الموضوع: ..:: التقرير الشامل النهائى لتويوتا كورولا 2014 ::..

المشاركة الأصلية كتبت بواسطة hazem.elderwy

بص حضرتك، هاقول لك رأيي بمنتهى الأمانة...
أولاً، أنا نازل من 2012 elantra fully loaded.. واشتريت 2015 corolla full option وراكبها بقالي أسبوع تقريباً.
ثانياً، لازم حضرتك تنسى كل موديلات الكورولا اللي فاتت، لأن بجد 2014 و 2015 عربية تانية خالص!
ثالثاً، أحب ألفت نظر حضرتك إني أساساً ماكنتش حابب شكل الكورولا خالص، وبالنسبة لي (حتى الآن) الإلنترا لها الأفضلية من حيث الشكل الخارجي.. بصراحة اللي صممها عبقري.. وكانت أكتر حاجة مش عاجباني في الكورولا إكصداماتها والخطوط الحادة قوي اللي فيها (مسألة أذواق) فحاولت أتغلب على الحكاية دي بإني جبتها سوداء، علشان أقفل الخطوط دي وأكسر حدتها!
رابعاً، تابلوه الإلنترا ممكن يكون من وجهة نظر ناس كتير (أنا كنت منهم) أشيك.. يعني فيه حركات وبومبيهات وتقسيمات عاملة منظر حلو! لكني اتعودت بسرعة جداً على تابلوه الكورولا (هو دماغ تانية خالص).. ولقيتني معجب بيه كمان.
خامساً، واعتقد إن ده هو الأهم.. جوهر العربية.. العربية بصراحة ماسكة نفسها جداً عن الإلنترا.. بجد الفرق ملحوظ قوي.. بتركب تحس كدة إن العربية solid وراسية على الأرض، سواء في المشي جوه البلد أو على الطرق السريعة.. وثباتهاعلى الطريق أحسن كتير قوي.. وأهم حاجة إنك هاتسمع ناس بتقول لك إن التسارع في الإلنترا أحسن.. ده لأول مرة أنا سُقت العربية حسيت بيه فعلاً! لكن بعد ما تعرف وظيفة زرار sport وتجربه هاتعرف إن الكلام ده مش دقيق خالص.. هو بس اللي لاحظته إن صوت موتور الكورولا بيبقى أعلى لما بتستخدم وضع sport.. وأعلى من الإلنترا طبعاً.. بس الزرار ده أوبشن هايل في استخدامه، وعدم استخدامه... استخدامه بيديلك تسارع وعزم أحسن (لما تحتاج).. وعدم استخدامه بيوفّر لك في استهلاك البنزين بطريقة ملحوظة... قعدة الكورولا أريح بكتير من قعدة الإلنترا ومختلفة تماماً عن موديلات كورولا اللي فاتت كلها... عوامل الأمان (اللي ممكن ترجعلها في أول صفحة في البوست ده) تفوق الإلنترا بمراحل.. بجد مراحل!
الفتيس ال cvt اللي الناس لسة قلقانة وكاشّة منه، أنا مش حاسس إنه وحش.. ومقدرش أديلك رأي كامل عنه... محتاج حد راكب العربية بقاله كتير، ويكون أكثر خبرة مني.
صالون الإلنترا له الأفضلية طولياً.. لكن صالون الكورولا له الأفضلية عرضياً.. يعني في الكورولا لما 3 يركبوا ورا، يبقوا مستريحين أكتر من الإلنترا.. بس لما ترجع الكرسي الأمامي على الآخر، تلاقي المساحة بينه وبين الكنبة الخلفية في الإلنترا أوسع (بنسبة بسيطة)... شنطة الإلنترا أكبر من الكورولا ب 51 لتر.. فرق فعلاً كبير.. بس فتحة شنطة الكورولا أوسع من الإلنترا.
دركسيون الكورولا أنعم بكتير قوي عن الإلنترا، وبيتقل معاك لما السرعة تزيد.. ودي حاجة كويسة قوي... صوت السماعات أفضل بكتير قوي قوي عن الإلنترا... عزل الصوت أفضل من الإلنترا بطريقة ملحوظة... فرامل الكورولا أفضل بكثير، مع ملاحظة إن الفرامل الخلفية في الكورولا ديسكات (disc)، وفي الإلنترا قباقيب (drum).. وده بيعمل فرق كبير قوي في أداء الفرامل!
وبأمانة الحاجة الوحيدة اللي مش عاجباني فيها هي التعليق الخلفي لأنه دنجل بعرض العربية ساقط فيه المساعدين بالسوست (torsion beam) بس ده مش وجه مقارنة أصلاً لأنها زيها زي الإلنترا والسيراتو والأوكتافيا وكل العربيات تقريبا اللي في حدود 200 ألف جنيه!
الخلاصة يا باشا.. لو ميزانيتك تسمح، اتوكل على الله ومش هاتندم... ومبروك مقدماً، أياً كان اختيارك :)ض

أستاذ حازم : جزاك الله خيرا