الموضوع: مشاكل فى بيجو 301 ورد فعل التوكيل

المشاركة الأصلية كتبت بواسطة medori

الونة على كل السرعات و لا الونة اللى مش عارفنليها مصدر دى اللى بين ال90 و ال120؟ و طلع اية سببها؟
انا حاولت اخليهم يغيرولى البوجيهات بس غيرولى سوفت وير بس و قالولى البوجيهات سليمة و أنا مردتش اشد معاهم فى الموضوع بدل التتليتة دى حصلت مرة واحدة بس، قلت لو حصلت تانى هرجعلهم و مش همشى غير لما يغيروهم. انا بمون على طول من موبيل و ساعات قليلة من امارات مصر، غير كدة مبفكرش احط بنزين من أى حتة تانية

انا مستغربلهم بصراحة بيحطوا زيت موبيل وبينصحوك متفولش من عندهم

المشاركة الأصلية كتبت بواسطة amrelsaqqa

الاسعار عادية للاسف يا جماعة وهتلاقوا الكلام ده واكتر في هيونداى وكيا .. .، لذلك لازم كل واحد يأمن على عربيته لو مش مقتنع ان التأمين حرام ، لحد ما الاستيراد يتوفر لان الحادثة بتيجى في ثانية ، وما تبصش تقول القطعة دى بـ 1000 و دى بـ 2000 ، سهلة ، لا اللى بيحصل ان كله بييجى مرة واحدة وتلاقي التوكيل بيقولك 50 الف جنيه مثلا !!!!!!


الاستيراد بيفرق جامد ، على سبيل المثال علبة الدركسيون في التوكيل بـ 20 الف ، موجودة استيراد عند رضا في الحرفيين بـ 2500 ( الفرق كبير )


ماحدش يقلق عليا ان الحمد لله كويس والعربية كويسة والعربية عملت اللى عليها وزيادة اوى ، باختصار واحد حيوان بتاع نص نقل زنق عليا جامد وجه نط قدامى وانا ع الشمال نازل نزلة قويسنا بتاعت الزراعى محدوف انا وكل اللى ورايا ، هو جاي من اليمين وفجأة كسر وبقى قدامى وفي نفس الوقت هو شبه واقف وانا ماشى اقل واجب 110 ، وانا مشفتوش من الاول لان الحارة الوسطى مش فاضية وده كمان خلانى معرفتش افاديه بالاضافة ان كل اللى ورايا محدوف يعنى الفرامل مش حل ، كان قدامى ثانيتين افكر ، لقيتنى لو كملت هدخل فيه واضيع العربية وحتى لو وقفت هتخبط من ورا اكيد ..، في نفس اللحظة لقيت الرصيف على شمالى صغير وبيكبر ، لقيت الحل الامثل ادخل في الرصيف واجيب الخبطة كلها في العفشة ، وقد كان ، العربية خبطت في الرصيف ودخلت بسرعة والعربية لسة بسرعتها عشان الحق الحتة اللى الرصيف بيكبر عندها ، بس الحمد لله ما طلعتش عليه ، ولا عدت ع الناحية التانية ولا اي كلام من ده ، وما شاء الله ما اتهزتش سنتى واحد من ورا لما خبطت

طبعا التوكيل كان بيهزر في مقايسة الاصلاح واتكلفت كتير مجرد تنقلات واوناش انقاذ ، الحمد لله ..

اانا بعملها دلوقتى برة : المقصات هى هى بالظبط بتاعت الـ 207 ، القنطرة وعلبة الدركسيون والمقصات لقيتهم بردو استيراد عند رضا في الحرفيين ودى حاجة طمنتنى بس الحمد لله الدركسيون عندى سليم والقنطرة ان شاء الله سليمة ، وهو بيقول جايله كمان عربية 301 استيراد هيروح يقطعها في بورسعيد يوم 15/1

المقص جبته استيراد بـ 350

الكوبلن دخت السبع دوخات عليه مفيش فايدة مش موجود خالص ، والاقى حاجات شبيهة جدااا ، بس في فرق .. المهم الحمد لله تم استعداله ع المخرطة ورجع مسطرة بدون اي عوجة بـ 150 جنيه في الحرفيين

لسة المساعد وظبط الزوايا هعملهم بكرة ان شاء الله ، دعواتكم ، المساعد بردو مش موجود بس ده سعره جديد سواء برة او في التوكيل حلو 640-660 جنيه

الشمعدان ان شاء الله سليم ويارب يكون سليم عشان ده بـ 2000 :(

دعواتكوا يا رجالة ، الحمد لله كان ممكن يحصللى اسوأ من كدة بكتير ، وطبعا كالعادة ده عشان واحد كان راكب معايا العربية وكان مستكترها عليا جدا وعمال يقوللى جبتها ازاى وكاش ولا تقسيط وبتدفع قد ايه .. وجت سيرة الشغل وحسيت انه بدأ يقر في الشغل كمان ، وفعلا بعد حادثتى بيومين في الشغل مديري عمل حادثة ع الدائري ( اللى هى بتاعت المقطورة اللى خبطت 5 عربيات في بعض ) بس هو عنده اكصدام ورفرف خلفى بس وحظه حلو انه كان اخر واحد والا كان خد من ورا وقدام

الحمد لله على كل حال دعواتكوا يا رجالة ، اللى مش مأمن يأمن طالما مش شايف التأمين حرام ، انا كل ما افكر اامن ناس تقنعنى انه حرام وارجع في كلامى

اسف لصاحب الموضوع انى بكتب في موضوعه بس معلش معنديش وقت حتى اعمل موضوع جديد

حمدالله علي سلامتك انت دي اهم حاجة وزي مانت قولت الحمد لله انها جات علي اد كده

المشاركة الأصلية كتبت بواسطة ebrahim mayalo

انا مستغربلهم بصراحة بيحطوا زيت موبيل وبينصحوك متفولش من عندهم

انا بفول من محطات موبيل مشهورة اوي و عليها ضغط علي طول؛ اللي في جسر السويس قبل موقف العاشر او اللي علي الدائري اللي عند ميراج او اللي في صلاح سالم بعد كوبري الجلاء
موضوع الزيت دة بيبقي deals ما بين التوكيل و الشركة المصنعة للزيت و ملوش اي علاقة بالشركة الام زي موبيل مثلا؛ و كمان جوة موبيل دي divisions مختلفة ملهاش علاقة ببعض خالص سواء Mobil downstream marketing او Mobil engine oil و محدش فيهم بيعرف اي حاجة عن التاني غير لما تتحط الannual budget بتاعت موبيل جروب كلها
عامة برضة زيوت موبيل بتتعمل او بتتعبأ هنا في مصر و دة اللي مبوظها في الغالب؛ طبعا موبيل تلام علي الموضوع دة لان في الاخر الجركل ؛) بيتحط علية اللوجو بتاع موبيل و بيسوأ سمعتة موبيل كلها

المشاركة الأصلية كتبت بواسطة Ahmed Amin

جربت تغير أماكن الكاوتش ؟

طالما محصلتش غير مرة واحدة ممكن تكون كانت من البنزين,
لو أتكررت تاني هيتسجل fault بإن فيه misfire في سلندر من الأربعة
وساعتها هيغيروهملك علي طول من غير مشاكل.

انا كنت غيرت مكان فردتين لما كاوتش اتقطع مني فحطيتة ورا. لما اعمل صيانة ال١٠٠٠٠ هبقي اعمل ال rotation و اشوف
هو اكيد الfault متسجل لأن هوا ظهر قدامي علي ال trip computer؛ فانا فعلا لو ظهر تاني هخليهم يغيروهم ان شاء الله

المشاركة الأصلية كتبت بواسطة medori

انا بفول من محطات موبيل مشهورة اوي و عليها ضغط علي طول؛ اللي في جسر السويس قبل موقف العاشر او اللي علي الدائري اللي عند ميراج او اللي في صلاح سالم بعد كوبري الجلاء
موضوع الزيت دة بيبقي deals ما بين التوكيل و الشركة المصنعة للزيت و ملوش اي علاقة بالشركة الام زي موبيل مثلا؛ و كمان جوة موبيل دي divisions مختلفة ملهاش علاقة ببعض خالص سواء mobil downstream marketing او mobil engine oil و محدش فيهم بيعرف اي حاجة عن التاني غير لما تتحط الannual budget بتاعت موبيل جروب كلها
عامة برضة زيوت موبيل بتتعمل او بتتعبأ هنا في مصر و دة اللي مبوظها في الغالب؛ طبعا موبيل تلام علي الموضوع دة لان في الاخر الجركل ؛) بيتحط علية اللوجو بتاع موبيل و بيسوأ سمعتة موبيل كلها

والله بفول من موبيل وكل الناس بتفول منها والغريبة ان برضه وقفت واتكلمت مع واحد هناك عنده نفس المشكلة ان الاستهلاك عالي قالولوه برضوا مشكلة بوجيهات وفلتر عشان البنزين اللي بتحطوا ووسالتوا بتفول منين قالي من موبيل المشكلة بقي انه راحلهم فوق ال4 مرات مرة قالولوا مشكلة سوفت ويير ولما التحديث ينزل هتتح ومرة تانية البوجيهات والفلتر والمشكلة لسه موجودة ومرة تانية اللي كنت موجودساعتها قالوا حساس الشكمان فيه مشكلة وادولوا علبة محسن اوكتان ب 120 ج يحط منها كل 5000 ك قبل مايفول وده هيظبطلك الدنيا