الموضوع: تحذير هام : من عصابة التكاتيك في ٦ أكتوبر ! { أنا أتسرقت } !!

الف سلامة عليك والحمد لله انها جت علي اد كدا

المشاركة الأصلية كتبت بواسطة horeen

الف سلامه لصاحب الموضوع
موضوع البلطجه والسرقه بالإكراه منتشر جدا
وللاسف
الشعب المصرى سلبى وإذا شاف واقعه بتحصل قدامه أقصى حاجه يعملها يطلع الموبيل ويصور للذكرى
أنا حصل معايا موقف مشابه وكانو فى عربيه نص نقل بدون نمر وزنقوا عليا
وكان معاهم فرد خرطوش ضربوا أول طلقه فى الهوا عشان أخاف منهم
العبد لله علطول ماشى معاه الطبنجه وعينك ماتشوف الأ النور والله مع أول طلقه كلهم سابو العربيه النص نقل وطيران بين العربيات
الظريف بقى الناس اللى شايفه الموقف
واحد عمال يصور وغيره بيشتم فيا ويقولى بطلو بلطجه وإفترا وكل واحد بكلمه
الحمد لله إحنا فى زمن قال عليه فيلسوف الغبره
الطيب فى الزمن ده يقولى عليه ضعيف ويتاكل
تذئب وإلا أكلتك الذئاب
والدى الله يرحمه كان كاتب حكمه ومعلقه فى مدخل البيت
رأيت الناس خداعا بجانب خداع ::: يضحكون مع الذئب ويبكون مع الراع

هي الطبنجة اللي معاك مرخصة وياريت لو حبيت ارخص طبنجة ايه الاجراءات وانا سمعت انها دلوقت شبه مستحيلة .

المشاركة الأصلية كتبت بواسطة mahmoudysf

الف سلامة عليك يا باشا
بالنسبة للكام ظابط دول كنت ممكن تقولهم فيه عيال في تكتك مشغلين ثورة دي ولا انقلاب وشايلين علامة رابعة وان انت بتقولهم عيب تغلطو في الثورة المجيدة قامو معورينك هتلاقيهم ساعتها في ثواني عملو اتصالاتهم وهتلاقي طيارت اباتشي ومدرعات وقوات خاصة بتدور على التكتك غير كدة مش هيتحركو

يااااااااه كنت ساعتها هتلاقى العساكر اللى لابسين نينجا ومدرعات وطيارات وفرقة السيل وال 777 والخمس خمسات كمان جايين من الفضاء وساحبين التوكتوك دة من وسط عياله

اولا الف حمد الله على السلامة يا عمدة و انا حاسس بيك ازاى الموضوع ده ساب جرح قد ايه و حاجة زى دى ممكن تغير بنى ادم من جواه لو هو ماعندوش تحكم جامد على نفسه و مبادئه و ايمانه بربنا و برحمته و انه يشوف الجانب الحسن للموضوع و ستر ربنا معاه و خروجه من الموقف ده ده يخليك تحمد الله و تشكره و تطلع حاجة لله

ثانيا الموقف ده ح يزعزع الامن الداخلى جواك و جوانا و كل واحد قرا الموضوع ده و ح يخليه يفكر الف مرة قبل ما ينزل يروح مكان و مليون مرة انه يروح للمكان اللى انت روحته ده و المشكلة ان الواحد لما بيروح كام مشوار و عدى عادى بيستبيع و بيتهور و بيبتدى يفكر بقى انه يمشى رياضه و ينزل من البيت على الفاضى و المليان و لاماكن صعبه و غير مأمونة لحد ما يحصل موقف زى كده و يا عالم يطلع منه سليم و لا لا قدر الله

ثالثا الموضوع مش موضوع امان و شرطة تشوف شغلها الموضوع اكبر من كده كتير دلوقتى شوف كام شركة بتقفل على كام مصنع بيصفى و انا عن نفسى اعرف كام واحد من اصحابى قاعدين فى البيت و انا عن نفسى الشركة اللى انا فيها بتترنح طيب عاوز ايه من واحد مالوش دخل تانى يصرف عليه او على اهله انا مش بدافع عنهم بس سألت نفسك هم خدوا الاكل ليه بعد ما لقوش معاك حاجة؟ اه ممكن يكونوا بيضربوا و بيحششوا و كل حاجة بس لو الحكاية ماشية معاهم حلاوة كانوا رموا الحاجة اللى مش مستهلة و ده طبعا غير اللى بيسرق و يثبت علشان شايف مثله الاعلى فى الافلام بيعمل كده

رابعا انا شايف اللى انت ما تستهونش بالغزة اللى انت خدتها لازم تكشف و تحلل علشان انت مش عارف ايه البلاوى اللى اتعملت بيها قبل كده

خامسا مع احترامى لرأى حضرتك انا مش شايف العيال دى مش بروفيشنال ولا حاجة علشان لو هم فعلا كده ماكنش خرجوا اربع علشان يثبتوا واحد بس و واضح ان لو ثبتوك بمكروبص كنت تلاقى اربعتاشر واحد رافعين عليك مطاوى و خصوصا انهم بيقسموا الغنيمة بينهم و كل و قل العدد كل ما يكون نصيبه اكبر متهيألى انهم هاديين بس علشان مطمنين ان الدنيا امان بالنسبة لهم و مافيش حد ح يقفشهم او يقبض عليهم حتى لو صرخت و كمان علشان المطاوى اللى فى ايديهم اللى مخلياهم حاسيين بموقف القوة و المتحمس اللى فيهم بيلعب الشرطى السيئ و هم الباقى الشرطى الطيب علشان انت تفدى نفسك و تديهم اللى معاك يعنى فكر فيها انت لو لقيت انهم كلهم هاديين ح تخاف ازاى؟ ده ممكن تتعرفوا على بعض و تعرف دوافعهم و ظروفهم و يصعبوا عليك بس وجود واحد زى ده مهم للرعب

الحل انا شايف ان احسن حل يبتدى بفتح الشركات و المصانع اللى اتقفلت و رجوع الموظفين تانى ليها و و توسيعها و فتح اخرى جديدة علشان باقى العاطلين و ما اظنش ان حد كتير ح يلاقى باب رزق حلال و امان يسيبه و يروح للحرام و خصوصا اللى بيسرق بيبقى عارف انه يا قاتل يا مقتول

انا شايف موضوع الشرطة و الامان ح يرجع تانى قريب علشان ده بقى مطلب شعبى و خلاص الناس جابت جاز و ما بقاش فيه قابليه للنقاش فى الموضوع ده بس امتى بالظبط الله اعلم

الخطوة اللى اهم من ده كله التعليم و رجوعه زى الاول و احسن علشان دلوقتى كل شايفه زى قلته و بيتجه للتجارة او اى حاجة تجيب فلوس لحد ما الموضوع ده يتسد بيبقى خلاص واقف فى نص السكة ما بيعرف غير الصنعة اللى اشتغلها دلوقتى و اللى خلاص اتقفلت و فى نفس الوقت اتقفل قدامه باب التعليم فبيتجه لاسهل طريق الا و هو البلطجة

على العموم ربنا يسترها معاك و معانا و يخرجنا من الدنيا دى على خير و ما تزعلش من اللى حصلك ده اللى ما يموتشى بيقوى و عهدى بيك اللى انت بتاخد الجانب الكويس من كل حاجة

تحياتى