الموضوع: أسباب تشحيم الكبالن

المشاركة الأصلية كتبت بواسطة ahmedezzat78

الامركه بتخلى الاكس يتعصر ......... يعنى ممكن يتكسر قطم خيار (بلغة الميكانيكيه) ده لو خامته و حشه لكن اعوجاج الاكس ده نتيجه صدمات جانبيه

دكتور لانوس اعتقد ان الكلام ده متفق مع راى مهندس سبعاوى لكن مبسط يعنى خامته وحشه معناها عيب تصنيع و لو قرات المشاركات من اولها هتلاقينى قولت ان العامود صعب يتعوج او يتكسر

و على فكره : مره صبى ميكانيكى حمار رفع العربيه 128 اللى كانت معايا من اكس الكوبلن الطويل ......... و فعلا اتعوج و بقى غير متوازن اثناء الدوران

المشاركة الأصلية كتبت بواسطة Dr_lanos

دلوقتى لقيت عمود مكسور عندك علشان تثبت لنا حاجة غلط و خلاص سبحان الله للاسف انت مش صادق و بتعاند فى الخطأ لان اللى بتقوله دة مستحيل يحصل و اتحدى اى واحد بيفتى ان عمود الكوبلن يتعوج او يتكسر زى ما بتقول انا قولت ان دة مش عمود بسكويت علشان يحصله كدة و فى ناس هنا فاهمة كويس جدا قالوا نفس كلامى منهم المهندس ممدوح و بيونتر

المشاركة الأصلية كتبت بواسطة Dr_lanos

انا مستعد اطلعلك فتاوى كتير جدا غلط من اقدم اعضاء بالمنتدى و الموضوع ميتحسبش بكتر المشاركات و الدليل على كدة ان فى دكاترة كتير فى المنتدى مشاركتهم اكتر من الاخ حازم و معندهمش فكرة عن ميكانيكة السيارات و لا يقدروا يفتوا فيها لكن الموضوع دة بالذات باين من عنوانه زى الشمس لان اللى بيقوله الاخ حازم مستحيل يحصل و اتحدى و دة مش كلامى لوحدى و اذا كان هو صادق يبقى الفيصل بيننا انه يصور العمود المكسور اللى عنده بالموبيل و يرفع الصورة على المنتدى و يثبت لنا صحة ما يقوله اذا قدر اظن كدة عدانى العيب

احنا هنا فى منتدى للمهتمين بالسيارات مش منتدى لمحترفى السيارات يعنى من الطبيعى جدا انك تلاقى تفاوت فى قوه و صحة المعلومات و الخبره بين اعضاء المنتدى ......... و طبعا هدف المنتدى هوتبادل المعلومات و الخبرات للافاده و ليس الهدف هو ترقب اخطاء الغير (لو اخطا) و الرد عليه بعنف

يعنى اسمحلى حضرتك بتتكلم بتحدى واضح جدا (الكلام ده مش صح و اتحدى و اذا كان صادق و انت مش صادق و يا ابنى ...........) وده اكيد شيء يسبب احراج العضو المشارك

ممكن تكون انت صح و توصل المعلومه بهدوء لكل افراد النتدى ليستفيدو من خبرتك فى عالم السيارات بدون احراج احد الاعضاء او الاستعراض عليهم او انك تحسسهم بجهلهم

يعنى احمد زويل لما بيطلع فى مؤتمر او ما شابه بيبسط الموضوع للناس عشان يفهموه و مش بيوصلهم احساس انه عالم نبغة و همه جهله متخلفين

ارجو ان تكون و جهه نظرى وصلت و نتمنى انك دايما تفيد اعضاء المنتدى بخبرتك و خاصى فى الدايو

و كل عام و انت بخير

كلام سبعاوي فعلا قدر يعبر عن حاجات ما كنتش قادر أعبر عنها و جاوب عن سؤالي اللي ما كنتش لاقيله إجابه

كل مرة بيفكرني اني دكتور مش مهندس

تحيا الهندسة و علوم خواص المواد

المشاركة الأصلية كتبت بواسطة sab3aawy

الأمركة عمرها ما تعوج عمود كوبلن

الأمركة واحمال القيادة عموما بتحط على عمود الكوبلن حمل عصر torsion ، والعمود لكى ينعوج يحتاج الى حمل ثنىbending وهو ما لن يحصل عليه سوى من الأرتطام بشئ صلب اسفل السيارة (حجر، غطاء بلاعة ....) كما ان الخامة المصنوع منها العمود(صلب كربونى عالى الشد) تتحمل احمال عصر اكثر بكثير من الأحمال اللازمة تثبيت الكاوتش مع الأرض واكثر من الحمل اللازم لتفويت مشرشر العمود، وبالتالى فلا مجال لأن ينكسر العمود سوى لو كان فيه عيب صناعة، ومن المستحيل فيزيائيا ان ينعوج بسبب الامركة، الأمركة قد تتلف الكوبلن او صلايب الكوبلن او تفوت مشرشر العمود(وليس من مرة واحدة ولكن بدوام التكرار) لكن من المستحيل تماما ان تعوج العمود، ما يعوجه هو الارتطام بشئ بارز من الأرض

العلم الذى يهتم بهذة الأشياء يسمى علم تحليل الاجهادات ويدرسه كل طلبة الهندسة وخصوصا الهندسة الميكانيكية والمدنية، وان كان يدرس سريعا لطلبة الأقسام الأخرى تحت اسم (علم المنشآت) ، وبدون الدخول فى تفاصايل معقدة فأن الاحمال الواقعة على اى شئ فى الدينا يمكن تقسيمها الى مجموعة انواع اساسية ، يتم تسمية الحمل باسم الحالة التى يمكن ان يصل اليها الجزء المحمل فى حاله فشله فى تحمل الحمل، بمعنى ان حمل الشد سمى كذلك لأن الجزء المحمل لو لم يتحمل الشد فستعرض للمط، وحمل القص سمى كذلك لأن الجزء المحمل لم لم يتحمل الحمل فيحدث له قطع على شكل قص ، حجمل العصر لو لم يتحمله الجزء المحمل فسينعصر وهكذا

النوع الاول هو الأحمال الطولية(شد او ضغط) tension and compressionومثاله البسيط هى السيارة التى تجر مقطورة حيث يقع حمل شد نقى على ذراع جذب المقطورة، وحمل الضغط اشره مثال له ضغط غازات الحريق على مكبس المحرك وضغط المكبس على البييل

النوع الثانى هو احمال القصsheer وهى الأحمال التى تسلط بشكل مستعرض على مقطع الجزئية محل الدراسة، ومن النادر جدا وجود احمال قص منفصلة عن احمال الثنى bending لكن اشهر مثال على الأطلاق لحمل القصsheer هو الأحمال الواقعة على مسامير الربط بفعل الأشياء المربوطة بها، يعنى مثلا، مسامير ربط الجنوط يقع عليها حمل قص شبه نقى فى المسافة ما بين الجنط والصرة المربوط بها الجنط نتيجة لتأثير وزن السيارة على المسامير

النوع الثالث هو احمال الثنى bending وهى التأثير الثانوى للاحمال المستعرضة على مقطع الجزئية محل الدراسة، ، بمعنى ان اى حمل مستعرض يسبب احمال قص واحمال ثنى فى نفس الوقت على الجزية محل الدراسة، مثال سهل هو مثال الشخص الجالس على دكة من المنتصف، تتعرض الدكة لحمل ثنى فى المسافة بين جسم الشخص الجالس وبين الارجل التى تحملها

النوع الرابع هو حمل العصر torsion (وهو الحمل الذى يهتم طلبة الميكانيكا بدراسته دون طلبة المدنى) وكما يتضح من اسمه هو الحمل الناتج من محاولة تدوير عمود من احد طرفيه مع وجود مقاومة من الطرف الآخر، مثل تدوير عمود الكوبلن بفعل محرك السيارة مع وجود مقاومة للتدوير من الناحية الأخرى تتمثل فى القوة المطلوبة لتحريك السيارة فى وجود الاحتكاك ومقاومة الهواء

لو فكرنا فى الامر بهذة الطريقة التحليلية فسنجد ان عمود الكوبلن فى حاله فشله فى تحمل حمل العصر الواقع عليه، اما ان ينكسر على احد مستوياتة المستعرضة(قطم خيار) ، او ان ينعصر يبقى معصوراوهو احتمال غير وارد بالنسبة للخامة المصنع منها العمود لأن الفارق بين الحمل اللازم لتشويه شكلها والحمل اللازم لكسرها لا يذكر ، لكن لا مجال للأعوجاج تحت حمل عصر، الأعوجاج يسببه حمل ثنىbending او التأثر المفرط بحمل ضغط buckling ، وكلاهما غير واقع على عمود الكوبلن، وبالتالى لامجال لاعواج عمود الكوبلن سوى بصدمة مع شئ ناتئ من الأرض يؤثر عليه بحمل ثنى او حادث يقع للسيارة كلها يؤثر عليه بحمل ثنى او ضغط، يبقى لنا احتمال انكسار العمود، نرجع تانى نؤكد ان العمود مصمم بحيث ان اول جزء يفشل فيه هو المشرشر ، يعنى لو تعرض لأحمال فوق طاقته المشرشر يفوت قبل ما العمود يتكسر، وده يمكن التحكم فيه فى تصميم خامة العمود من خلال رفع وخفض معامل الصلادةhardness الى معامل الصلابة stifness من خلال عمليات التقسية التى تتم للخامة ، ومرة تانية اؤكد ان حتى حمل تفويت المشرشر هو حمل اعلى كتيييييييييييييييييييير جدا من حمل تماسك الكاوتش مع الأرض

طيب ايه اللى يخلى المشرشر يفوت او العمود يتكسر:

1- عيب صناعة فى نقطة من العمود يكون فيها بخبخة(cavitation) تعمل تركيز اجهادات فى النقطة دى تكسر العمود

2- عيب صناعة فى تقسية خامة العمود يخفض معامل الصلادة hardnessعن اللازم مما يجعل المشرشر عرضة للتآكل والتفويت

3-عيب صناعة فى اتزان العمود يجعلة يغربل مما يركز الاجهادات فى وسط العمود وقد يكسره لو وصل لتردد الاهتزاز الطبيعى للعمود

4- ظاهرة الكلال fatigue والتى تمثل شيخوخة المنتجات المعدنية، حيث انه مع السنوات والاجهاد المستمر للقطعة يحدث زحف creep للألياف الجزيئة للمادة من نقطة لأخرى مما يسبب تركيز للأجهادات فى نقط معينة من القطعة، ومع الزمن تضعف القطعة مما قد يعرضها للأنهيار تحت الاحمال فيما يسمى الكلالfatigue ، ويقدر عمر الكلال لمنتجات الصلب الكربونى فى حدود 25-40 سنة حسب جودة الخامة

يعنى عندنا 4 اسباب لانكسار عمود الكوبلن ليس من بينها سوء الاستخدام وسببين اخرين لاعوجاجه ليس من بينهم سوء الاستخدام

الله ينور عليك و يزيدك من علمه

يا شباب انا عمرى ما سمعت عن اى حد عوج عمود كوبلن او مقص من الاستخدام العنيف , الصدمات المباشرة بس هى اللى ممكن تعمل كده
انا سواقتى عصبيه و عنيفة جدا و الضرر اللى بشوفه هو الكوبلن نفسه مش فى اى حاجه تانية
الكلام ده بالترتيب فى بيجو 504 , هيونداى اكسيل , فيات 128 و عربيتى الحالية التيبو و فى حوالى 14 سنة سواقه
المرة الوحيدة اللى حصلى فيها كده , واحد الله يسامحه كسر عليا لبسنى فى بردورة من بتوع الرصيف , الجنط و الكاوتش راحو فى داهية , المقص اتكسر و عمود الكوبلن اتعوج سنه بسيطة جدا ما شفتهاش غير بعد 3 شهور
فى ال 128 لبست فى بلاعة و الجنط بقى بيضاوى , نزلت ركبت الاستبن و لما روحت ما لقتش اى ضرر غير ان المساعد ضرب زيت انما الكوبلن و العمود و المقص سلام

اللى انا شايفه ان لازم صدمة مباشرة عشان عمود بالتخن و الخامات دى يتعوج او يتكسر

المشاركة الأصلية كتبت بواسطة Medos

يعنى انا كده فهمت ان عمود الكوبلن مش بيتكسر من الاستخدام العنيف او الامبركة يعنى كده المعلومة الصح كانت بتاعة دكتور لانوس و الاستاذ ممدوح و معلومة الاستاذ حازم خضر و الاستاذ محمد ابيزا غير صحيحة بجد المنتدى دا رائع و الواحد بيتعلم منه كتير
على فكرة الاستاذ سبعاوى دا حكاية جاب المعلومة من الاخر الراجل دا مالوش حل يا جماعة و اضح انه خبرة كبيرة و فاهم صح
ممكن اعرف حضرتك مهندس ميكانيكا و لا شغال ايه

معلش اسمح لي اختلف معاك م خالد سبعاوي الخبره قال انه صعب يتكسر بس قال كمان انه ممكن يكون الكسر ده من عده حاجات يعني في الاحوال العاديه صعب الي مستحيل ينكسر لكن لو فيه عيب صناعه مثلا فممكن يتكسر اقراء اخر المداخله
لو العربيه مستعمله ممكن يكون ملحوم من المالك القديم
ممكن يكون مكنيكي بدله من وراه وهو ميعرفش
معني كده اننا مينفعش نقول مين صح ومين غلط لان الكوبلن مش معانا ومعاينهوش انا شايف ان الاتنين صح بس الحكايه كلها عيب في الكوبلن اللي انكسر مش في الراجل اللي اتكلم وده ممكن يكون واضح لو قراءت مداخلاتي وحتي رائ م خالد كويس وهو كاتب اشهر اربع حاجات
يا ناس الاتنين صح و الاتنين بيتكلموا صح ايه المانع انه انكسر وكان فيه عيب صناعه او شرخ او حتي ملحوم هو انكسر بس هو برضو فيه عيب يعني مش سليم
بس خلاص

المشاركة الأصلية كتبت بواسطة hazem_khidr

و انا في عربيتي السويفت اخويا مره قطم عمود كوبلن من كتر استعماله العنيف للعربيه
و الامركه و هو محمل!!!!!!!

ممكن لو سمحت تصور لنا هذا العمود اللى اتقطم من كتر الاستعمال العنيف
و ترفع الصورة بالمنتدى حتى نرى هذا الحدث النادر و نستفاد من حضرتك
انا فى انتظار الصور ارجو ان تهتم بالموضوع و لا تتجاهل هذا الطلب