الموضوع: مشاكل فى بيجو 301 ورد فعل التوكيل

اسف يا رجالة لو اتأخرت فى كتابة اللى حصل فى التوكيل امبارح

دى كانت اول زيارة ليا لتوكيل بيجو وكانت فى فرع شارع بورسعيد، وصاحبى طلع معروف هناك من كتر ما راح بسبب المشكلة اللى فى العربية :)

اللى استلم العربية مهندس اسمه احمد وقالنا دقايق ورجع جاب مهندس اسمه مينا، سمع مننا المشكلة وقالنا مش ها ادخلها الورشة وها اشتغل فيها قدامكم فى مكان الQuick Service عشان تبقوا متابعين العربية.

مبدأيا قالنا دى مشكلة بنزين (نفس السبب القديم اللى اتقال قبل كده وطلبوا من صاحبى يمون من محطات معينة وصاحبى التزم بكلامهم) وقال ها نكشف ونشوف ايه الموضوع.

طلعوا فلتر البنزين ونزلوا شوية بنزين اسود وقالولنا ده البنزين اللى نازل من الفلتر (طب ما هو طبيعى ان الفلتر يكون فيه ترسبات والمفروض ان الفلتر كده قام بدوره ونقى البنزين من اى Impurities وكان المفروض يجيب شوية بنزين من الرشاشات عشان نشوف البنزين داخل الموتور حالته عاملة ايه)

طلبوا ان فلتر البنزين نغيره اضمن (على حسابنا) وغيروا هما البوجيهات (على حساب الضمان)

حطوا العربية على الكومبيوتر ويالا بينا نجرب العربية.

انطباعى ان العربية صوتها رجع طبيعى بعد ما كان عالى بعد اخر زيارة ليهم.

طبعا المشكلة مش عارف ها ترجع تانى ولا لأ بس ادينا ها نجرب ونشوف.

طلبت من المهندس مينا اننا نحط محسن اوكتان للبنزين فقالنا احنا بنبيع حاجة من انتاجنا قمنا اشتريناها العلبة ب120 جنيه قبل الضريبة وبتستخدم كل 10 الاف كم.

================================================== ======

شوية ملحوظات كده:
1- المهندسين محترمين (خصوصا المهندس مينا والمهندس محمد حسن)
2- رغم انتباهم لكلامنا لكن حسيتهم مش بيسمعوا للعميل قوى (راجع لاعتقادهم انهم عارفين اكتر)
3- بيهتموا بكل العربيات اللى عندهم بدرجة اهتمام واحدة.
4- وهما بيركبوا البوجيهات لقيتهم ماسكين علبة زيت باور مش عارف بيضيفوا الزيت مع البوجيهات ولا ايه، لأن بعد كده فضلوا دايسين بنزين كتير شوية لحد العربية ما جابت زيت بس للأسف مخدتش بالى الزيت كان طالع من الشكمان ولا من حوض الموتور (لما سألتهم قالولى لا طبعا احنا حطينا الزيت للتنضيف عند الموتور والدخان طالع من قدام مش من الشكمان)
5- سألت المهندس محمد حسن لو ينفع اجيب الزيت معايا فى صيانة ال10 الاف قالى ممنوع ولازم الزيت بتاعهم موبيل
6- واحنا بنجرب العربية مع المهندس مينا قولتله على زميلنا اللى عربيته بابها اتخبط عندهم قالى محصلش وفى ناس بتدخل اونلاين من الوكلاء الاخرين لتشويه سمعة بيجو وووو

اخيرا مقدرتش اكون انطباع عن التوكيل لأنها اول زيارة ليهم بس بردو مقدرش اقول ابدا انهم توكيل وحش لكن لسه موصلتش انى اقول انهم توكيل كويس

المشاركة الأصلية كتبت بواسطة amrelsaqqa

شكرا ياباشا بس انا ليا تعقيب على كلام المهندس المحترم



وهو متأكد كدة ازاى انه ما حصلش ، سبحان الله ! وايه تشويه سمعة بيجو دى ، يعنى هى دى كمان هيبقى فيها لجان الكترونية مثلا ! وانا ايه مصلحتى اشوه سمعة التوكيل وانا واحد معاه فعلا العربية والناس كلها عارفة وشافت عربيتى ! ويهمنى انها تبيع وتنتشر ومحدش يعزف عنها وحاجتها تنتشر وسوقها يمشى ..

ربنا يهدي والله ، فيها ايه لما يقول ان الموقف قد يكون حصل ، او انه ما يعرفش الموضوع ده ، او قد يكون حصل بدون قصد، بدل ما يسارع بالنفى تماما ! ، كونه ينفى تماما بكل ثقة كدة ، ده معناه انه سوري في الكلمة كداب هجاص كبير :)

على فكرة بما انى لجان الكترونية بقى ، علبة الدركسيون في التوكيل ده بـ 20 الف جنيه واللى مش مصدق يسأل، والكوبلن الواحد بـ 3106 ، والقنطرة بـ 4456 و شمعدان العجل بـ 1893 و طاسة العجل البلاستيك الواحدة بـ 493 جنيه !! والمقص بـ 1300 ، كل ده من غير ضريبة طبعا :)

اللى فاكر ان الاسعار كلها من عينة قاعدة موتور بـ 350 و مساعد بـ 640 وشداد ميزان بـ 85 ياخد باله ..
في امان الله :)

يابني أنت مش شرط اللي قال كدا أنو حضر الموقف بتاعك,,
وأي حد ممكن مكانه هيقول كدا لما يتقاله إن فيه عربية جات عندكم وأتحكت أو أتخبطت,
زي الناس اللي بتلاقيها بتدخل هنا وبتقولك أحنا أشترينا البيجو وبعناها بعد يومين.!

وأسعار الكوبلن والشمعدان والقنطرة كل دي أسعار عادية, وعلبة الدركسيون غالية في كل العربيات
الطاسة هيا اللي غالية فعلاً والمفروض تقل عن كدا,,