الموضوع: تحذير هام : من عصابة التكاتيك في ٦ أكتوبر ! { أنا أتسرقت } !!

الله يسلمكم ده موضوع كمان بس قديم
كنت كاتبو ومجهزوا بتاع جاري لمن اتسرق وكنت هنزلوا في المنتدى وبعدين قلت بلاش
وحفظتوا في المحفوظات عندي مع مواضيع كتير ( ملاحظة الكلام على ذمت الراوي)
يمكن اتكسف يقول ان مطاوي اتفتحت عليه زي ما حصل معايا وقال خرطوش بقول يمكن !

.تحذير هام : من عصابة التكاتيك في ٦ أكتوبر !
( موضوع قديم )


انا عارف انكم ممكن تدايقوا مني ... كل شويه بجبلكم الاخبار الوحشة ومعدناش نفتح مواضيع كوميدية زي زمان ( حقكم عليا سامحوني ) بس اعمل ايه بشوف حاجت بقول انقلها لكم. علشان تاخدوا الحيطة والحذرة وتخلوا بالكم من انفسكم ... المهم فاكرين زمان لمن حذرت كل زائر لاكتوبر ميسبش اي شنطة جو صالون العربية. لان بيجي عيل بتوك توك. بيرش مادة على القزاز بتاع العريبة. فيكسر القزاز من غير صوت ومن غير حس ولا خبر ويخطف الشنطة او الاب توب في ثواني !!



النهردة تحذير جديد موضة ٢٠١٣
صديق ليا. بيحب. كل يوم على المغربية يطلع يتمشى كده
رياضة ويادوبك وهو راجع بيتهم. ( يعني جمب بيتهم ) وكانت الساعه في حدود ٨ المغرب



حضن على الراجل توك توك. راكبوا اتنين



وكان الاتنين مقنعين وفي ايديهم على حسب كلام الراجل مسدس خرطوش



وقاموا بتثبيت. الراجل وتهديدو بالسلاح. وسرقوا منوا موبايل سامسونج جلاكسي بالاضافة للمحفظته الشخصية ... انا الحقيقة الراجل وهو بيحكيلي كان متئثر جداً. جداًً عارف الانسان الي تعرض للاغتصاب ... عارف لمن حد يدوس على كرامتك وكبريائك ويكسر كل حاجة جميلة وحلوة جواك ... عارف لمن تتثبت قدام بيتكم يبقى شكلك عامل ازااااااااي. ... عارف لمن تفقد الف بااااء. الامااااااااان في الدنيا ... عارف يعني ايه حد يهددك بالسلاح قدام بيتكم. ، يعني ايه هتقتلني علشان موبايل علشان محفظة هتموتني علشان عدة سامسونج !!!
اااه بالمناسبة الراجل الي اتثبت ده راجل مدير باحدى اكبر شركات المواد الغذائية في الشرق الاوسط. ... وأب لأربع اطفال لسه براعم وكتاكيت ... هل معقولة تصفي حيات انسان. علشان حتت موبايل جلاكسي !! انا كنت دايماً اسمع عن عصابة. التكاتيك انهم اي سورية بيركبوها معاهم طبعاً باعتبرها غريبة. ومش عارفه الطرق فبياخدوها لاي حي او اي شارع في حي يكون سكويتي ويقوموا ياخدو شنطتها. وينزلوها في الحته المقطوعه ... وكتير اتحكالي من بوق سوريات. بذات نفسهم وكانوا بيعيطوا مش على الفلوس الي في الشنطة لأ. بيعيطوا على جواز السفر الي في قلب الشنطة الي علشان يطلعوا غيروا لازم يروحوا للسفارة والسفارة مبتطلعش جوزات بسبب الاحداث الراهنة. . المهم ماعلينا. بس ماكنتش بصدق ... بس بصراحة بصراحة انا باستغرب فين الداخلية من الكلام ده كلو. ... هو الي بيعملوه التكاتيك في ستة اكتوبر ده مش ارهاااااااااااااااااب. !! التكاتيك بتعرض حياة السكان للخطر مش بس في التنظيم العصابي لأ اعتقد حتى الاعمى الي مفيش في دماغو مخ عارف ان توك توك لمن يمشي في الشوارع العمومية. وداخل عكس ومطفي نورو والشارع ظلمة اكيد هتبقى النتيجة حداثة ١٠٠٪. في اي عربية .

التكاتيك بتعدي على الكمائن وما بتتفتش. ... مع العلم انهم مسلحين وبعيني محدش قالي شفت بعيني. توك توك فتح مطوة على واحد في ميدان الحصري مرة. والمرة التانية شوفت كمان تكاتيك واقفة عند الحي الرابع امام سنتر رنين. الجديد واسواق الشركة السعودية بتاع التوك توك عاوز ١٠ جنية الزبون قالوا هما خمسة بس. اتلموا. سواقين التاكاتيك على الزبون واترفع عليه. مطوة. الراجل قالوا قطعني مفيش غير خمسه طبعاً زميلوا قعدوا يهدوه .. انا مش ببالغ. لمن اقلكم هيا التسعيره في اكتوبر. بقت كده٢.٥ او ٥ او ١٠ للمصرين و ١٥ جنية للسوريين



أشكال ضالة ... خارجة عن القانون ... مدمرة للمجتمع والدولة المدنية
ناس لا يحكمهم غير لغة الغااااب. ولغة السطو والسرقة والمخدرات ... طبعاً مش كلهم لمن راجل كبير او شب ٣٠ او ٣٥ او حتى ٤٠ سنة بيسوق توك توك اقولك معليش اهو محتاج ووراه كوم لحم ... لكن لمن اشوف عيال صغيرة واطفال سايقة تكاتيك عيالة شمامة طب دول وراهم ايه انشاء الله كوم لحم ولا كوم شلة فاسدة وعصابات. بتحكم الشارع المصري ... ولمن الدولة. بغض النظر عن اي احداث فيها. انتا بتتكلم عن مستقبل مصر. تصور لمن شباب مصر يسيبوا مدارسهم وكل وااد فيهم يروح يشتري توك توك قسط. ولا مدرسة. ولا امتحنات. ولا ديولوا ويكون عيل صغير ويطلعلوا ١٠٠ ولا ١٥٠ جنية في اليوم وخلاص على كده يبقى ايه مستقبل مصر. وانتا مطلع جيل بحالوا سواقين تكاتيك !!

وهيكبروا العيال دي. وهما سواقين وشماميين ويتجوزوا ويخلفوا وكل عيل فيهم هيخلف سواق توك توك وربنا يكرموا ويجيب لابنوا توك توك. وابن ابنوا كمان ويصبح الشارع المصري. لو مشيت فيه تيجي تتكلم مع اي حد تلاقي عقليتوا عقليت سواق توك توك واسلوبوا. اسلوب واحد بلطجي وهمجي ولمن تكلم اي واد حمار فيهم. يقلك لا احنا اعظم شعب في الدنيا احنا عندنا نجيب محفوظ. واحمد زويل وعندنا الهرم وابو الهول !!! ويسمعك اي هبل في الجبل واي كلام في اي كلام وهو اساساً اساساً ميعرفش احمد زويل اخترع ايه او بتاع ايه كل الي يعرفوا ان عندنا احمد زويل وخلاص ... فانا عاوز افهم ليه العيال دي ما بتتفتيش. نفسي اشوف قبضة حديدة عليهم نفسي اشوف سمعات السب وفر. الي مشغلينها في عز لحظات النوم. وفي عز الواحد وهو ساجد لرب العالمين ودول ماشيين. مشغلين. اغاني واطية زيهم ويهزو الارض بالبيز بتاعهم ... نفسي اشوفها تتمنع ... يا اخي ده في سنة من السنين في التسعينات كنا نروح اسكندرية الي يشغل صوت الكاسيت بصوت عالي في شارع خالد ابن وليد ولا المعمورة كانت تتسحب رخصوا على طول . فين الكلام ده النهردة !!!

اذا كنا عاوزين نبني مصر فالتكاتيك دي هتهد مصر ... وهتطلع جيل جديد بحالوا جيل جاهل وهمجي ميعرفش غير يدور المكنه ويطلع يقلب عيشو في قرشين لامحتاج يقرى ولا يكتب ..

( حسبي الله ونعم الوكيل )
واسف على الاطالة

@@@@@@@@@
وتحياتي

لا يابوحميد. وحياة النبي ما تدايق نفسك
ولا حد يدايق نفسوا ياشباب ... انا كل الي عاوزوا انكم تخدو بالكم .... كويس لان الوضع معدش زي زمان ابداً ... وعلى فكرة واحد قالي ان نفس الموضوع ده حصل معاه في المقطم بس بتاكسي برضوا وقفوه علشان يسئلوا على شارع فقرب منهم علشان يوصفلهم الطريق قاموا طلعوا مطاوي عليه ... انا مبقلش لوحد بيسئلك متدلهوش. لان كتير مننا بيحتاج حد يدلو ويرشدو على الطريق كل الي بقولوا محدش يوقع في الفخ ويقرب وهو بيوصف الطريق اوصف من بعيد لبعيد وعلي صوتك وكن حذر على الاخر وادي لنفسك مسافه. تهرب او تجري منهم متخليش المجرم يزنقك ويارب. يارب صحصح بتوع المباحث قادر ياكريم وصح صح. الشرطة قادر ياكريم ... ومش معقولة كل حاجة هنعتمد على الجيش يعني مش معقولة. الجيش هيجيب دبابات ومدرعات ويسيب شغلوا ويجي يفتش بتوع التكاتيك والموتسيكلات

واذا اربع او خمس عيال مسجلين خطر ماشين باسلحة في شارع عموومي
مش عارفين نمسكهم يبقى الغلبان الي زي حلاتي يستخبى في بيتهم ولا ااجر لي بدي جارد ... يعني احنا كل اتاكلنا على ربينا ثم على الشرطة. الي بتحمينا انا لو امشي واشوف بتوع التكاتيك والموتسيكلات موقفينهم وبيفتشوهم ذاتي. يمكن من جوايا ارتاح واقول لا واللهي اهو في امل ... بس لمن الاقي تكاتيك وقفة في اهم ميادين اكتوبر وبتمشي في شوارع عمومية في اكتوبر ومحدش بيكلمهم !!!