الموضوع: أسوأ تجربة ليا في صيانة العربية مع مركز ماستر-مثبت بواسطتى لحين الفصل فيه-محمد طنانى

رأي في الموضوع دا كله انك اتسرعت في حاجتين ...
1- اتسرعت بإنك عايز تعمل الشغل دا كله في يوم واحد وانت حتي مش محضر حاجتها اللي هتركب ودا طول في الوقت و سبب مشاكل .
انا عن نفسي لما بروح أعمل حاجه في عربيتي بكشف في يوم و أعرف ايه الحاجات اللي هتتغير و تاني يوم بروح اشتغل علي رواقه عشان مافيش حاجه تعطلني ويبقي وقت و مجهود عليا وعلي الصنايعيه ع الفاضي .

2- اتسرعت عشان غلطت في أ/ محمد طناني قبل ما الموضوع يخلص ويحللك مشكلتك ودا لو ليك حق تبقي كدا ضيعته .

وبالنسبه للرد اللي انت بتقول انه هيبقي أخر تعليق ليك هنا ...

- انت اكيد بتقول كدا عشان تقف عند انك لسه ماغلطتش في طناني
عشان لو كملت كلامك هتغلط نفسك
بس طناني كمل الموضوع و كدا واضح انك انت اللي غلطان
سلام

المشاركة الأصلية كتبت بواسطة احمد فهمى

بسم الله الرحمن الرحيم
اوﻵ اعتزر عن غيابى والمشاركه ﻷنى من بعد العيد في ظروف مرضيه حرجه والحمد لله ربنا كرمنى واتحسنت والله الشافى ....
ثانيآ
اري انشقاق الاعضاء فى تقييم الوضع وهذا طبيعى لكلآ منا طريقته فى تقييم الأمور مبنى على خبرته فى الحياه وعمره .... حدوث الخطاء وارد فى اي مكان انا بعامل مقار ومنصور من 1999 وشفت كوارث بمعنى الكلمه وبالفعل حدث خطاء بشرى عند طنانى وهذا وارد وانا اعرف طنانى معرفه شخصه وهو شخص يعرف معنى الواجب والمبداء وانا على يقين وثقه ان طنانى قادر على نغيير سيارة كامله على حسابه لو اخطاء وليس صبابات او وش متور حتي ،،،،،، كما مقدر شعور الاخ صاحب الشكوى ﻷحساسه بنوع من الظلم والاستهتار ولكن تخذ الحق حرفه وله طرق وهذا مع الاغراب لكن مع طنانى لا تحتاج الا لمكالمه هاتفيه له بوصف التلف وكان سيقوم بالازم وانا على يقين بهذا ،،،، ولو لم يفعل لكان حقك ان تشتكى وكنا جميعآ سوف نقف جانبك ﻷسترداد حقك الادبى والمادى ،،،،،، يا اخي لا داعي للشتائم وسب الدين فهل لقطعة حديد نخسر اخرتنا؟؟؟ والمال يعوض الا الكرامه لا تعوض ....
لنقف جميعآ فى هدنه واعتزر للأخ صاحب الموضوع على حالته النفسيه ولطنانى على ما ناله من اهانه والحل ابسط من اي شئ فنحن بشر نخطاء ونصيب ...
الاخ صاحب الموضوع مطالب بأعتزار لطنانى على السب والاهانه فى موضوع منفصل
الاخ طنانى مطالب بأصلاح سيارة الاخ واعادتها كما كانت ان شاء الله
مع سبق الاعتزار للأصلاح وذلك لتسرع الاخ فى الحكم على طنانى واهانته.....
وان يكن نحن طرف فى الامر ادبيآ واتمنى ان يهتم الجميع بهذه المبادره
والله المستعان

أستاذ احمد
ألف مليون سلامة على حضرتك
وبغض النظر عن المشكلة الاصلية
ربنا يشفيك ، ويجعل مرضك في ميزان حسناتك ، ويحفظك من كل مكروه وسوء

السادة الأفاضل..
(تعليق وليس رد).. في نقاط وجيزة:

أولاً-
عندما انتويت كتابة الموضوع، لم يكن الدافع إلا نقل "تجربة" بشكل مجرد؛ لكون الصفحات الماثلة من المنتدى معتمدة هذا المسلك فيما بين أعضائها. وإذ أن التجربة تحمل عنوان "أسوأ تجربة لي في الصيانة مع (مركز) ماستر".. فكل الموجودين بالمركز لم يتحروا الدقة في عملهم – من وجهة النظري (وهي صائبة لما مررت به) – بشكل من الأشكال.. وهو ما نتج عنه ذلك المشهد الأليم الذي تمر به السيارة الآن.

ثانياً-
كلماتي تلك لا تدخل - بأي حال من الأحوال – في نطاق "الرد"، وإنما هي "تعليق" فقط على بضعة نقاط بهدف تصحيح معلومات مغلوطة سبق إثارتها.

بسم الله الرحمن الرحيم.. (ونبتدي بالعامية)

.... مسألة الاستعجال:
أنا مكنتش مستعجل تماما على أي حاجة.. وديت العربية الساعة 12 الضهر تقريبا بعد ما كلمت المهندس الموجود وقالي المركز فاضي تعالى دلوقتي.. سألته هتاخد وقت قد ايه في موضوع تغيير بلية الدبرياج.. قالي حوالي ساعتين مثلاً.. روحت وقعدت معاه.. لغاية الساعة 4 العصر (بعد 4 ساعات) وأخيرا فكوا البلية.. الولد عنده راح يدور على بلية ملقاش.. (على الرغم كنت قايله أجيبهالك وأنا جاي معايا من شمبليون قالي لأ).. اخدت انا البلية الساعة 4 العصر ونزلت شمبليون.. وبما اني مش ميكانيكي كلمته من هناك وخليته يكلم طارق حمودة يتفاهموا مع بعض على مسالة اطار البلية شكله مختلف.. ووسألت انا المهندس بعد كده: البلية دي اشتريها ولا لأ.. عشان مش عاوزين نتعب تاني.. رد على اجابة قاطعة: هات البلية ولا تشيل اي هم.. كنت في المركز قبل الساعة 6 (يعني في حدود ساعة ونص المشوار كلوا رايح جاي).
وبسبب اني مش فاضي وعندي شغل ومحاضرات وفيه طلبة مستنيني في الجامعة.. قولتله باللفظ: انا عندي محاضرتين وهخلص الساعة 10 اروح اديهم وارجعلك.. قالي: لأ، احنا قدامنا بالكتير نص ساعة.. قولتله انا عاوزك تشتغل براحتك لأني مش بحب اقف على دماغ حد وهو شغال عشان ياخد وقته وراحته في الشغل وكمان "لو هتغير السير النهارده ده هياخد منك وقت".. قالي لأ الموضوع كله مش هيعدي الساعة..
وأكدت عليه كذا مرة.. ونفس الكلام.. (وبسبب الموضوع ده انا اتحطيت في احراج كبير جدا مع عدد كبير من الطلبة المنتظرين)..
 يعني انا مكنتش مستعجل زي ما اتقال.. بل بالعكس كنت مديهم براح جامد وعاوز اوفرلهم أكتر.

.... مسألة الاسطوانة والديسك:
انا سألت المهندس والصنايعية أكتر من مرة.. (زيادة في التأكيد): أخبار الاسطوانة والديسك ايه.. لو انتوا شايفين حاجة نعملها ياريت عشان بحب اعمل الصح؟؟ قالولي: الاسطوانة والديسك زي الفل.. واحتمال نغيرهم بعد 60 ألف كيلو تقريبا.. سألت تاني: كده مش غلط ؟؟ قالولي: لأ كده فل جدا.. قولت تمام..
 يعني انا مرفضتش تغيير اسطوانة وديسك زي ما اتقال.. بل بالعكس.. سألت وأكدت كذا مرة والمركز قال تمام.

.... مسألة مسمار بلية الكتينة:
مش طبيعي نهائي اني اكون واقف في ورشة ولا مركز وامسك انا شاكوش ولا مفك واشتغل مكان الصنايعي او المهندس.. وعشان دي حاجة مش طبيعية فانا معملتهاش طبعاً.
المسمار مفكوك قدام عيني بالدق (انا شوفت الجزء الاخير من العملية دي).. ومربوط كمان بالدق (وانا شوفت كامل العملية دي)..
 النقطة دي بصراحة لا تعليق عليها .. لأننا ممكن نختلف في وجهات نظرنا (ودي حاجة طبيعية جدا) لكن مينفعش نختلف في وقائع حصلت قدامنا.

.... مسألة الماديات:
يعني هو اللي داخل المركز عشان يغير بلية كاتينة وسير.. وبيتأكد من حالة الاسطوانة والديسك عشان لو فيه حاجة نغيرهم .. ولو فيه اي حاجة في السكة اكيد هنغيرها..
أكيد مينفعش ولا مرة يقول "اصل انا مش معايا فلوس او فلوسي متكملش والجو ده"..
ولما استنكرت سعر سير الكتينة، ده مش بسبب اني مش عاوز اغيره طبعا (لكن لأن السير خامته فعلا مش كويسة وفعلا فيه زيادة جامدة اوي عن اي محل قطع غيار تاني).. (وأظن ان دي حاجة من حقي اني اعلق عليها جدا)..

.... ملحوظة هامة جداً بقى:
السادة كلهم مجتمعين على ان طناني انسان كويس ومحترم وخلوق وكل حاجة حلوة في الدنيا..
يا سادة يا افاضل.. انا معنديش اي اعتراض تماما تماما تماما على الكلام الحلو اوي ده..
لكن انا اتعاملت مع "مركز" المفروض اخد منه خدمة "مقبولة على الاقل".. ودي حاجة محصلتش..
انا تعاملي مع مركز اسمه "ماستر".. وطناني مهندس، ويمتلك هذا المركز..
بناء عليه: المسؤولية النهائية لأي اضرار تحصل في العربية عنده هو ،، حتى لو مشاركش في تصليحها.. ما بالكم كمان انه شارك!!!

........ نيجي لحل الموضوع:
.... كلمني مهندس من المركز من يومين.. وقالي نتفاهم ونصلح والكلام الحلو ده.. انا رفضت بشدة.. بسبب اني شايف – ومازلت شايف – ان الاضرار اللي حصلت اكبر من انها تخلي العربية ترجع لطبيعتها مهما حصل فيها من تصليح ... وده فعلا اللي انا قصدته لما قولت ان العربية كده "راحت".
وقولت للمهندس ان هاخد حقي.. (وتوضيحاً للجميع.. انا راجل لا مفتري ولا بحب الأذية .. واكيد طبعا مش بتاع "بلطجة والهبل ده" لأن الصفات دي اكتر الصفات اللي منكدة علينا كمصريين عيشتنا بقالنا فترة طويلة..

وبمناسبة "حقي"..
لما اقول اني هاخد حقي.. ده معناه: اني سأسلك الطريق الطبيعي الذي رسمه المجتمع من خلال خلق ادوات فعالة لحل مشكلات افراده والمحافظة على سلامته وأمنه، والتي منها "القـــــانـــــون"..
(انا عارف اني وصفت بزيادة.. بس ده عشان احاول اقرب لحضراتكوا طريقة تفكيري)..
المهم.. القانون هو الأداة التي يجب أن نلتزم بها جميعا .. سواء كان في ممارسة الحقوق الطبيعية.. وكذلك اتباعه في أداء الالتزامات المفروضة علينا.

والقانون وحده هو الفيصل.. إما بتقرير حق لي.. أو بإعتباري "مفتري".. (والكلام ده أظن أنه ميزعلش حد)..

اكمل بقى: (بس معلش هدخلكوا شوية في قصة مش بتاعتكوا خالص)
صديق وأستاذ فاضل جدا وبحترمه جدا جدا.. اتعملت على أيده حاجات كتير.. أتمنى من ربنا انه يباركله في أولاده وأحفاده..
كان معايا النهادره.. وعرف بالقصة الغريبة اللي انا بعيشها مع العربية بقالي فترة.. طلب مني وبشكل خاص جداً..
اني اسيب فــرصــة – ولو فرصة واحدة - للموضوع يخلص بشكل ودي...
(طبعا هو لا يعرف المركز ولا طناني ولا يفهم اصلا في العربيات والكلام الكتير ده.. لكن طلبه ده تأسيسيا على إيه: "إن البلد مش مستحملة الناس يشتكوا فيها بعض وان حيوات كتيرة جدا بتكون متوقفة على اي مشكلة بتحصل بين أي طرفين)..
ولأني بحترمه جدا.. كلمت المهندس اللي كان كلمني من يومين... وقولتله على الحالة النهائية اللي وصلت إليها العربية (أنها محتاجة وش كامل لأن الصبابات باي باي).. وقالي هكلمك بكره بعد ما اكون قعدت مع طناني ونشوف نقدر نحل الموضوع ازاي.. واجيلك وابص على العربية عند الميكانيكي اللي هي عنده. (طبعا لأني رفضت انها تدخل عنده المركز)

....* نقطة أخيرة:
يا سيد طناني.. انا اللي بيني وبينك شغل مش علاقات شخصية.. أما أنت لو ليك حق شخصي عندي .. أنا قولت للمهندس (وأكيد قالك) : على المستوى الشخصي اللي بينا أي حق ليك على راسي..

واديني بكررهالك: اي حق شخصي ليك عندي انا اشيلهولك على راسي، وكمان احايلك عشان تقبل بيه.. (ودي حاجة تهمني انا اكتر من انها تهمك)

لكن على مستوى الشغل.. المركز عند سعادتك مسؤول عن الأضرار اللي حصلت، ودي حقوق مادية مش شخصية..

ومهما المركز يقدر الحقوق دي بالفلوس .. مش هيعرف يقدر الضرر الحقيقي اللي العربية اصبحت فيه..


.... على جنب كده: (أصححلك معلومتين)..
انا مش من الطوابق خالص.. انا من "أخر أخر فيصل".. وقولت للمهندس عندك تشرفوني في البيت في أي وقت.. (وبنفسي اخدكم من المعادي)..
ومش من محافظة سوهاج خالص.. انا من محافظة قنا من نجع حمادي بالتحديد.. وتشرفوني هناك طبعا وأظن لما سألت ألف مين دلك.. واتعرفت على العائلة كلها..
والاهم من ده اتعرفت عليا انا شخصيا..



يا سادة يا أفاضل.. هذا ليس رد على اي منشور تمت كتابته من قبل بل هو تعليق فقط (وإن كان مطول)..