الموضوع: تقييم الكارينز الجديدة كليا 2014

المشاركة الأصلية كتبت بواسطة masryxt

الموضوع دة كبير ويطول شرحة
اولا انا استفدت اية من تجربة امتلاك السيارات دي كلها بالتوالي مع اختلاف انواعها

الزيرو زيرو ولو صيني
وليكن من العربيات اللي انت اختارتها من بين اللي انا كتبتهم الكريسيدا
العربية كانت ممتازة ثبات استهلاك بنزين ممتاز
بس مقابل دة كان فيها مشكلة في السكاترا " علبة الدريكسيون" وانها فيها مشكلة ورحت شامبليون وغيرتها وبرضة كنت حاسس انها مش طبيعية
برضة الكاربراتير وكان الميكانيكي بيقولي كربيراتير نص الكتروني او كهربا مش فاكر
كمان ازرار الزجاج كانت بتعلق وباظت كذا مرة

المرسيدس من اكتر التجارب المريرة اللي مريت بيها مش لعيب في المرسيدس ولكن كان نصيبي كدةوتجربة خليتني بعد كم المشاكل اللي شفتهامعاها اني انزل في يوم واجيب زيرو في يوم واحد بغض النظر عن جاهزيتي للخطوة دي

ال بيجو ال307 جبتها بعد الكيا سبيكترا وكانت بالنسبة لي نقلة نوعية كبيرة زيرو و فخامة داخلة و كماليات حلوة واداء موتور مع عفشة ممتازة ووضعية قيادة لم تتكرر الا في الكارينز
المشكلة انها كانت بتتاثر بجودة البنزين بشكل قوي وكانت عاوزة بنزين اوكتان اعلي من ال 92 لانها كانت خليجي
اللي افتكرة انها كانت بتكركر في الطلعة بتاعتها زي المانيوال لما تكون جيب غيار مش مضبوط

الامبريزا كانت هاي لاين من اجمل التجارب قوة ثبات اتزان رقم 1 في جميع السارات اللي جربتها
واطية اعادة بيع في الارض انا كنت باحس اني معايا بلوة او مرض الناس بتجري مني ودة خلاني احاول بيعها في اقرب فرصة لما الاقي بيعة مناسبة وهذا ماحدث

الخلاصة

حقيقة رقم واحد
مافيش عربية بتجمع كل حاجة واللي يقول كدة واهم

حقيقة رقم اتنين
الماركات العالية طبعا ممتازة "بي ام - مرسيدس ..................... الخ"
اللي يقول عنها نص كلمة يبقي متجني او مش عادل في حكمة ولكن
مصاريف تشغيل عالية ولو فيها الهوا تفقد الكثير من قيمتها ولو مع حد مش مهتم بيها مش هاتبسطةوهاتبهدلة
تخيل معاك جزمة كلاركس هاتنزل بيها في الطين؟؟؟؟!!!!!!!!!
طب لونزلت بيها تنتظر انها هاتكون بنفس الرونق والمظهر
طب لوحبيت ترجعها زي ماكانت هاتوديها لبتاع الورنيش ابو صندوق اللي في الشارع؟؟؟؟؟؟؟؟!!!!!!!!!!!!!

حقيقة رقم 3

الاولوية في الشراء لكسر الزيرو 10000 كيلو اقصي حاجة هاتوفر كتيير والمالك الاول مش هايكون لحق بس تكشف طبعا قبل ماتشتري

حقيقة رقم 3
الكوري اختلف دلوقت عن زمان تكنولوجيا اعتمادية
انا راكب سيارة بالنسة للي ركبتة قبل كدة بتفكرني بال 307 ووضعية القيادة بافتكر جودة التقفيل الداخي" 80 %منها بافتكر الهدوء والعزل وجودة التكييف اول مرة ركبت ال 307 حسيت انها شيئ مختلف ومميز عن ماسبق قبل كدة واول ماركبت الكارينز واتعاملت معاها جالي نفس الاحساس تجربة مختلفة وشيقة

انا ركبت 3 اجيال من كيا
كيا سبيكترا 2004 بالنسبة للوقت بتاعها كانت مميزة جدا اعتمادية جدا اداء معقول جدا
كيا سيراتوا 2010 عربية مختلفة تماما دي كيا ودي كيا تانية خالص بس الاداء من ناحية العفشة تحس انهم ماتعلموش حاجة
الكارينز الجديدة كوم لوحدها لاني لاحظت انهم استفادو استفادة كاملة من خبراتهم السابقة واهتموا بكل التفاصيل
دي اللي فعلا تستحق لقب الجديدة كليا

عندي ملاحظة صغيرة عليها ان استهلاك البنزين بيتاثر بشكل كبير جدا بطريقة السواقة بتاعتك اكترمن اي عربية سابقة عليها
انا علي الزراعي وصلت ل 5.5 لتر لكل 100 كملما بامشي زي مخاليق ربنا بدون حرق او زحمة وبانتظام في السرعة

ولو بتقرص وتحرق وزحمة انسي السطر اللي فوق دة واتمني انك تنزل لقرب ال 10

اتمني اني اكون قربت الصورة ولو في اي سؤال انا تحت امركم ولو فية اي جديد او ملاحظة تستحق الاضافة هاحطها علي طوول
تحياتي

تقرير رائع من حضرتك أشكرك على مجهودك معانا
وباين من كلامك درجة اقتناعك الكبيره بالعربيه رغم استخدامك لماركات محترمه قبليها ودى حاجه ممتازه
ملحوظه : فى اوقات الزحمه اللى حضرتك تعرضت ليها ايه اخبار حراره العربيه الماتور وهل التكيف كان شغال وهل اداء التكيف كان ثابت ولا كان بيضعف

انا بشكر حضرتك على كل ردودك وعلى تعبك معانا وربنا يباركلك فيها

المشاركة الأصلية كتبت بواسطة masryxt

ربنا يخليك وصدقني ردودك بتسعدني
موضوع الاقتناع بالعربية هو فعلا اقتناع بزيادة بس بامانة تستاهل وكذا حد وقفني علشان يسألني عليها وهما معجبين بيها بالذات عند مدرسة الولاد

بالنسبة لحرارة العربية مافيش كيا انا ركبتها وفي اشد اوقات الحرارة وفي ازحم الظروف كانت فيها مشكلة
دايما معدل الحرارة ثابت في كل الاحوال واعتقد ان باقي الاعضاء هايايدوني في نقطة الحرارة دي

عمري ماقابلت موضوع الحرارة دة غير في الفورد والبيجو نوعا ما بالرغم من انها كانت زيرو وكمان المرسيدس

التكييف بالنسبة لي ممتاز في كل الظروف ماعدا لو بتحرق وانت سايق بحس انة الكفاءة بتقل اما في الزحام ماحستش بفرق ز
بس اوعدك اركز في موضوع التكييف واديك تقرير عنة في مختلف الظروف بس الفكرة ان الاداء الفعلي ماينفعش نحكم علية من حيث سرعة التبريد او كفائتة وقوتة الا في عز الصيف

مرة تانية انا تحت امركم في اي سؤال ولو فية اي جديد اناهاقولة اول باول

جزاك لله كل خير وربنا يوفقق

المشاركة الأصلية كتبت بواسطة masryxt

كل عام وانتم بخير

النهاردة انا سافرت للغردقة ووصلت من شوية بفضل الله

تجربتي مع السفر

اولا الاستهلاك فوق الممتاز 7.2طول الطريق بمتوسط سرعات 120 الربع, 160 -180 تلت المسافة وسرعات مختلفة باقي المسافة
الاستهلاك كان بتارجح بين 7 و 7.6 ومعظم الوقت 7.2 لتر\100 كم

ملحوظة هامة
الموتور دة مالوش حل بيجمع بسرعة جدا لحد 160 بعدهابيكون الاداء اقل

الصوت هادي جدا
العزل ممتاز
التكييف انا كنت سقعان وعاملة 24-25

الثبات
لحد 150 كم\ساعة والله الثبات ممتاز والتحكم دقيق ماحستش باي مشكلة "ماخلاص اتعودت عليها" بعدها كويس بس عن نفسي مش زي السيدان طبعا

مع ملفات الزعفرانة لم اعاني من اي مشكلة بالنسبة للاتزان او الثبات مع اني كنت سريع بس بعقل زي ماتفقنا قبل كدة

حصلت معايا مشكلة اني دخلت في سن مدبب منهم لله علي الطريق وانا علي 150 والكاوتش الامامي ضرب بس بفضل الله كنت قريت كذا موضوع عن ماذا تفعل في حالة انفجار الاطار الامامي
الموقف دة لم استخدم معة الفرامل فقط تشعيير بعد مابدات اهدي لحدماوقفت خالص
المفاجاءة ان الاستبن مش جنط لا فردة صغيرة شكلها يعر المهم ركبتها وحمدت ربنا وتوكلت علي الله
ملاحظة كمان الاستبن بينزل من تحت مش من قلب العربية
ربنا يسترها معانا جميعا

الحمد لله والف مليون سلامة
ومبروك عليك النيو كارينز ربنا يرزقك خيرها ويبعد عنك شرها
سؤالى عند انفجار الكاوتش العدد كان كام فى العربية كبار على اطفال علشان عاوز اعرف وزن العربية

المشاركة الأصلية كتبت بواسطة masryxt

الله يسلمك ويبارك فيك ويارب تجيب الافضل منها ويستجيب لدعائك الطيب
بالنسبة للعدد لما حصل موضوع الكاوتش انا والمدام وتلات اولاد كبار وواحد 8 سنين وكنت محمل شيل كتيير يعني ست كراسي مشغولين وواحد مقفول ومحطوط الشنط في مكانة
بس يجب ملاحظة التالي
انا باكون مركز في الطريق مهما بلغ طول المسافة
لما خبطت في السن المدبب كنت قاري الموقف من قبل ماخش فية علشان كدة لما الكاوتش انفجر تعاملت مع الموقف بهدؤ
وقبل كل دة اهم حاجة اني وانا باتحرك بالعربية باقرا انا واللي معايا اية الكرسي وادعية السفر حتي لو رايح مشوار 5 دقائق
بترمي كل حاجة علي ربك وهو اللي بيلطف ولا جدعنة ولا شطارة ولكنها اعقلها وتوكل
تقبل تحياتي واشكرك علي اهتمامك بالمشاركة

حضرتك كنت بالامس فى شارع الجزائر فى المعادى الساعة 2 او 2.30 الظهر