تقرير مصور و تجربه قياده مرسيدس c250 م 2011 و مقارنه بال 316 F30

**horas3000** · 10-09-2013 03:33 PM

السلام عليكم جميعا
حمايا العزيز كان في اجازه مؤخرا و عربيته طلبت صيانه
و لان وقته كان ضيق فكلفني انا اقوم بالمهمه دي بعد ما سافر

العربية مرسيدس C250 موديل 2011 و عامله 12000 كيلو يعني عدت صيانه ال 10000 و ده اللي المفروض اعمله لها و تمت الحمد لله
طبعا انا انتهزت الفرصه لتجربتها (براحتي و لمسافه محترمه) و المقارنه بينها و بين ال 316 بتاعتي

العربيه طبعا 1800 سي سي تيربو بقوه 204 حصان و عزم 310 نيوتن/م و و فتيس اوتو عادي 5 سرعات بتحقق تسارع 0-100 في 7.5 ثوان و سرعه قصوي 240 كم

الشكل الخارجي كلاسيكي جدا خصوصا و ان العربيه قبل الفيس لفت
و بما ان حمايا مختار فئه الاليجانس فالشبكه الاماميه مزوده ده و جت الجنوط كملت الشعور ده
شخصيا بفضل الفيس لفت و الجنوط السبور اللي بالريش الواسعه

الانطباع المبداي اول ما ركبت حسيت ان الطبلون قديم بما ان العربيه قبل الفيس لفت
و بصراحه الفيس لفت و ال 3 طبلوهم احسن و اشيك و معجبتنيش فكره الغطا اللي بفتح و يقفل علي الشاشه دي

المساحه الاماميه كويسه و كل حاجه في متناول اليد لكن استغربت مكان زراير الشبابيك في ركن الباب كده و خدت وقت عقبال ما اتعودت عليه

في الركوب بقي بيلاحظ الراحه التامه المشهوره من مرسيدس
العربيه مريحه و الباور خفيف و سلس و التحكم في العربيه محتاج مجهود قليل
ال 3 قربت من الراحه دي بس لسه التفوق للمرسيدس
العزل في المرسيدس اعلي من ال 3 لكن مش بفرق كبير

الاداء بقي
العربيه المفروض انها اقوي من ال 316 بفرق محترم
و العربيه انا مجربها بعد الصيانه فالمفروض انها فايقه
لكن انا محستش بكده خالص
كاداء شايف ال 316 تتفوق خصوصا في التسارع ازاي معرفش
ال 3 استجابتها اعلي و التيربو لاج فيها غير ملحوظ عكس المرسيدس
التيربو لاج ملحوظ و بعد ما تدوس بنزين بيبقي في فتره سكون كده بعد كده تفاجئ بانطلاقه قويه
و حاولت اجرب التسارع من 0-100 بس الطريق مخدمنيش و بصراحه اشك انها تعمل الرقم المعلن ال 7.5 ثانيه دي
غير كده محستش بفرق كبير عند اختيار السبورت مود في المرسيدس
في ال 3 تغير وضعيه القياده بتفرق في العربيه جدا و بتحس انك ركبت عربيه تانيه

الثبات متقارب جدا بين الاتنين و ان كانت ال 3 بتحب الغرز اكتر
و عموما ال 3 بتحسسك بالاكشن كده لكن المرسيدس كالعاده بتلاقي نفسك ريلاكس و مش حاسس بحاجه

الفرامل بقي دي تفوق تام للمرسيدس
ال 3 فراملها كويسه جدا بس نظام توليد الطاقه الموصول بالفرامل ده بيديك احساس غريب كده و تحس الدواسه اسفنجيه شويه عكس المرسيدس اللي من اول لمسه تلاقي الفرامل معاك فورا

من الاخر ال c عربيه محترمه جدا
و منافس شرس لل 3 لكن ال f30 حسمت المنافسه في الوقت الحالي و ده طبيعي في ظل فرق الموديل
المرسيدس عربيه مريحه جدا جدا و انت جواها بتبقي معزول عن العالم الخارجي تقريبا و نظام التعليق بتاعها تحفه و مش بيحسسك باي من عيوب الطريق و خصوصا في مصر
عيوبها بالنسبه ليا انا كلاسيك حبتين (جايز ده بيختلف مع الفيس لفت و مع ال AMG كت تماما) و كاداء محستش بالفرق الكبير بينها و بين ال 316 و ده شيئ انا مستغربه جدا
و اكبر عيب بالنسبه ليا المساحه الخلفيه
ضيقه جدا و ده باين من الصوره اللي مصوها و باين المساحه الخلفيه و الكرسي الامامي مظبوط عليا و قارنوا بينها و بين ال 316
انا عشان اصور الطبلون ركبت ورا و رجلي اتحشرت و انا نازل و كنت هقع وقعه محترمه بس ربنا ستر

شخصيا شايف ال 3 تكسب لانها شبابيه اكتر و سواقتها ملائمه ليا اكتر
و لو المقارنه كانت جديه المفروض ال 328 هي اللي تكون قدام ال c250
و في الحاله دي النتيجه محسومه تماما لصالح ال 3
و التجربه ده اكدت ليا حسن اختياري و الحمد لله

و اخيرا اسيبكم مع الصور

المرسيدس

ال 316

في النهايه اتمني التقرير يعجبكم
و في انتظار تعليقاتكم

**hugan** · 10-09-2013 03:39 PM

هاتها انت بس
انا قابلها كده
ببطئها
بزرايرها
بشكلها الكلاسيكي
مرسيدس علامه الجوده

**horas3000** · 10-09-2013 04:10 PM

المشاركة الأصلية كتبت بواسطة hugan

هاتها انت بس
انا قابلها كده
ببطئها
بزرايرها
بشكلها الكلاسيكي
مرسيدس علامه الجوده

متغلاش عليك يا زعيم

المشاركة الأصلية كتبت بواسطة midnightman_74

هو موتور c250 نفس c200؟

ايوه هو نفس المتور لكن ال 250 اقوي 20 حصان و 40 نيوتن

**horas3000** · 10-09-2013 05:01 PM

المشاركة الأصلية كتبت بواسطة Mzeid

دة بيأكد وجهة نظري دائما.. المرسيدس عربية luxurious all the time و لكن الشكل دة بالذات شايف ان مرسيدس حاولت تزود الطابع الرياضي في ال C بس still عربية luxury و العكس في ال 3 بي ام حولوا يزودوا الجانب الفخم في العربية بس still عربية sporty
حتى لما بي ام طرحت ال m3 الاربع أبواب لايق عليها إنما مرسيدس ال amg كانت مش واخدة على الوضع الا لما نزلوا ال coupe

كلامك مظبوط و متفق معاك
و انا متشوق اشوف ال c الجديده عشان اعرف هيعملوا معاها ايه
هيروحوا sporty زي ال a class و لا هيحافظوا شويه علي الكلاسيكيه الفخمه بتاعتها

بس بلا شك ال AMG kit بتفرق في شكل ال C قوي و بيخليها sporty بجد

المشاركة الأصلية كتبت بواسطة Ahmed_Adham

حرام عليك اللي انت عملته في العربيه ده. ده انت خليت المرسيدس مش محصله 128 لاء وكمان ال 250 مش ال 180 مثلا. اصبر لما نشوف ال سي هتنزل عامله ازاي ولو اني بقول ان المفاضله بين المرسيدس والبي ام ترجع لطبيعه الشخصيه يعني واحد هيبقى ذوقه بي ام وواحد هيبقى ذوقه مرسيدس. وبرضه المرسيدس تحس انها عربيه لايزم حد يسوقهالك وانت تأنتخ فيها تعمل شغلك على لاب ولا تتكلم في الموبايل انما البي ام بتقولك "سوقني".

على فكره حبايبك نزلو دلوقتي ريفيو لل A Class ^^^

ليه بس
انا قلت ايه فهمك كده

هو بخلاف موضوع الاداء ده انا كنت عارف الفروقات بينهم مسبقا
لكن لما سقت ال c250 استغربت من ادائها بصراحه

و متفق معاك في اخر نقطه دي
و اعتقد ان تجربتي بتاكد ده

موضوع ال A Class لسه نازل بالفعل ههههههه
و هما مش حبايبي و لا حاجه بس انا كان نفسي اعمل زيهم من زمان
و عاجبني جدا انهم دخلوا EVO magazine معاهم

**inspiron** · 10-09-2013 05:28 PM

ربنا يبارك لك في عربيتك أنا من يوم ما نزلوا الـ f30 وأنا بحب شكلها جداً وعربية كل قرش باين عليها.

ولكن !!!!!!!

My Mercedes C250 cgi - YouTube

Bmw f30 316i 0-210 - YouTube

فمتقنعنيش مش هينفع خالص

**horas3000** · 10-09-2013 05:53 PM

المشاركة الأصلية كتبت بواسطة ahmed_adham

أصل بصراحه انت ظالمها في المقارنه. ال c الموجوده دلوقتي تتقارن بال e90 لكن معروف انك لما تقارنها بال f30 هيه خسرانه من قبل ما تبدأ تتكلم عشان كده بقولك اصبر لما ال c تنزل الشكل الجديد وساعتها ممكن يبقى فيه كلام بس برضه هرجع وأقولك هيه اذواق وصعب تقول دي أحسن من دي عشان دايما هتلاقي اللي غاوي بي ام واللي غاوي مرسيدس وصعب تقنع حد منهم بالعكس.

وبعدين مبتطفيش النور ليه وانت سايق يا جدع ههههههههههههه

انا فاهم طبعا
بس الواقع و السوق بيقولوا غير كده
و الناس بتفاضل ما بين ال w204 و ال f30
و انا كنت منهم و انا بشتري

و انا دايما بقول
المرسيدس لا يعلي عليها
لكن ال bmw اللي بتناسب اسلوب سواقتي اكتر

و عموما هبيع الاتنين علي اول ملف مقابل اي بورش :)

المشاركة الأصلية كتبت بواسطة inspiron

ربنا يبارك لك في عربيتك أنا من يوم ما نزلوا الـ f30 وأنا بحب شكلها جداً وعربية كل قرش باين عليها.

ولكن !!!!!!!

my mercedes c250 cgi - youtube

bmw f30 316i 0-210 - youtube

فمتقنعنيش مش هينفع خالص

صدقني مكانش في الكلام ده خالص
ده حتي الصوت مكانش كده ابدا
هل بقي عشان حمايا راجل كبير العربيه مش متفتحه كويس
و لا الاداء بيقل مع ال 92
و لا انا مش متعود علي العربيه
مش عارف بجد

-

-

-

-

الموضوع: تقرير مصور و تجربه قياده مرسيدس c250 م 2011 و مقارنه بال 316 F30

LinkBack

أدوات الموضوع

عرض

تقرير مصور و تجربه قياده مرسيدس c250 م 2011 و مقارنه بال 316 F30 - انشر الموضوع فى :

-

-

-

-

المواضيع المتشابهه

تقرير و تجربه قياده فولفو s60

تقرير و تجربه قياده فولفو s60

الكلمات الدلالية لهذا الموضوع

المفضلات

المفضلات

ضوابط المشاركة