الموضوع: دايهاتسو ماتيريا .... إنطلق بخيالك ( تقرير مفصل بالصور)

المشاركة الأصلية كتبت بواسطة cocojumbo3000

شكراً ليك يا باشا على التقرير ده، أنت بصراحة حببتنى فى العربية،........
العربية من جوة تحفة، أوسع بشوية من صالون بيتنا
بس بينى وبينك برضه ، شكلها من برة
يعنى بصراحة بحس أن فيها حاجة غلط
عموماً، زى ما أنت قلت ، الناس يا إما بيحبوها أوى يا إما مش طايقين شكلها خالص.....
وأنا بصراحة مع التانيين......
بس برضه إختلاف وجها النظر لا يفسد للود قضية ...
وللمرة التانية شكراً على المجهود الرائع

العفو وشكرا علي ردك الجميل دا وفعلا إختلاف وجهات النظر لا يفسد للود قضية

المشاركة الأصلية كتبت بواسطة amr_elrashidy

عربية فعلا جمييييييييييييييييييييييي لة جدا ..انا واحد من اللى بيعجبهم شكلها جدا لكن بصراحة التابلوه كان ممكن يبقى اسيك من كده بالذات موضوع العدادات ...الف شكر على تقريرك الجامد

العفو وشكرا علي ردك

مبروووك التثبييييت يا اسلاااام :)

بص اتفرج على الماتيريا دي كدة

مبرووووووك التثبيت
موضوع رائع و يستحق التثبيت بالفعل

جامدة جدا الماتريا اللي انت حطاها يا نهى

المشاركة الأصلية كتبت بواسطة MoDyBeNz2008

مبرووووووك التثبيت
موضوع رائع و يستحق التثبيت بالفعل

جامدة جدا الماتريا اللي انت حطاها يا نهى

مش كدة ؟

انا اللى مصايقنى فيها فعلا ان الوانها محدودة اوى يعني ازاى ماايبقاش فيه ماتيريا حمرا كدة او النبيتي المحمر دة بجد كانت هتبقي جامدة اوى

تقييمي لمجهودك أكثر من ممتاز يا أخي إسلام ولكن ينقصه إنطباعك عن كفائة السياره عند تجربتها

فإسمح لي بعد إذن حضرتك إني أكتب قصة شراء السياره و شعوري وإنطباعي عن قيادتها (ليس تعديلا على الموضوع ولكن تكميلا له)....

تبدأ القصه العام الماضي في شهر 8 تقريبا حينما أرادت والدة أحد أصدقائي شراء سياره هديه له بمناسبة خطوبته

ما علينا

رحنا ندور في المعارض على العربيات ونتفرج على دي ونركب دي وننزل من دي وهكذا ومقتنعش بسهوله بأي ماركه وبالعافيه على ما أقنعته بالصني

ومع ذلك مكانش مقتنع بيها أوي يعني

بعد كام يوم رحنا أنا وهو و والدته المعرض ندفع المقدم

هووب

بيبص لقى الماتيريا واقفه صاحبنا إتمسمر في الأرض ودماغه إتلحست وراسه وألف سيف ماهو جايب غيرها ووالدته تقوله يابني دي عامله زي العربيات اللي بتنقل الميتين زمان وأنا أقوله هو إنت لسه عرفت إمكانياتها ولا ركبتها حتى وبعدين شكلها أساسا يغني عنها

وده مصمم عليها

المهم

ركبناها وإتفرجت عليها ولم تترك عندي أي إنطباع بالإعجاب أو الجمال أو حتى الرضى

بس مييين

على العكس تماما صاحبنا قعد يهيس بشوية كلام غريب ويقولك أنا حاسس إنها بتناديني وشكلها بيعبر عني و دي الحاجه اللي كانت في خيالي حب بقى نقول إيه

ما علينا المهم ربنا وفق وإشتراها كامله مانيوال ب98900 جنيه

بس إيه صاحبنا ده فعلا وقع واقف

هحاول أقولكوا على المميزات بتاعتها على قد ما أقدر

العربيه ما شاء الله واسعه جدا من جوه لدرجة إننا كنا مسمينها "المركب"

والمكيف بتاعها فريزر بس مش بيوصل الهوا مباشرة للركاب اللي ورا إنما بعد شويه بيسقع هوا العربيه كله

والكاسيت بتاعها مالوش حل لو جبته على 65 اللي هو الماكسميمم مش هتسمع اللي جنبك

الأمبيرات بتاعتها واضحه جدا والإضاءه البرتقالي بتاعتها في قمة الشياكه وعداد البنزين والكيلوات بتوعها ديجيتال مش بمؤشر

الكنبه اللي ورا كنبة صالون والله كنا بنقعد ورا 4 من غير مشاكل

كرسي السواق قابل للتعديل للأمام والخلف ولفوق وتحت

الفوانيس ما شاء الله على نورها نبقى في أول الشارع والنور جايب لغاية اخر الشارع ناهيك عن الفوج لايتس اللي ممكن تعتمد عليهم كإضاءه أساسيه

ولو جينا بصينا للباور ستيرنج بتاعها هنلاقيه لا خفيف ولا تقيل إنما راسي كده وفي نفس الوقت بيستجيب لتوجيه السياره بدقه شديده حتى عند السرعات العاليه وده لأنه بتحكم كهربائي EPS وليس ميكانيكي كسائر معظم أنواع السيارات الحديثه


العيوب (من وجهة نظري):

أولا : عندك الفتيس بتاعها صراحة من رأيي أنا شايف إن فيه عيبين (بالنسبه للفتيس المانيوال) بس مش عيبين فادحين يعني

1. لو جربت تدوس دبرياج على الاخر والعربيه واقفه (أو ماشيه مش فارقه) وحركت الفتيس على أي غيار هتحس إنه خشن وتقيل حبتين
وإحنا لما لاحظنا الحكايه دي لما روحنا نعمل صيانة الألف سألناهم في التوكيل قالولنا ده هو هيطبع لوحده بعد الإستخدام وأهو فات سنه وأنا شايف إنه إتحسن بنسبة 10% عن الوضع الأول بس لسه زي ما هو

2. مش عارف ليه بحس إن العربيه بتحتاج تنقلها الغيار الأعلى بسرعه مقارنة بالسيارات الأخرى عموما
يعنى لما تطلع بالعربيه على الأول يادوب تلاقى الأمبير وصل 10 كم/س تلاقى صوت العربيه علي تقوم ناقل على التاني توصل ل 30 كم/س تقوم ناقل تالت لحد ما تنقل للخامس تلاقى العربيه ماشيه على 70 كم/س (مع إن دي تدخل في نطاق الغيار الرابع) وتلاقى ال RPM على 2.5 يعني أنا شايف إن الخامس كتير على السرعه دي وكمان ال RPM للسرعه دي على الغيار ده كتير جدا بس هما قالولنا في التوكيل إبقى إحرق على الغيار حبتين حتى لو صوت العربيه على يعني مثلا إنقل عند 4.5 RPM

ثانيا : العفشه ودي بجد كل اللي بيركبوا معانا العربيه حسوا بإن العفشه ناشفه شويتين مع إنه بيستخدم العربيه إستخدام عادي يعني ولا بيهملها ولا بيحسس عليها أوي بس بجد العفشه كل شهر ولا شهرين لازم يروح مركز خدمة بريدجستون السريعه علشان يربطوله العفشه بتاعة العربيه

نيجي بأه للأهم وهو كفائة السياره الميكانيكيه:

الحق يتقال أنا عن نفسي شايف إن سحبها أفضل من التويوتا الكورولا واللانسر ويقارب سحب الإلنترا

العربيه على أي غيار وأي سرعه دوس على دواسة البنزين زي مانتا عايز حتى ولو للاخر مش هتقول لأ هتلاقى العربيه في ثانيه مجمعه نفسها وبقت زي الطلقه والله صاحبي ده حرق على التاني لغاية 6000 RPM والعربيه في ثانيه جريت زي الصاروخ وجابت 60 كم/س
ومبرري لسحبها العالي عن الكورولا مثلا إني لما كبست مثلا في التويوتا اه جريت وجمعت نفسها وسحبت بس في الأول كده بحس إنها مخنوقه حبتين أو زعلانه من اللي أنا عملته وبعدين تشد معايا إنما الماتيريا مش كده

وبالنسبه للثبات فأعلى سرعه جابها وأنا معاه كانت 150 كم/س ولغاية كده وكانت العربيه موزونه وماشيه عدل ولا بتحدف يمين ولا شمال حتى هو ساب الدريكسيون شويه كده والعربيه كانت مظبوطه تمام


عموما كتقييم عام أنا شايف إن العربيه دي محترمه وممكن بالنسبه لبعض الناس عيبها يبقى شكلها إنما غير كده فالعربيه كويسه جدا وأنا شايف إن سعرها مناسب إليها إلى حد ما

وأنا بتأسف جدا جدا جدا لأني طولت عليكم كتير وحكيت حاجات كتير ملهاش لازمه بس قلت أشارككم تجربة العربيه دي علشان نقرب الناس منها أكتر وأنا والله ما أخدتش بالي من طول الكلام غير بعد لما خلصت لأني مقتنع بالعربيه دي أوي وبحاول أقنعكم بيها برضه لأن معظم الناس بتكرها علشان شكلها

ومره تانيه اسف جدا على الإطاله:blush5:

وكل عام وأنتم بخير ورمضان كريم وعيد سعيد عليكوا جميعا