الموضوع: مشاكل فى بيجو 301 ورد فعل التوكيل

المشاركة الأصلية كتبت بواسطة medori

انا برضة زرت التوكيل مرة واحدة من يومين و متفق معاك في كل ملاحظاتك؛ انا في كل حاجة هقارنوا بتوكيل رينو eim عشان هوا اللي اتعاملت معاه فعربيتي الميجان
التوكيل فعلا محترم بدرجة كبيرة؛ المهندسين محترمين جدا في استقبالهم للناس و العربيات؛ في eim في مهندسين محترمين زي محمد سيد و في مهندسين من ازبل ما يكون زي عمرو. في بيجو انا اتعاملت يومها مع اسامة و مينا و محمد حسن؛ ووقفت اتكلمت شوية مع مصطفي و دة اكبر واحد فيهم تقريبا؛ كلهم ما شاء الله محترمين و بيتعاملوا مع الناس بادب حتي لما الدنيا اتزحمت علي الساعة ١١ كدة. الحق يقال برضة ان ضغط الشغل عندهم اقل من رينو بكتير؛ رينو المقطم بتقف في الطابور بال٣/٤ ساعة من ساعة ما تخش من البوابة لحد ما توصل الاستقبال؛ في ببجو لما بقي عندهم انتظار ٦ او ٧ عربيات الدنيا اتزحمت و الناس بقو مستنيين كتير.
المهندسين بيسمعوا منك فعلا بس مش باهتمام قوي؛ بيسمع لحد ما يسمع كلمة السر اللي مستنيها و يقفل علي كدة؛ انا من اول ما سرحتلها تتليتة العربية و هو قفش في السوفت وير رغم اني متاكد انها بوجيهات و قولتلة كذا مرة بوجيهات و هو عمال بيلف و يدور علي السوفت وير و قالي في الاخر هنبص علي البوجيهات بس كدة كدة في ابديت نازل جديد في ديسمبر. بصوا علي البوجيهات ولا لأ مش عارف طبعا لان كلة في الورشة وانا مش شايف حاجة.
طبعا مكان التوكيل وحش جدا و ميسمحش انك تجرب العربية علي سرعات او تاخد راحتك في السواقة؛ طبعا بعد اللي حصل مع عمرو و محمد تقريبا قولتلهم محدش يطلع بالعربية من غيري و فعلا لما جيهم يجربوا العربية نادوني اركب مع المجرب.
انا انطباعي عنهم انهم محترمين و انا استريحت لتعاملهم علي الاقل و ان كان اسعارهم غالية زي اي توكيل اوروبي؛ انا فاكر اني كنت قريت في موضوع قبل كدة ان مصنعية صيانة ال10000 اللي هي تغيير زيت بس ١٨٧ و دة كتير شوية
بمناسبة الصيانة؛ انا قولتلهم لما اجي اعمل الصيانة هجيب الزيت بتاعي معايا؛ محمد حسن قالي مينفعش خالص؛ اسامة و هو بيسلمني العربية قولتلة برصة قالي لأ في الاول و بعدين لما قولتلة انا مستحيل احط موبيل دة في اي عربية من عربياتي قالي خلاص بس علي مسؤليتك which is fair enough

العربية ال301 ها تبقى اختبار حقيقى للتوكيل لأنها عمل شغل ومبيعات كويسة للتوكيل وكفاية اوى ال2500 اللى الجيش حجزهم.

اعتقد بيجو مصر لازم تعمل مركز صيانة تانى كبير شوية عشان تقدر تخدم المبيعات المستقبلية لبيجو.

موضوع الزيت فعلا المهندس محمد تحس انه عشان لسه جاى جديد فبيقولك ممنوع وما اسمحش ووو لكن طبعا وقت الصيانة ها اصمم انى احط الزيت اللى انا عايزه طالما نفس المواصفات الموصى بيها للعربية.

المشاركة الأصلية كتبت بواسطة amrelsaqqa

حبيبى تسلم والله ربنا يخليك
الحمد لله العربية دلوقتى معايا عشان بكرة اجازة الحرفيين بس لسة فيها شغل طبعا هخلصه يوم الاتنين ان شاء الله ، فاضل تركيب الشمعدان عشان القديم اتعوج ومش راضى يظبط زوايا العربية
انا النهاردة جبت مساعد من التوكيل بـ 700 بالضريبة والجنط الحديد بـ 315 ( سعر كويس ) و شداد الميزان بـ 92 ( سعر ممتاز ) الاسعار شاملة الضريبة
وطبعا الشمعدان هو هو بتاع الـ 207 فجبته استيراد ، بس تخلى بالك من مقاس الكوبلن والشمعدان ده جبته 3 مرات بـ 3 اسعار اول مرة ب700 ! وده اغلى واحد واقل واحد ، لانه كان فيه بوش جامد في البلية ، بعد كدة جبت واحد تاني فيه بوش بس قليل ب 300 ، بعد كدة الحمد لله لقيت واحد مفيهوش الهوا زي الزيرو بالظبط بـ 450 بالطنبورة والكاليبرات والراجل مارضاش يديهولى لوحده ، هركبه واخلى الطنبورة والكاليبرات عندى ..

الشمعدان في التوكيل سعره 1900 وشوية بدون ضريبة ( غالى فحت :( )


الحمد لله القنطرة زي الفل ، الفتيس والموتور ما اتلمسوش بفضل الله ثم المصفحة ( شالت كتير فعلا ) ، المقص هو اكتر حاجة اتهرست وده يعتبر فدى العربية كلها وشال اغلب الليلة .. الحمد لله

مع ان لسة العربية ما خلصتش بس سقتها النهاردة من الحرفيين للمهندسين و مع ان الزوايا مش مظبوطة العربية ماسكة نفسها مش بتتلكك على تعويمة او حدفة ، الحمد لله ولسة فيها نعومة الزيرو بفضل الله ، بعد ما تخلص خالص بيتهيألى هترجع زي الاول بالظبط بدون مبالغة الحمد لله

بالنسبة لموضوع العين ، دى مفيهاش كلام كل ده بسبب انى جبت عربية زي دى وانا عندى 26 سنة ، فكل اللى حواليا باصين لي فيها ، يلا ربنا يعديها على خير

الحمد لله ان العربية خلصت على خير وبتكاليف قليلة والاهم ان الحادثة مقصرتش على احساسك انك راكب عربية زيرو.

المشاركة الأصلية كتبت بواسطة ebrahim mayalo

ماشي ياعم احمد فداك والله المهم انا كان عندي خبطة من تحت في مطب ومن ساعتها بسمع ونة كده وكان عندي استهلاك البنزين عالي شوية وغيرولي البوجيهات والفلتر وقالولي البنزينة اللي بتمون منها وحشة

الاستهلاك عندك كام يا باشا فى العربية سواء جوه البلد وعلى طريق سفر؟

المشاركة الأصلية كتبت بواسطة ebrahim mayalo

والله بفول من موبيل وكل الناس بتفول منها والغريبة ان برضه وقفت واتكلمت مع واحد هناك عنده نفس المشكلة ان الاستهلاك عالي قالولوه برضوا مشكلة بوجيهات وفلتر عشان البنزين اللي بتحطوا ووسالتوا بتفول منين قالي من موبيل المشكلة بقي انه راحلهم فوق ال4 مرات مرة قالولوا مشكلة سوفت ويير ولما التحديث ينزل هتتح ومرة تانية البوجيهات والفلتر والمشكلة لسه موجودة ومرة تانية اللي كنت موجودساعتها قالوا حساس الشكمان فيه مشكلة وادولوا علبة محسن اوكتان ب 120 ج يحط منها كل 5000 ك قبل مايفول وده هيظبطلك الدنيا

محسن الاوكتان بالضريبة ب130 والمهندس مينا قالى كل 10 الاف مش 5 الاف ويستحسن تستخدمه قبل تغيير الزيت بحاجة بسيطة عشان لو فى رواسب هو دوبها وشالها ها تنزل فى الموتور وتبقى تنزل مع تغيير الزيت.