الموضوع: الحمد لله على كل حال الـ 301 اتخبطت النهاردة

المشاركة الأصلية كتبت بواسطة LeitoSR

كنت عايز أضيف غلطة كمان علي غلطات علي الطريق, بجانب الوقف المفاجئ بدون النظر في المرايا الخلفية والجانبية والضغط علي زرار الأنتظار,,

>> أن لو أنا ماشي بجري علي الطريق, والطرق تلات حارات وأنا في الحارة اللي في النص,,
وكان فيه عربية نقل تقيلة مش باين منها الطريق أو عربية ماشية براحة في الحارة اللي في النص,
فا طبيعي أني هاخد الحارة اليمين أو الشمال وهعدي منها وأكمل طريقي عادي,, وممكن أرجع للحارة اللي في النص تاني لو لاقيت حد ماشي براحة علي اليمين أو الشمال أول ما أتخطاها,,

المشكلة اللي بتحصل في الحالة دي, أنك لما بتعدي العربية النقل اللي كانت ماشية بطئ في النص وتيجي ترجع للحارة اللي في النص تاني,,
ساعات بيكون واحد جاي بيجري من وراك وبيعدي نفس العربية بس من الناحية التانية وبيطلع معاك في نفس الوقت عايز ياخد الحارة اللي في النص عشان قدامة عربية تانية,, ودا أستحالة تشوفه في المراية لأنك أخرك تشوف العربية النقل اللي كنت بتعديها ولانه طالع معاك وجنبك في نفس الوقت وبنفس السرعة يعني النقطة العمياء بالنسبة لمرايتك,,
وأنتو الأتنين باصين قدامكم وداخلين الحارة اللي في النص في نفس الوقت,, وبتكون النتيجة ساعتها أن العربيتين بيحضنو بعض علي الطريق وبيبقي منظر مش لطيف لما بتاخد جنب العربية كله من أوله لأخرة,



فأحب أنوه إنو الموضوع دا بيتكرر علي الدائري كتير بما أنه سيرك كبير ومفيش قانون عليه,
ومش طريق سريع أدمي له قوانين وأشبه بالغابة,,

اللي يجي يعدي عربية نقل أو عربية ماشية براحة ماشية في وسط الطريق, يبص كويس كدا قبل ما يعديها لو في حد جاي من وراه وهيعديها معاه من الناحية التانية ولا لأ,,,

وبعدين وأحنا بنعديها لو لاقينا حد ماشي قدامها يمين أو شمال بطئ علي الحارة اللي أحنا أخدنها وفكرنا نرجع لنفس الحارة اللي في الوسط بعد ما نعديها,, لازم تبص بصة سريعة بجنب عنيك والبصة دي حاول تخليها تجيب الازاز الخلفي من عربيتك عشان تتأكد أن مفيش حد متهور جاي محدوف من وراك وعايز يدخل نفس الحارة معاك,,


أسف علي الأطالة, الموضوع دا شخصياً طير لي أكصدام خلفي قبل كدا,,
عشان كنت بعدي عربية من علي اليمين وواحد كان بيجري عداها معايا في نفس الوقت من علي الشمال,,
ولما رجعنا في نفس الوقت للحارة اللي في النص بس أنا كنت قدامه ومش بجري أوي وهوا كان غشيم عشان يخبطني من ورا وعشان ملحقش يلم نفسه,,
لأنه كان يأما هيخبط في اللي قدامة وهوا طالع بسرعة يا هيخبط اللي كان ماشي في النص ما بينا,,
فدخل في الحارة اللي في النص خطف وخبطني من ورا شمال,,


أه ومحدش يمشي يمين في الأماكن اللي فيها تجمعات ناس علي جنب الطريق مستنية سرفيس أو أتوبيس عشان ساعات الناس بتسرح وبتقف ف نص الطريق او بتفكر تعدي في جزء من الثانية,

والسواقين كتير بيفتحو الباب وهوا واقفين علي جنب الطريق, وبينزلو من غير ما يبصو وراهم,,

صح اوى الكلام دة و عن تجربة مع الميجان فعلا كنت هاخد عربية نص نقل جنب فى جنب لولا زودت بنزين جبت اخر الدواسة و رجلى تقريبا خرمت العربية فالعربية نطت لقدام و فاديتة و من ساعتها و انا كل ما اعدى عربية نقل ببص جنبى قبل ما ارجع تانى للحارة اللى كنت فيها و مش ببص فى المراية

كمان حاجة برضة، لو اتزنقت ورا عربية نقل و حاشت عنك الرؤية و هتخش يمين او شمال وبالذات اليمين عشان انت بترمى نص العربية تقريبا قبل ما تشوف اى حاجة، المهم تكسر حتة حتة عشان متلبسش فى حاجة واقفة او ماشية براحة فى الحارة التانية اللى انت رايحلها، و دى حصلت معايا فى الميجان برضة، جيت اطلع من نقل على اليمين دوست جامد و طلعت بسرعة و اول حاجة شوفتها انى داخل على نقل واقف، فرامل و رجوع شمال تانى على الاخر و الحمد لله ربنا سترها بمعجزة لان دية كنت هخش تحت النقل اللى واقف و ولا كان هينفع فيها Airbag ولا يحزنون، كان هيبقى بالسلامة انا و العربية

أخر حاجة، خدوا بالكم من الطوب اللى النقل بيحطوة على جنب الطريق ورا العجل لما بيقفوا عشان بسيبوة و يمشوا، ربنا ينتقم منهم، و دى الخبطة التانية عندى فى ال301، طوبة كبيرة و مشوفتهاش عشان كانت الدنيا بدأت تليل على الساعة 6 كدة و مخدتش بالى منها غير و انا هطلع عليها خلاص، كسرت بسرعة بص لبستها فى الكاوتش برضة و النتيجة كاوتش اتقطع و مقص اتعوج و جنط اتخبط. بالمناسبة خدوا بالكم من الكاوتش بتاع ال301 عشان المقاس دة مش موجود غير قليل جدا و دوخت على ما جبت فردة بدل اللى اتقطعت و الفردة ب 1050 جم !!!!

ربنا يكفينا كلنا شر طريقنا يا رب

المشاركة الأصلية كتبت بواسطة amrelsaqqa

اوباااااا واضح ان اللون ده بيجيب العين فعلا

انا عشان كدة سألت ع اللون لانى سلفر والعربية بتجذب عين الناس بطريقة رهيبة
الحمد لله على كل حال ، ووالله كلامك ده زعلنى اوى ، بس الحمد لله اهم حاجة انك بخير وربنا يجعلها اخر الخبطات لينا جميعا

هههه صح فعلا و كمان لو مشغل التكييف و صوت العربية عالى بيشد العين اكتر فبتبقى ماشى و تلاقى ناس متنحه للعربية كدة و تعديهم تبص فى المراية تلاقيهم لسة متنحين برضة، انا فى مرة كنت هركن و انزل اشوف اخ من دول و اقولة عايز اية بقى و كدة و اتخانق معاة عشان كنت لسة مخبوط قبلها بحاجة بسيطة و العربية لسة متصلحة و مرشوشة و كلة تمام فمكنتش طايق بصتة الصراحة لولا اللى راكب معايا حاشنى

المشاركة الأصلية كتبت بواسطة amrelsaqqa

ايه ده ، موضوع الكاوتش ده حصل معايا برضه !
لا حول ولا قوة الا بالله

اول يوم روحت بيها المنوفية وانا واقف قدام الجراج لسة هدخل الجراج لقيت العجلة اللى قدام يمين جت ع الارض ، نزلت لقيت قعر ازازة تخينة قطعت الفردة :( ورحت لواحد لحمهالى من جوة ، بس ما قدرتش امشى بيها كتير لانها في مكان زي الزفت والكاوتش بقى كأنه عامل بلونة ، ومقطوع اصلا جامد من برة .. وانا طريقى كله سفر ومش هينفع اركب عربية زيرو وانا مقلق منها كدة !


لما رجعت القاهرة ربنا سهل وما لفيتش عليها كتير ولقيتها هى بالظبط بنفس المقاس والنوع بتاع المانيوال والبيزلاين ( جود يير 185/65/r15 ) والفردة عملت 525 جنيه بالترصيص والتركيب ونتروجين اربع عجلات واكرامية للعامل


فكرت ان دى اخر عين ، بس للاسف جه الموضوع بتاع الخبطة ده

برضة، هههههه، بصرة يا ريس

المقاس بتاع الهاى لاين وحش جدا و نادر لدرجة انى ملقتهوش حتى فى توكيل hankook نفسة، مش عارف اية المقاس العجيب دة، مش عارف لية منزلهوش الاعرض R16 205/55 و اهو مقاس موجود و نازل فى ال307 و ال308 و الفردة سعرها عادى يعمل 700 جم تقريبا فى الانواع النضيفة و فى نفس الوقت يبقى اعرض على الارض و يزود الstability بتاع العربية!! انا كنت ناوى اغير للمقاس دة لما اجى اغير الكاوتش بس قالولى مينفعش، لو عايز تعرض الكاوتش يبقى لازم تكبر الجنط لمقاس اكبر

المشاركة الأصلية كتبت بواسطة haitham g

هى عربية حضرتك بتركن قريب من مدرسة المنهل

لا يا هيثم، انا بركن فى المعادى و فى جسر السويس، مدرسة المنهل دى فى مصر الجديدة مش كدة؟