الموضوع: أنت تسأل وإسـتـشـارى منتدى متسوبيشى يجيب

سؤال للمهندس طارق
ممكن حضرتك تقولي سعر دراع المساحات في الكريستاله بكام في التوكيل؟
وممكن برضو تقولي سعر موتور المساحات بكام بردو؟

السلام عليكم يا بشمهندس طارق
انا عربيتى لانسر موديل 2006 1600 سىسى مانوال و عندى مشكله فنيه فى الدبرياج و العربيه عامله 68000 كم . خرجت من الضمان من 8000 كم فاتت.

أولا العربيه ما فيهاش أى مشاكل فى الأداء وأنا اختبرت الدبرياج بأنى عشقت الغيار الخامس و العربيه واقفه و شديت فرامل و رفعت الrpm لغايه 6000 و رفعت رجلى من على الدبرياج مره واحده و اللى حصل انه الموتور اتكتف جامد و بطل.

ثانيا مفيش اى أصوات غير طبيعيه ناتجه عن الدوران و مفيش صوت للبليه اثناء الضغط على الدبرياج و عدم الضغط عليه أيضا.

المشكله بقه هى انى وانا بادوس على دواسه الدبرياج(حتى ولو العربيه مبطله) بأسمع صوت تزييق و طقطقه زى ما تكون سوسته دأره فى حاجه و بتريح و بأحسها فى صوره عضه خفيفه فى دواسه الدبرياج مع العلم ان دواسه الدبرياج ما زالت ناعمه تحت رجلى و الموضوع ده باحسه على خفيف و لكنه ملحوظ و الصوت ده ملحوظ جدا لو واقف فى منطقه هاديه و بيبان اكتر لو مبطل المحرك.

دلوقتى انا هقول لحضرتك الاحتمالات اللى أنا فكرت فيها يمكن تساعد فى تكوين رأى سليم:

1- شكيت أول حاجه فى ماستر الدبرياج العمومى اللى تحت رجلى انه يكون فيه حاجه عامله التزييق و الخشونه ده و لكنى لما وريتها لميكانيكى أثبتلى ان الخشونه و الصوت ده جايين من عند الديسك و الاسطوانه لما حرك الفرش بعيدا عن الماستر.

2-الصوت ده كده مش هيخرج عن 3 حاجات هى الفرش نفسه أو البليه أو الديسك نفسه وانا عن نفسى مستبعد الفرش لأنى اكتشفت ان ما فيهوش سسوسته ترد البليه عن الديسك زى العربيات اللى الدبرياج فيها بنظام الواير(وممكن تكون هى السبب) و الميكانيكى زيتلى الجزء اللى بيرتكز عليه الفرش من بره بعد ما شال كاوتشه التراب اللى على الفرش و ما حصلش تحسن و الميكانيكى قالى ان الصوت ده غالبا من سوسته الديسك نفسه خصوصا انه لاحظ بودره تيل كتيره جوه الحله بتاعه الفتيس و ممكن تكون هى اللى مخشنه حركه سوسته الديسك و على فكره العيب ده ما بيظهرش و العربيه بارده أبدا و لازم تسخن عشان تبتدى تحس بالمشكله!!!!!! بس اللى مخوفنى بقه ان الميكانيكى قالى انه فيه احتمال تكون ريشه من ريش سوسته الديسك اتكسرت و هى السبب و كان عاوز يحل الفتيس بس انا ما رضيتش لان العربيه ما اتفكش فيها حاجه قبل كده بالحجم ده و تعتبر لسه جديده و 68000 كم قليل قوى على عربيه يابانى ان يحصلها حاجه فى الدبراج (مع العلم انى باستخدم الدبرياج صح و مش بحمل رجلى عليه وانا ماشى أبدا) لأن الميكانيكى سألنى السؤال ده!!!!!!!

انا اللى مطمنى شويه ان مفيش حاجه اتكسرت ان و العربيه بارده المشكله مش موجوده نهائى و لو فيه حاجه مكسوره هتبقه ظاهره فى كل وقت و الموضوع مرتبط بمعامل احتكاك حاجتين مع بعض المعامل ده بيزيد مع زياده درجه الحراره (خصوصا لو البودره فعلا هى السبب)

المهم انا عاوز اعرف رأى المهندس عبد الجليل اذا كان العيب ده معروف أو متكرر بالنسبه له أو نادر و لو الحل مجرد نضافه للبودره اللى جوه الموضوع ده يتم ازاى من غير فك الفتيس و لو فيه احتمالات خطوره فى الموضوع أو تشخيص آخر يا ريت تقوللى.

استاذنا العظيم الفاضل استاذ طارق
كل سنة وحضرتك طيب
انا عندي سيارة لانسر 2001 ونظرا لارتفاع اسعار البنزين 90و 92
ابتديت احط بنزين 80 ليها
بعد ما عرفتها انها كربرتير عادي وليس انجيكشن
فهل دة ممكن ياثر علي اي حاجة في العربية
واية هي اضرارة وشكرا

إستاذى الفاضل المهندس طارق السلام عليكم ورحمةالله وبركاتة
سؤالى فى المدة المطلوبة لتغيير الزيت عربيتى شارك غيرتلهازيت وفلتر وهى عاملة 3000 ك حتى الأن والمفروض التغيير عند 10000ك والمدة دة تأخذ معى على الأقل سنة ونصف هل التغييرمرتبط بعدد ك مترات ولا زمن وميعاد الصيانة 10000ك هل يكون بعد سنة ونصف كثير ولا إية لأنى مش بإستخدم العربية كثير العربية خليجى بدون ضمان
شكرا

لدى لانسر 2006 وهناك شىء غريب لاحظته وهو عندما احرك الدريكسيون يمين او شمال والسيارة متوقفة صوت المحرك يرتفع ومؤشر الrpm يرتفع الى1.3 كذلك عند الضغط على بدال الفرامل اكثر من مرة يحدث نفس الشىء علما ان السيارة عاملة 23500 ك وانا منتظم في مواعيد الصيانة وارجو المساعدة في هذه المشكلة ولكم جزيل الشكر.

المشاركة الأصلية كتبت بواسطة gamal1b

لدى لانسر 2006 وهناك شىء غريب لاحظته وهو عندما احرك الدريكسيون يمين او شمال والسيارة متوقفة صوت المحرك يرتفع ومؤشر الrpm يرتفع الى1.3 كذلك عند الضغط على بدال الفرامل اكثر من مرة يحدث نفس الشىء علما ان السيارة عاملة 23500 ك وانا منتظم في مواعيد الصيانة وارجو المساعدة في هذه المشكلة ولكم جزيل الشكر.

هذا طبيعى جدا و لو عربيتك معملتش كده يبقه فيها حاجه غلط.