العفو يا أستاذه نهى أتمنى تكوني إستفدتي من الموضوع
واسف جدا على التأخير
بالنسبه لموضوع العفشه فأنا كنت قلت إنه كل شهرين تلاته بيروح مركز خدمة بريدجستون السريعه علشان يربطوله العفشه بتاعة العربيه
هو الكلام ده حصل فعلا بعد شراء العربيه بشهر ونص تقريبا وإستمر بعديها بمعدل كل شهرين تلاته ولمدة 7 شهور تقريبا وبعد كده بقى بيكسل يودي العربيه لدرجة إني أنا اللي كنت باخدها أوديها تتربط لأنه ملوش خلق على الحاجات دي
يعني في السبع شهور دول وديناها بتاع مرتين أو تلاته بس وبعد كده مرحناش تاني
قصدي من الكلام ده إن ميكونش حصل سوء فهم وتفتكري إن ده لازم يتم بصوره دوريه يا إما العفشه هتبقى سايبه
لأ مش بالضروره إنما لو مودتيهاش هتحسي بخشونة العفشه بصوره بسيطه مش أوي يعني
وبالنسبه لسؤالك:
هو عموما أنا عمري ما حسيت بالموضوع ده وأنا راكب قدام يعني الشكوى كلها بتيجي من ورا بس
واللي بيحصل مش زي ما إنتي متخيله إنها بتترزع أوي يعني في الطرق المكسره إنما اللي هتحسي بيه إنك قاعده مش مستريحه وإنك حاسه بتضاريس الطريق اللي العربيه ماشيه عليه وهتبان أكتر لما أي عجله في العربيه (وخصوصا اللي ورا) تتهبد في حفره في الطريق مره واحده
بس مش أكتر
وإسمحيلي أقول لحضرتك على حاجه من واحد مجرب العربيه
أنا حاسس إن حضرتك موهومه بالعربيه وهي داخله دماغك أوي بس فيه حاجه مخلياكي متردده أنا مش عارف هي إيه
لو كان توقعي صح فأنا بقولك شيلي الحاجه دي من دماغك العربيه والله زي الفل وتمام ومش هتعرفي تلاقي فيها عيوب لأني حاولت ألاقي فيها عيب واحد علشان أكره صاحبي فيها قبل ما نشتريها وملاقيتش حاجه أقولها له غير إن شكلها مش حلو
فلو كانت في دماغك هاتيها وعلى ضمانتي أنا بس متنسيش ترشيها زي الماتيريا اللي في الصوره دي
وكل سنه وإنتي طيبه
ومره أخرى في إنتظار أي إستفسار من الإخوه الأعضاء بعد إذن إسلام باشا
عيد سعيد
المفضلات