الموضوع: مشاكل فى بيجو 301 ورد فعل التوكيل

المشاركة الأصلية كتبت بواسطة damasry

اسف يا رجالة لو اتأخرت فى كتابة اللى حصل فى التوكيل امبارح

دى كانت اول زيارة ليا لتوكيل بيجو وكانت فى فرع شارع بورسعيد، وصاحبى طلع معروف هناك من كتر ما راح بسبب المشكلة اللى فى العربية :)

اللى استلم العربية مهندس اسمه احمد وقالنا دقايق ورجع جاب مهندس اسمه مينا، سمع مننا المشكلة وقالنا مش ها ادخلها الورشة وها اشتغل فيها قدامكم فى مكان الQuick Service عشان تبقوا متابعين العربية.

مبدأيا قالنا دى مشكلة بنزين (نفس السبب القديم اللى اتقال قبل كده وطلبوا من صاحبى يمون من محطات معينة وصاحبى التزم بكلامهم) وقال ها نكشف ونشوف ايه الموضوع.

طلعوا فلتر البنزين ونزلوا شوية بنزين اسود وقالولنا ده البنزين اللى نازل من الفلتر (طب ما هو طبيعى ان الفلتر يكون فيه ترسبات والمفروض ان الفلتر كده قام بدوره ونقى البنزين من اى Impurities وكان المفروض يجيب شوية بنزين من الرشاشات عشان نشوف البنزين داخل الموتور حالته عاملة ايه)

طلبوا ان فلتر البنزين نغيره اضمن (على حسابنا) وغيروا هما البوجيهات (على حساب الضمان)

حطوا العربية على الكومبيوتر ويالا بينا نجرب العربية.

انطباعى ان العربية صوتها رجع طبيعى بعد ما كان عالى بعد اخر زيارة ليهم.

طبعا المشكلة مش عارف ها ترجع تانى ولا لأ بس ادينا ها نجرب ونشوف.

طلبت من المهندس مينا اننا نحط محسن اوكتان للبنزين فقالنا احنا بنبيع حاجة من انتاجنا قمنا اشتريناها العلبة ب120 جنيه قبل الضريبة وبتستخدم كل 10 الاف كم.

================================================== ======

شوية ملحوظات كده:
1- المهندسين محترمين (خصوصا المهندس مينا والمهندس محمد حسن)
2- رغم انتباهم لكلامنا لكن حسيتهم مش بيسمعوا للعميل قوى (راجع لاعتقادهم انهم عارفين اكتر)
3- بيهتموا بكل العربيات اللى عندهم بدرجة اهتمام واحدة.
4- وهما بيركبوا البوجيهات لقيتهم ماسكين علبة زيت باور مش عارف بيضيفوا الزيت مع البوجيهات ولا ايه، لأن بعد كده فضلوا دايسين بنزين كتير شوية لحد العربية ما جابت زيت بس للأسف مخدتش بالى الزيت كان طالع من الشكمان ولا من حوض الموتور (لما سألتهم قالولى لا طبعا احنا حطينا الزيت للتنضيف عند الموتور والدخان طالع من قدام مش من الشكمان)
5- سألت المهندس محمد حسن لو ينفع اجيب الزيت معايا فى صيانة ال10 الاف قالى ممنوع ولازم الزيت بتاعهم موبيل
6- واحنا بنجرب العربية مع المهندس مينا قولتله على زميلنا اللى عربيته بابها اتخبط عندهم قالى محصلش وفى ناس بتدخل اونلاين من الوكلاء الاخرين لتشويه سمعة بيجو وووو

اخيرا مقدرتش اكون انطباع عن التوكيل لأنها اول زيارة ليهم بس بردو مقدرش اقول ابدا انهم توكيل وحش لكن لسه موصلتش انى اقول انهم توكيل كويس

انا برضة زرت التوكيل مرة واحدة من يومين و متفق معاك في كل ملاحظاتك؛ انا في كل حاجة هقارنوا بتوكيل رينو EIM عشان هوا اللي اتعاملت معاه فعربيتي الميجان
التوكيل فعلا محترم بدرجة كبيرة؛ المهندسين محترمين جدا في استقبالهم للناس و العربيات؛ في EIM في مهندسين محترمين زي محمد سيد و في مهندسين من ازبل ما يكون زي عمرو. في بيجو انا اتعاملت يومها مع اسامة و مينا و محمد حسن؛ ووقفت اتكلمت شوية مع مصطفي و دة اكبر واحد فيهم تقريبا؛ كلهم ما شاء الله محترمين و بيتعاملوا مع الناس بادب حتي لما الدنيا اتزحمت علي الساعة ١١ كدة. الحق يقال برضة ان ضغط الشغل عندهم اقل من رينو بكتير؛ رينو المقطم بتقف في الطابور بال٣/٤ ساعة من ساعة ما تخش من البوابة لحد ما توصل الاستقبال؛ في ببجو لما بقي عندهم انتظار ٦ او ٧ عربيات الدنيا اتزحمت و الناس بقو مستنيين كتير.
المهندسين بيسمعوا منك فعلا بس مش باهتمام قوي؛ بيسمع لحد ما يسمع كلمة السر اللي مستنيها و يقفل علي كدة؛ انا من اول ما سرحتلها تتليتة العربية و هو قفش في السوفت وير رغم اني متاكد انها بوجيهات و قولتلة كذا مرة بوجيهات و هو عمال بيلف و يدور علي السوفت وير و قالي في الاخر هنبص علي البوجيهات بس كدة كدة في ابديت نازل جديد في ديسمبر. بصوا علي البوجيهات ولا لأ مش عارف طبعا لان كلة في الورشة وانا مش شايف حاجة.
طبعا مكان التوكيل وحش جدا و ميسمحش انك تجرب العربية علي سرعات او تاخد راحتك في السواقة؛ طبعا بعد اللي حصل مع عمرو و محمد تقريبا قولتلهم محدش يطلع بالعربية من غيري و فعلا لما جيهم يجربوا العربية نادوني اركب مع المجرب.
انا انطباعي عنهم انهم محترمين و انا استريحت لتعاملهم علي الاقل و ان كان اسعارهم غالية زي اي توكيل اوروبي؛ انا فاكر اني كنت قريت في موضوع قبل كدة ان مصنعية صيانة ال10000 اللي هي تغيير زيت بس ١٨٧ و دة كتير شوية
بمناسبة الصيانة؛ انا قولتلهم لما اجي اعمل الصيانة هجيب الزيت بتاعي معايا؛ محمد حسن قالي مينفعش خالص؛ اسامة و هو بيسلمني العربية قولتلة برصة قالي لأ في الاول و بعدين لما قولتلة انا مستحيل احط موبيل دة في اي عربية من عربياتي قالي خلاص بس علي مسؤليتك which is fair enough

المشاركة الأصلية كتبت بواسطة amrelsaqqa

شكرا ياباشا بس انا ليا تعقيب على كلام المهندس المحترم



وهو متأكد كدة ازاى انه ما حصلش ، سبحان الله ! وايه تشويه سمعة بيجو دى ، يعنى هى دى كمان هيبقى فيها لجان الكترونية مثلا ! وانا ايه مصلحتى اشوه سمعة التوكيل وانا واحد معاه فعلا العربية والناس كلها عارفة وشافت عربيتى ! ويهمنى انها تبيع وتنتشر ومحدش يعزف عنها وحاجتها تنتشر وسوقها يمشى ..

ربنا يهدي والله ، فيها ايه لما يقول ان الموقف قد يكون حصل ، او انه ما يعرفش الموضوع ده ، او قد يكون حصل بدون قصد، بدل ما يسارع بالنفى تماما ! ، كونه ينفى تماما بكل ثقة كدة ، ده معناه انه سوري في الكلمة كداب هجاص كبير :)

على فكرة بما انى لجان الكترونية بقى ، علبة الدركسيون في التوكيل ده بـ 20 الف جنيه واللى مش مصدق يسأل، والكوبلن الواحد بـ 3106 ، والقنطرة بـ 4456 و شمعدان العجل بـ 1893 و طاسة العجل البلاستيك الواحدة بـ 493 جنيه !! والمقص بـ 1300 ، كل ده من غير ضريبة طبعا :)

اللى فاكر ان الاسعار كلها من عينة قاعدة موتور بـ 350 و مساعد بـ 640 وشداد ميزان بـ 85 ياخد باله ..
في امان الله :)

هو لازم هيقول كدة يا عمرو؛ مش هيعترفوا ابدا انهم خبطوا العربية بدل الموضوع خلص ودي و من غير ورق. فمتاخدش في بالك
الاسعار اللي كاتبها غالية شوية برضة؛ الميجان كنا بنقول علي علبة الدركسيون غالية و كانت ب ١٠٠٠٠ تقريبا علي حسب ما انا فاكر؛ ال٢٠ دي مبالغ فيها اوي
الكوبلن زميلي مغيرهم في ال٣٠٧ ب٦٠٠٠ فعلا
انا لما غيرت المقص غيرتة ب ١٠٥٠ من غير ضريبة في اوتو سيرفس اللي في مدينة نصر؛ انا شكلي كدة هكمل معاهم صيانات و مش هروح التوكيل
عامة ربنا يستر علينا و علي عربياتنا و منحتاجش الحاجات دي خالص

المشاركة الأصلية كتبت بواسطة amrelsaqqa

الاسعار عادية للاسف يا جماعة وهتلاقوا الكلام ده واكتر في هيونداى وكيا .. .، لذلك لازم كل واحد يأمن على عربيته لو مش مقتنع ان التأمين حرام ، لحد ما الاستيراد يتوفر لان الحادثة بتيجى في ثانية ، وما تبصش تقول القطعة دى بـ 1000 و دى بـ 2000 ، سهلة ، لا اللى بيحصل ان كله بييجى مرة واحدة وتلاقي التوكيل بيقولك 50 الف جنيه مثلا !!!!!!

الاستيراد بيفرق جامد ، على سبيل المثال علبة الدركسيون في التوكيل بـ 20 الف ، موجودة استيراد عند رضا في الحرفيين بـ 2500 ( الفرق كبير )

ماحدش يقلق عليا ان الحمد لله كويس والعربية كويسة والعربية عملت اللى عليها وزيادة اوى ، باختصار واحد حيوان بتاع نص نقل زنق عليا جامد وجه نط قدامى وانا ع الشمال نازل نزلة قويسنا بتاعت الزراعى محدوف انا وكل اللى ورايا ، هو جاي من اليمين وفجأة كسر وبقى قدامى وفي نفس الوقت هو شبه واقف وانا ماشى اقل واجب 110 ، وانا مشفتوش من الاول لان الحارة الوسطى مش فاضية وده كمان خلانى معرفتش افاديه بالاضافة ان كل اللى ورايا محدوف يعنى الفرامل مش حل ، كان قدامى ثانيتين افكر ، لقيتنى لو كملت هدخل فيه واضيع العربية وحتى لو وقفت هتخبط من ورا اكيد ..، في نفس اللحظة لقيت الرصيف على شمالى صغير وبيكبر ، لقيت الحل الامثل ادخل في الرصيف واجيب الخبطة كلها في العفشة ، وقد كان ، العربية خبطت في الرصيف ودخلت بسرعة والعربية لسة بسرعتها عشان الحق الحتة اللى الرصيف بيكبر عندها ، بس الحمد لله ما طلعتش عليه ، ولا عدت ع الناحية التانية ولا اي كلام من ده ، وما شاء الله ما اتهزتش سنتى واحد من ورا لما خبطت

طبعا التوكيل كان بيهزر في مقايسة الاصلاح واتكلفت كتير مجرد تنقلات واوناش انقاذ ، الحمد لله ..

اانا بعملها دلوقتى برة : المقصات هى هى بالظبط بتاعت الـ 207 ، القنطرة وعلبة الدركسيون والمقصات لقيتهم بردو استيراد عند رضا في الحرفيين ودى حاجة طمنتنى بس الحمد لله الدركسيون عندى سليم والقنطرة ان شاء الله سليمة ، وهو بيقول جايله كمان عربية 301 استيراد هيروح يقطعها في بورسعيد يوم 15/1

المقص جبته استيراد بـ 350

الكوبلن دخت السبع دوخات عليه مفيش فايدة مش موجود خالص ، والاقى حاجات شبيهة جدااا ، بس في فرق .. المهم الحمد لله تم استعداله ع المخرطة ورجع مسطرة بدون اي عوجة بـ 150 جنيه في الحرفيين

لسة المساعد وظبط الزوايا هعملهم بكرة ان شاء الله ، دعواتكم ، المساعد بردو مش موجود بس ده سعره جديد سواء برة او في التوكيل حلو 640-660 جنيه

الشمعدان ان شاء الله سليم ويارب يكون سليم عشان ده بـ 2000 :(

دعواتكوا يا رجالة ، الحمد لله كان ممكن يحصللى اسوأ من كدة بكتير ، وطبعا كالعادة ده عشان واحد كان راكب معايا العربية وكان مستكترها عليا جدا وعمال يقوللى جبتها ازاى وكاش ولا تقسيط وبتدفع قد ايه .. وجت سيرة الشغل وحسيت انه بدأ يقر في الشغل كمان ، وفعلا بعد حادثتى بيومين في الشغل مديري عمل حادثة ع الدائري ( اللى هى بتاعت المقطورة اللى خبطت 5 عربيات في بعض ) بس هو عنده اكصدام ورفرف خلفى بس وحظه حلو انه كان اخر واحد والا كان خد من ورا وقدام

الحمد لله على كل حال دعواتكوا يا رجالة ، اللى مش مأمن يأمن طالما مش شايف التأمين حرام ، انا كل ما افكر اامن ناس تقنعنى انه حرام وارجع في كلامى

اسف لصاحب الموضوع انى بكتب في موضوعه بس معلش معنديش وقت حتى اعمل موضوع جديد

لا حول و لا قوة إلا بالله؛ قدر الله و ما شاء فعل. انت محسود جامد اوي يا عمرو؛ العربية دي العين عليها صعبة؛ وانا في التوكيل واحد كان جايب عربيتة خابطها اوتوبيس في نص العربية و مطبق الناحية اليمين خالص؛ ربنا ينتقم من العالم دي
انا ركبت رصيف قبل كدة بالميجان بس اية العربية اتنطرت لنص الشارع و رحمة ربنا انا الكلام دة كان الساعة ٤ الفجر و محدش كان جاي في المعاكس بس بامانة الميجان كانت وحش؛ طارت المصفحة و القنطرة اتعوجت و الموتور و الفتيس كل قواعدهم اتكسروا لانهم خدوا الخبطة و الموتور و الفتيس اتنطروا لفوق جامد لان الخبطة كانت في نص العربية بالضبط؛ و اتكسر برضة الصدر الفبر اللي تحت الكبوت؛ بس العفشة ولا حصلها الهوا؛ الليلة دي اتلمت ب٣٠٠٠ في الحرفيين بالمصنعيات.
طبعا الكلام دة برة الضمان؛ السؤال بقي الحاجات اللي بتغيرها برة دي نظامها اية مع الضمان؟

عمرو انا ساكن جنب الحرفيين؛ لو احتجت حاجة او تسأل علي اي حاجة مش لازم تضرب المشوار؛ كلمني علي ٠١١١٠٣٦٢٧٧٣ و انا ممكن اظبطلك اللي انت عايزة

المشاركة الأصلية كتبت بواسطة medori

لا حول و لا قوة إلا بالله؛ قدر الله و ما شاء فعل. انت محسود جامد اوي يا عمرو؛ العربية دي العين عليها صعبة؛ وانا في التوكيل واحد كان جايب عربيتة خابطها اوتوبيس في نص العربية و مطبق الناحية اليمين خالص؛ ربنا ينتقم من العالم دي
انا ركبت رصيف قبل كدة بالميجان بس اية العربية اتنطرت لنص الشارع و رحمة ربنا انا الكلام دة كان الساعة ٤ الفجر و محدش كان جاي في المعاكس بس بامانة الميجان كانت وحش؛ طارت المصفحة و القنطرة اتعوجت و الموتور و الفتيس كل قواعدهم اتكسروا لانهم خدوا الخبطة و الموتور و الفتيس اتنطروا لفوق جامد لان الخبطة كانت في نص العربية بالضبط؛ و اتكسر برضة الصدر الفبر اللي تحت الكبوت؛ بس العفشة ولا حصلها الهوا؛ الليلة دي اتلمت ب٣٠٠٠ في الحرفيين بالمصنعيات.
طبعا الكلام دة برة الضمان؛ السؤال بقي الحاجات اللي بتغيرها برة دي نظامها اية مع الضمان؟

العربية المخبوطة دي كان لونها اسود

المشاركة الأصلية كتبت بواسطة ebrahim mayalo

العربية المخبوطة دي كان لونها اسود

ايوة

المشاركة الأصلية كتبت بواسطة medori

ايوة

ده انت كنت في غمرة بقي