رسالة الى الاستاذ احمد امين LeitoSR بخصوص بيجو 3008

**mmohiey** · 13-11-2013 07:42 PM

السلام عليكم ورحمة الله وبركاته

مبروك استاذ احمد على الترقية فى المنتدى

انا قلت ارد على رسالتك هنا وتبقى موضوع احكى فيه تجربتى

انا كنت عملت موضوع هنا قبل كده عن مشكلة مؤشر الحرارة فى عربيتى البيجو 3008 ومادخلتش تانى غير مرة او مرتين ويمكن مادخلتش من وقتها ويمكن اول مرة اشوف الخناقة اللى حصلت فى الردود على الموضوع بتاعى غير النهاردة

ماطولش عليكم وباختصار وخلاصة تجربتى مع الوكيل هنا فى السعودية ان بتوع الصيانة مايفقهوش اى شئ هما فضلوا يجربوا فيها 3 ايام لحد ماجت معاهم بالصدفة لما غيروا طرمبة الميه ومن ساعتها وهى مظبوطة

هما فى الاول قالو ضغط الهواء زى ما احد الاخوة قال فى الردود لكن ده كان او مره اوديها الصيانة....وﻷن المشكلة ماكنتش بتحصل غير الصبح وانا طالع بالعربية لحد ما امشى بيها فترة المؤشر يثبت فما ظهرش ان العيب لسه موجود غير تانى يوم بعد استلام العربية من الصيانة وانا طالع بيها الصبح
لما رجعتها تانى قالولى سيبها وتعالى خدها اخر اليوم....اتصلت بيهم اخر اليوم قالولى لسه ماخلصتش وتعالى خدها بكرة على الضهر

رحت بكرة الضهر على طول كانت برضو لسه ماخلصتش ....... اخدتها على الساعة 4 العصر ولما سألت وشفت الفاتورة قالولى غيرنا الطرمبة بس انا طبعا مادفعتش حاجة ﻷن العربية لسه فى الضمان

اسف على الاطالة وان شاء الله اوعدك يا استاذ احمد اعمل موضوع تانى احكى فيه عن العربية عموما

**Ahmed Amin** · 13-11-2013 09:57 PM

وعليكم السلام ورحمة الله وبركاته. :)

الله يبارك فيك, وأنا مبسوط أنك قريت رسالتي وأهتميت بالموضوع وهتحكي لنا تجربتك وتعملنا كدا أول تقرير عن ال 3008 في المنتدي.

وعلي فكرة محصلش خناقة ولا حاجة هههههه,
دأنا وأبو يحي حبايب وأكتر من الأخوات كمان,, بس كنا بنحب نناغش في بعض كدا,
حتي أنا هبعت له دلوقتي عشان يجي يرحب بيك معانا هنا.

وكويس أنهم في الأخر عرفو يوصلو للعيب, ومفضلوش يجربو ويلطشو في حاجات كتير,,
كدا أحنا عرفنا منك لو حد أتكرر معاه المشكلة دي تبقي طرمبة المية يتكشف عليها مع الحاجات اللي قلناها في الموضوع دا,,
ودا كان لنك الموضوع القديم للي عايز يعرف المشكلة كانت عاملة أزاي بالظبط,,
http://www.nilemotors.net/Nile/340825-3008.html

وكمان دلوقتي أكيد أنت عرفت أنك ممكن تسأل هنا الأول عن سبب المشكلة وهتلاقي ناس كتير بتفهم أو بتقترح حلول أو تجارب مرت بيها قبل كدا,,
وأنت تتابع الردود قبل ما تروح التوكيل, وإن شاء الله تلاقي ردود تساعدك عارف أيه اللي تركز عليه قبل ما تروح لهم عشان ناس كتير أشتكت منهم فعلاً أنهم علي قدهم في التشخيص..

أهلا بيك مرة تانية,,
ومستنينك بقي في التقرير الحصري بتاع ال 3008 وأنطباعك عنها من يوم ما جبتها لحد أنهارده.

**ALshahba** · 14-11-2013 10:03 AM

3008 تحفه منسيه

**Ahmed Amin** · 14-11-2013 02:56 PM

المشاركة الأصلية كتبت بواسطة ALshahba

3008 تحفه منسيه

فعلاً وعشان كدا أنا بعت له لأني مهتم جداً أني أعرف عنها أكتر,,

تقريباً العربية ملهاش ولا تقرير أو كلام عنها في المنتدي مع أنها عربية ممتازة جداً,,
يعني سعرها في فئة عربيات زي الأسبورتاج والقشقاي ومن وجهة هيا أفضل منهم في التصميم الخارجي, و التصميم الداخلي للطابلوة والكابينه أفضل بمراحل,,
وطبعاً الأوروبي في الراحة والأمان مش هحكي عليه,,

القشقاي تصميمها الداخلي بسيط جداً عن البيجو خصوصاً في الطابلوة,, وسعرها مبالغ فيه وقطع غيارها في التوكيل أغلي من البيجو,,
كمان الأسبورتاج دلوقتي سعرها عدي وبقي أعلي من ال 3008.!! وزيادة الأسعار الأخيرة للأسبورتاج مش مبررة خصوصاً إن مكنش فيه حاجة جديدة زادت في العربية

فعشان كدا عايزين يبقي ليها مواضيع وتقارير عشان لو حد فكر يشتري أو بيقارن ما بينها وما بين العربيات اللي في فئتها السعرية يلاقي مواضيع عنها يقراها وهوا بيقارن,,

وعشان كدا بطلب من أي حد في المنتدي يلاقي حد معاه 3008 معدي من هنا يثبته,

ويخليه يكتب عنها ويعمل لنا عنها موضوع.

**Ahmed Amin** · 14-11-2013 03:04 PM

المشاركة الأصلية كتبت بواسطة ahmed sa3ed

ياريت يا استاذ LeitoSR لو شويه تفاصيل كمان واخبار ال 508 مع الناس ايه بعد تجربه سنه ونص دلوقتى ياريت يتعمل موضوع لل 508 :

والمواضيع القديمه كلها قرتها

إن شاء الله دا اللي هنعمله الفترة اللي جاية, أننا نظبط المواضيع بتاعت العربيات الجديدة من بيجو اللي في السوق زي ال 508 وال 3008 وال 308 وال 301

ال 508 زي مانت قلت ليها مواضيع كتيرة هنا ممكن الناس تقرأ منه,
بس ال 3008 ملهاش ولا موضوع, عشان كدا هركز عليها الأول لأنها هيا عربية ممتازة كسعر وهيا بتبدأ من رينج 200 ألف.

بالنسبة لل 508 أحنا معانا أستاذ أسلام eleanor معاه ال 508 بقالها فترة ممكن يبقي يعملنا تقرير تاني عنها,, وأعتقد أنو متابع كويس معانا هنا وممكن يقرأ الموضوع دا ويرد علينا,

وإن شاء الله أبقي أبعت لأستاذ أحمد فهمي يعملنا تقرير تاني عنها, بس هوا كان برة مصر الفترة اللي فاتت.
http://www.nilemotors.net/Nile/291613-508.html

**horas3000** · 14-11-2013 03:53 PM

ده تقرير سريع كنت عامله في منتدي زميل من فتره كده عن ال 3008 اول ما نزلت الكويت
و كان موجود هنا علي المنتدي بس مش لاقيه

اولا العربية تندرج تحت تصنيف الكروس اوفر و الاتي بعض من مواصفتها حسب الموديل المعروض في التوكيل

المحرك: 1600 سي سي تيربو 156 حصان
الجير: 6 سرعات تريب ترونيك

الكماليات:
-سقف بانوراما
- Head up display
-حساسات امامية و خلفية
-جنوط 17 انش
-فرامل يد الكترونية
-7 فتحات تكيف
-فرش مخمل اسود

ده اللي فاكره و الباقي ياتي تباعا لو افتكرت حاجة تانية

الانطباع:
شخصيا انا شايف العربية شيك جدا و التصميم بتاعها من اروع التصاميم الفرنسية
الخامات المستخدمة و جودة التقفيل لا يعلي عليها كما عودتنا بيجو و الطبلون المقتبس من اودي هايل بصراحة
المساحات الداخلية ر باس بيها و تلبي احتياجات معظم الناس
المساحات التخزينية داخل العربية كتير جدا و متنوعة بذكاء
المحرك واضح انه قوي و شايف اكتر من كافي للعربية

اتركم مع الصور

**Ahmed Amin** · 14-11-2013 04:09 PM

الله ينور يا حورس باشا,
بتجيب دايماً من الأخر أنت,,

أنا دورت ولاقيت اللنك أهو,,
http://www.nilemotors.net/Nile/150806-3008.html

وإن شاء الله نبقي نحط كل اللينكات بتاعت التقراير دي مع بعض في موضوع مثبت عشان العربية فعلاً جميلة وتستحق الأهتمام بيها.
وأنا متفق معاك في النقط اللي أنت ذكرتها في أنطباعك عنها دي,,
وكنت بقول نفس الكلام لكل اللي يسألني عليها,,

المشاركة الأصلية كتبت بواسطة horas3000

شخصيا انا شايف العربية شيك جدا و التصميم بتاعها من اروع التصاميم الفرنسية
الخامات المستخدمة و جودة التقفيل لا يعلي عليها كما عودتنا بيجو و الطبلون المقتبس من اودي هايل بصراحة
المحرك واضح انه قوي و شايف اكتر من كافي للعربية

**horas3000** · 14-11-2013 04:16 PM

المشاركة الأصلية كتبت بواسطة leitosr

الله ينور يا حورس باشا,
بتجيب دايماً من الأخر أنت,,

أنا دورت ولاقيت اللنك أهو,,
http://www.nilemotors.net/nile/150806-3008.html

وإن شاء الله نبقي نحط كل اللينكات بتاعت التقراير دي مع بعض في موضوع مثبت عشان العربية فعلاً جميلة وتستحق الأهتمام بيها.
وأنا متفق معاك في النقط اللي أنت ذكرتها في أنطباعك عنها دي,,

وكنت بقول نفس الكلام لكل اللي يسألني عليها,,

طب عفارم عليك انك لقينه
انا قعدت اقلب في مواضيعي اني الاقيه اختفي
و انا ما زلت عند راي بخصوص الانطباعات
اللهم الا ان الشكل ابتدي يفقد رونقه بعد مرور الزمن
و اعتقد ان بيجو لازم تجددها خصوصا بالمود التصميمي الجديد زي ال 208 و ال 308
و ان كنت اعتقد ان دورها ممكن ينتهي بنزول ال 4008 خصوصا في مصر

**Ahmed Amin** · 14-11-2013 04:31 PM

المشاركة الأصلية كتبت بواسطة horas3000

طب عفارم عليك انك لقينه
انا قعدت اقلب في مواضيعي اني الاقيه اختفي
و انا ما زلت عند راي بخصوص الانطباعات
اللهم الا ان الشكل ابتدي يفقد رونقه بعد مرور الزمن
و اعتقد ان بيجو لازم تجددها خصوصا بالمود التصميمي الجديد زي ال 208 و ال 308
و ان كنت اعتقد ان دورها ممكن ينتهي بنزول ال 4008 خصوصا في مصر

فعلاً تصمايم بيجو كلها سابقة وقتها,,
حتي من أيام ال 505 تصميمها كان سابق وقتها بكتير,,
وال 406 وال 307 أول ما نزلو كانو تحفة,
والله أعلم لو هينزلو Facelift لل 3008 ولا لأ, يعني في خلال السنتين اللي جايين هيبان,

وفيه كمان ال 2008 الجديدة جنب ال 4008

مش عارف في حاجة منهم هتحل محل ال 3008 ولا هيبقو جنب بعض التلاتة,