الموضوع: تجربة سيئة مع توكيل بيجو و السيارة 301

اكيد لازم تبقى تجربة سيئة طالما انت طالب المستحيل، بالعكس انا شايف ان التوكيل كده محترمين و هيغيرولك اللازم بحاجات اصلية بتاعة المصنع من غير ما يماطلوا معاك

يا سيدى الفاضل انا مقدر موقفك جدا وحاطط نفسى مكانك ، ولكن مش هينفع تغيير سيارة بالكامل عشان بلية دبرياج ، انا في الاول وعارف كدة ولكن مكنتش عاوز اصدمك من اول رد ، ولكن لازم نكون واقعيين

انا عارف انها غلطة ما تحصلش ، ولكن قدر الله وحصلت هنعمل ايه ؟ ودى حاجة بسيطة ممكن كان يحصل الاكبر منها ، حضرتك تحمد ربنا لان كان ممكن يظهر عيب خطير في العربية لا قدر الله وتكون حضرتك بتجري بيها ويحدث مالا يحمد عقباه ، فقضاء اخف من قضاء ، والحمد لله انها جت لحد كدة ، كل الموضوع اللى عندك ان بلية الدبرياج خشنة شوية ودى اصلا مش بتصنعها شركة بيجو ، (بس مراجعة العربية بالكامل مسؤوليتهم طبعا) ، ولكن عشان كدة في ضمان مع العربية ، الضمان مش بيبدل العربية بالكامل الا في حالة استحالة اصلاح العطل او الضرر الشديد على العربية وقيمتها من اصلاحه

زي مثلا لو كانت عربيتك فيها عيوب في الشاسيه او الزوايا او فيها بارومة مثلا في الشاسيه وتستدعى رش اجزاء في الدواخل ، اعتقد في هذه الحالة من كامل حقك التشبث بارجاع السيارة او استرداد قيمتها

انما في هذه الحالة ده عيب صناعة في جزء محدود مستقل بذاته من العربية وبسيط تنتهى المشكلة باستبداله ، وهيتغير بكل سهولة وهو في الاساس من القطع الاستهلاكية ومش معناه ان العربية مستهلكة او كأنه نصف عمرة كما حضرتك متخيل ، البلية ممكن كانت تتلف من طريقة سواقتك بعد 10 الاف كيلو مثلا ، فتغييرها لا يعيب العربية في شيء اطلاقا وحضرتك لو غيرتها في الضمان دلوقتى مش هتنزل من سعر العربية جنيه واحد


هو موقف يضايق انا عارف ، ولكن نصيحتى ليك ان ترسل الى الشركة الام في فرنسا ، وتطالبهم بما تريد ، وان وافقت الشركة على ذلك فسيكون من قبيل الحفاظ على سمعتها العريقة ليس الا ، واعرض ايضا مشكلتك على حماية المستهلك ، وان وافقوك الرأي اذا فتمسك به ...


كبرى شركات السيارات تويوتا وجنرال موتورز وفولكس جروب ظهرت في سياراتهم عيوب فنية وقاموا باستدعاء ملايين السيارات لاصلاحها ، ولم يحدث ان تم استبدال سيارة بالكامل لمجرد عطل في جزء مستقل من السيارة يمكن اصلاحه بسهوله

الناس حريصين على مصلحتك ووقتك ومش عايزينك تحط امال في حاجة صعب جدا تحصل وكان المقابل من حضرتك بدل ما تشكرهم على نصيحتهم انك قلت عليهم فتايين ، انا بعد كل ده مقدر غضبك وحاطط نفسى مكانك بس بقولك للمرة التانية كلام الناس صح ، وانت حاول برضه للاخر وربنا يوفقك ..