتغيرلها.




http://www.nilemotors.net/nile/3874990107-post10.html

دا الموضوع
http://www.nilemotors.net/nile/35590...post3874980327

المشاركة الأصلية كتبت بواسطة leitosr

دي حاجة كمان تحطها في بالك اللي قالي عليها أستاذ أحمد أدهم,
بس في الغالب اللي بيخلي العربية تطلع عال تالت, وسرعتها لا تتعدي ال 60 كيلو متر في المشي,
بتبقي مشكلة ضغوط الزيت في الفتيس والألكترو فالفز,,

المشاركة الأصلية كتبت بواسطة leitosr

وعليكم السلام,
ودا كان المتوقع منهم انهم زي مانت قلت عليهم,,
عشان أنهم واضح انهم مكشفوش عليها اول مرة, لما جه وقالك انها سليمة,, وانت قلت له شوف الزيت.!
ربنا يسامحهم ,

وتعليقاً علي اخر جزئية المفروض لو الڤالڤات بايظة, هتخلف وتغربل الضغوط وهتدي أيرور.
دا المفروض بس مش شرط انها تدي دايماً أيرور,

بس انت المهم دلوقتي انك غيرت الزيت, ودي البداية الصح لعلاج المشكلة,
لان اي زيت في العمر دا في الغالب بينزل محروق وبيكون فقد لزوجته ومش بيتحمل الحرارة وبيكون السبب الرئيسي في مشاكل الفتيس واختلاف الضغوط.

واللي عليك دلوقتي انك تسوق عادي الفترة دي ومتقرصش عليه يعني علي مهلك ومتحرقش عليها,
وتشوف غيار الزيت دا هيفرق معاها في الاسبوع اللي جاي دا ولا لأ.

لو مفرقش نبدأ نكشف عال ڤالڤات.
لأن مينفعش تبدأ حل وتشخيص مشكلتك بتغير ڤالڤات وانت الزيت عندك فاقد لزوجته ومحروق.
ومفيش حاجة اسمها الڤالڤات بايظة ومش هتحس بالزيت, وألا مكنتش العربية مشيت بيك لما غيرت لها زيت وطلعت بيها من عندهم ونقلت غيارات بشكل طبيعي,
بصراحة لا تعليق عال هري اللي بيتقال. وحاجة مؤسفة في نفس الوقت ان الكلام دا من توكيل او مركز خدمة!

المشاركة الأصلية كتبت بواسطة leitosr

أنا رديت عليك أمبارح أول مرة بس كنت برة, ولما أنت كتبت الرد دا معرفتش أرد عليك,,
و meggieboy سبقني بالرد وماشاء الله عليه وضح كل حاجة ويمكن أحسن من ما أنا كنت هعلق علي كلام المهندس البطيخة دا,,

بس أنا كنت كتبت رد فعلاً,
ومكنتش كملته لما ميجي قام بالواجب ورد, فقت أكمله أنها وأحطة هنا,,


تعليقاً علي كلام البطيخة,,
بتكون مشحونه الكترومغناتيك.
ولو الزيت فيه مشكلة هيبوظ الشحنة بتاعت الفالفات.
وأنت مدتوش بضهر بأيدك وهوا بيقول الكلام دا وبيستخف بدماغك.؟؟؟!
لاحول ولا قوة إلا بالله,,




واضح إن الأخ أخدته الجلالة في نفسه, ووسعت منه العميلة, >>>

وأعتبرك زبون "أفندي" ومش هتفهم حاجة فقعد سوري يشتغلك بنظام فتي الميكانيكة بتوع زمان,,
والفتي بقي اللي يحسسك ويقنعك إن الموضوع كبير وخطير عشان تقوله طب والحل,
ألحقني أبوس أيدك الكلام دا كبير وانت اللي فاهم وأعمل الصح.!!



وأنت طبعاً بااشا بالنسبة له, وراكب عربية غالية ولو وقعت في المصيدة هايسموعليك ويقولو حلال الله أكبر
وهيغرموك علي قد ما يقدرو لأن بالمنظر دا, دي ناس معندهاش ضمير ولا يصح يتقال عليها مهندسين,!!



نيجي للمهم,
أولاً الڤالڤ أسمه ألكترو ڤالڤ او سولونيد ڤالڤ,
لا بيجي مشحون, ولا بيكهرب.!!!!
ولا الشحنة بتفضي,, ولا بنشحنة لنا بيفضي من بطارية إنرچايزر ولا عند بتاع بطاريات.!!


والڤالڤ بيكون راكب عال ڤالڤ بادي أو الهيدروليك ڤالڤ بلوك. اللي هوا مخ الفتيس زي ما meggieboy وضح,

والفالف بيكون الكتروميكانيال, وبنقول عليه صمام كهربائي بيستخدم للتحكم في ضغط الزيت داخل الفتيس,

بيوصلة شحنة كهربائية من الصمام الفالف بادي عشان يشتغل وساعتها يفتح ويقفل عشان يمرر الزيت منه ويختار الغيار المطلوب,, علي حسب ما الل ecu بتاعة الجير بوكس بتديلة الأمر هوا وباقي الفالفات اللي جنبة وبتنقل الغيارات علي حسب سرعة العربية, وعلي حسب دوستك علي دواسة البنزين.

لكن بقي لا بيجي مشحون,, ولا الشحنة بتفضي, ولا الرايش بيبوظ الشحنة,
وأنت لو بتغير زيتك علي كل 40 ألف كيلو وبينزل كويس مش محروق
ومفيش رايش ولا فيه نقص في الزيت يأدي لأنه يتحرق ولا فيه مشاكل في تبريد زيت الفتيس, ممكن متغيرش الفالفين دوول خالص,

إلا لما تحصل مشكلة في الفتيس من نقص زيت, ويتحرق الزيت ساعتها ويعمل رايش دا ساعتها ممكن يأذي البلوف وتضطر تغيرها.

هوريك مثال شكل السولونيد فالف عندنا في البيجو والستروين والرينو عامل أزاي,


ودا الهيدروليك بلوك, أو الفالف بادي, مخ الفتيس,
ولو تلاحظ في فالفين فوق لونهم مدي علي أبيض, والباقي عال شمال لونهم أسود دول خاصين بباقي الغيارات.
ومعظم المشاكل بتكون في أول فالفين عندنا ودول اللي بتغيرهم بتوع الأول والتاني والريفرس.

المشاركة الأصلية كتبت بواسطة leitosr

الفالفات لو سليمة ومتأذتش من الرايش, ممكن تطلع برة وتنضف هيا والهايدروليك بلوك,
وترجع تتركب تاني ومفيش بيبقي فيه أي مشكلة ودا بيفرق معاك في نقلات الفتيس بتبقي أنعم والسحب بيبقي أفضل,

لكن عندنا في مصر لأنعدام الضمير ودول تانية برضه, بيغير عشان يبيع لك قطع وياخد تمن القطعة ومصنعية التغيير.

مينفعش تحط حاجة مع الزيت الأوتوماتك في العربيات الجديدة, دا ممكن يبهدلك الضغوط ويعمل تفويت في النقلات,,
العربيات الأوتوماتيك موديلات التسعينات مثلاً ممكن يتعمل معاها الموضوع دا لما يكون الفتيس حالته صعبة والتروس مأذية, ساعتها في مواد بتنضاف مع زيت الفتيس عشان تحسن من النقلات والأداء.

ودي صور لواحد كان منضف الهيدروليك بلوك في عربية بيجو ومغير الفالفين,
وقال أن فتيس العربية رجع زي الجديد والنقلات أنعم ودا حقيقي, بس الموضوع دا عايز ميكانيكي فاهم وشاطر وعنده ضمير.

دي صورة للفتيس قبل ما يتفك هوا وكارتيرة الزيت,



دي الكارتيرة والزيت المحروق



دا الفالف بادي - الهيدروليك بلوك


ودا بعد ما أتشال من الفتيس,,



ودا هوا بيتنضف وبياخد حمام محترم,,:oc_sun1[1]:


وأخيراً دي بعد ما أتفك وأتنضف وأتنشف كويس, وهيرجع يتركب تاني مع زيت جديد ونضيف,





قارن بقي أخر صورة بتالت صورة, وشوف فرق النضافة بنفسك, اللي هينعكس علي الفالف بادي وحركة ولزوجة الزيت الجديد اللي أنت هتحطة في الجير بوكس بعد ما تنزل الزيت المحروق وتنضف بقيته من مخ الفتيس وباقي الفالفات والبلوك.

المشاركة الأصلية كتبت بواسطة leitosr

أولا حمدلله علي سلامتك,,
وكويس إن المشكلة راحت من غيار الزيت بس, :)
وأنك مخلتهوش يحور عليك ويلعب لك في الفتيس,, خصوصاً أنو واضح أنه مش فاهم هوا بيقول أيه ودا الأخطر من واحد يكون فاهم بس عايز يعمل شغل عليك ومش هيضرك.!

*كنت عايز أوضح حاجة بس أخير في أخر بوست كنت كاتبة مع أنه مش تبع أسكودا بس تصحيح لجزئية صغيرة فيه, وهيا معلومات عامة.
الفالفين اللي في أخر صورة مش بتوع الأول والتاني,
واحد بتاع الضغط الأساسي, والتاني بتاع ضغط الزيت اللي خارج من قربة الزيت,
main pressure modulation solenoid valve evm
converter pressure modulation electrovalve evlu

المهم أنت مبروك علي حل مشكلتك, وأديك عرفت سبب المشكلة دي لو حصلت تاني هيبقي من أيه وتبدأ بأيه,,
وأعمل حسابك تنزل الزيت اللي أنت غيرت بيه دا بعد 10 الأف كيلو وأخرك عليه 20 بس منصحكش تسيبة كتير,,
لأن مش كل الزيت المحروق بينزل لما تفك الطبة اللي تحت, ودلوقتي الزيت الجديد أتخلط القديم اللي نزل محروق وممكن يبقي فيه رايش جوا لسه من الزيت القديم المحروق,,

فعشان تحافظ علي الفالف بادي valve body والصمامات اللي فيه, تنزل وتغير الزيت كمان مرة وتحط زيت جديد كمان 10 الأف كيلو, عشان يبقي اللي أنت حطيته أتخلط بالقديم ونضف شوية ومع الغيار الجاي تنزل باقي اللي أتخلط بيه ومتحصلش عندك مشاكل تاني في وقت قريب.

وحاول تشوف مركز تاني محترم ويكون ثقة, غير المكان اللي كان فيه البطيخة اللي أنت قابلته دا.

المشاركة الأصلية كتبت بواسطة leitosr

دي صورة من كتالوج مش بتاع أسكودا بس دي الصيانة الدورية اللي لازم تتعمل عموماً في أي عربية جديدة,
ومش بتختلف كتير من عربية للتانية بالنسبة للزيوت كا موتور وفتيس وفرامل أو سائل التبريد.

مع ملحوظة تانية أن كل مياة التبريد اللي بنزل في العربيات الجديدة أسمها extended life coolant وبيكون فيها حاجة أسمها oat أختصار ل organic acid technology
المفروض المية تعيش 5 سنين قبل ما تتغير,, بس المية داخلة في تبريد التفيس الأوتو, ويفضل أنها تتغير بعد سنتين ل 3 سنين,
ولما تيجي تغيرها تتغير بالمية الأصلية بتاعة العربية أو المية الحمراء,,
لأن الخضراء القديمة غلط ومش oat زي الحمراء ومش مناسبة للعربيات الجديدة بالرادياتير الألومنيوم,
ومينفعش تخلط اللونين علي بعض إلا لما تعمل flush كامل لدورة المية.


أتمني مكنش طولت في الرد,,
وياريت أكون قدرت أوصل النقطة دي عشان مهمة.

رديت فا اوفيت
تسلم على الشرح الجميل و الوافى بخصوص مشكلة الزميل هنا فى القسم
تسلم و جزاك الله كل خير
بالتوفيق ان شاء الله و منتظرين من سياتك المزيد للمعرفة المعلومات القيمة و الجميل
شكرا للمرة الثانية
تحياتى بالتوفيق