ألفا رميو 146 وتجربه شخصيه

**ahmed_3omda** · 21-09-2008 04:17 AM

السلام عليكم ورحمه الله وبركاته

انا برحب بجميع اعضاء نايل موتوز في موضوعي المتواضع حبداء احكي الموضوع في اطار قصـه ..بس ماحدش ينام مننا :D
في يوم من الايام كنت ماشي في شارع مصدق ف عجبتني الفا رميو واقفه قدام معرض أسمو كوني كار :D العربيه حالتها بسم الله مشاء الله اشبهه بالزيرو ف دخلت المعرض اشوف مطلوب فيها كام وموديل كام رد صاحب المعرض وقالي اتفرج عليها الاول من اول ما فتحت الباب وشدني جدا التابلوه الرياضي وقاعده عربيات السباق بصراحه :)
قالي دور العربيه استنيت لما العربيه سخنت شويه دوست بنزين وسمعت صوت ممتع للغايه بيفكرني باللامبورجيني :D وجربت الازاز الكهربه والتكييف والباور كلو تمام والباور تمام مافيش مشاكل .

جت بقا مرحله التجربه وطالع بالعربيه طبعا مش متعود عليها ف ماشي براحه وجت حته فاضيه دوست لنصف الدواسه حسيت اني مش حقدر ادوس اكتر من كدا من سرعه الاستجابه بسم الله اداء الماتور كويس

بعد ماخلصت تجربه روحنا عند المعرض واتكلمت معا صاحب المعرض قالي مطلوب 42 الف جنيه علي قد فلوسي بالضبط :D سبحان الله

طبعا نزلت بالعفيه 1000 جنيه :D ترخيص وخلافه

المهم بسئلو عن قطع الغيار قالي موجوده عن الكيلاني ويوسف وكذا واحد في التوفيقيه كنت بتعامل معاهم ايام زقزوقه :) الريتمو للتوضيح :D

طبعا روحت البيت بالصدفه وبتكلم معا ولدي عن الالفا رميو قالي ان الكيلاني دا معرفه قديمه وفعلا ولدي اتصل بيه وقالو علي العربيه قالو قطع غيارها موجوده ولكن الاجزاء الخارجيه الصاج بعض الاجزاء مش متوفره غير في الاستيراد .

وسئلنا عن سير الكتينه .. العربيه فيها اتنين سير كاتينه ب 200 جنيه الاتنين أيطالي
وجوز مساعدين اماميين غاليين شويه علشان كهربه هيدروليك ب 1200 جنيه ضمان سنتين ايطالي
وجوز مساعدين خلفي 700 جنيه ضمان سنتين ايطالي
طرومبه مايه بـ 500 جنيه أيطالي بيقول انها عندو ومافيش حد بيشتريها علشان مش بتبوظ :D
فلتر زيت 25 جنيه أيطالي
فلتر هواء 40 جنيه ايطالي
فلتر بنزين 400 جنيه ايطالي معمر جدا حسب كلامو .
تيل فيات تمبرا :)

طبعا بعد استخاره الله ربنا كرمنا بيها :)

وروحنا رفعنا العربيه في بنزينه وكان معايا واحد صحبي تاجر سيارات وقالي بسم الله كويسه بس قالي ان العربيه مالهاش سوق واعاده بيعها صعب شويه بس هيا عجبته جدا وبيلف دلوقتي بيتفرج علي الفا رميو :D

وحنبداء غدا بأذن الله

تغيير زيت وتنظيف دوره مايه فأنتظروني :D

**Ahmed Hassan** · 21-09-2008 04:32 AM

العربيه فعلا ممتازه.... بس لازم تكون صاحب مزاج جدا.. و مش ناوي تبيع,,, العربيه موديل كام؟.. و هل فيها الموتور الـ twin spark؟ و لا الموتور الـ boxer؟

التكييف اللي فيها KLIMASYSTEM و لا عادي؟ هتلاقيه مكتوب عليه. و الفرامل ورا ديسكات و لا DRUM؟ لو كانت ديسكات يبقى فيها ABS (لو كانت بالموتور ال twin spark)

العربيه فعلا قطع غيارها موجوده عند الكيلاني... وفيها حاجات كتير مشتركه مع التيمبرا و التيبو (بس مش في الموتور). طرمبه الميه احنا مغيرنها من عند الكيلاني ...بس السعر مش فاكره... ممكن اجيبهولك لو تحب.

العربيه بتجري جدا... بس صوت موتورها عالي في الصلانسيه و السرعات البطيئه (ممكن سعات يبان انه ديزل من صوته!!)

استهلاكها في ا لبنزين عالي حاجه بسيطه جوه البلد... لكن في السفر عادي.

لازم تخلي بالك جدا من مواعيد تغيير الزيت.. و يستحسن تغيره بدري شويه... و تكشف عليه باستمرار لأن العربيه دي حساسه لنقص الزيت... او انخفاض لزوجته.

**ramyso4** · 22-09-2008 02:16 PM

المشاركة الأصلية كتبت بواسطة Ahmed Hassan

.

بس صوت موتورها عالي في الصلانسيه و السرعات البطيئه (ممكن سعات يبان انه ديزل من صوته!!)

.

ده عيب معروف فكل الألفا روميو البمواتير twin spark ال-variator بيبوظ وبيخلي صوت العربية زي صوت الديزل وتمنه ألف جنيه وبيبوظ تاني فالناس بتنفض وتسيبو كدة عشان مش بيأسر ف حاجة هو بيخلي العربية تاكل بنزين أكتر سنة و خلاص

**Sharky** · 22-09-2008 02:31 PM

المشاركة الأصلية كتبت بواسطة ramyso4

ده عيب معروف فكل الألفا روميو البمواتير twin spark ال-variator بيبوظ وبيخلي صوت العربية زي صوت الديزل وتمنه ألف جنيه وبيبوظ تاني فالناس بتنفض وتسيبو كدة عشان مش بيأسر ف حاجة هو بيخلي العربية تاكل بنزين أكتر سنة و خلاص

طب هل موجود نفس العيب برضه فى مواتير البوكسر ؟

**theking2690** · 21-09-2008 05:12 AM

الف مبروك على العربيه يا باشا و ربنا يجعلها وش السعد عليك

**hazem_khidr** · 21-09-2008 05:53 AM

الف الف مبروك يا ابو حميد
بقي كده يا راجل من غير ما تقولي.
الالفا روميو عربيات محترمه جدا علي فكره.
و لو عندك اتنين سير كاتينه يبقي موتورك البوكسر 100 حصان 1600
الموديل دا سنه 97 او 98 كان بيلعب في التمانينات زيرو
عربيه ممتازه و برستيج بس حافظ عليها بلاش تهينها.
و ربنا يديك خيرها و يحميك من شرها يا رب
مستني الصور :)

**HISHAM80** · 21-09-2008 10:45 AM

Mabroooooooooooooooooook

**Ahmed Hassan** · 21-09-2008 02:01 PM

على فكره... العربيه لو موديل 97 او اعلى يبقى فيها الموتور الـ twin spark.... مش البوكسر و ده احدث و اقوى كتير من الموتور البوكسر اللي كان موجود في موديلات الـ 146 قبل سنه 97

**Nader** · 21-09-2008 02:26 PM

الف مبروك على الافا وربنا يبارك لك فيها

عاوزين صور لها بقى.

**douha_wise** · 21-09-2008 02:36 PM

ربنا يباركلك فيها يا احمد و يعطيك خيرها و يكفيك شرها و يحفظك و اياها من كل شر و سوء
بس متنساش يا صاحبى انا لية عندك لفة و عايزين مقابلة سريعة جدا ان شاء الله فحاول انت و بسام ترتبوا مقابلة سريعة فاااااااااهم !!! و مش كل مرة سيادتك تزوغ

الموضوع: ألفا رميو 146 وتجربه شخصيه

LinkBack

أدوات الموضوع

عرض

العرض المتطور

ألفا رميو 146 وتجربه شخصيه - انشر الموضوع فى :

-

-

-

-

-

-

-

المواضيع المتشابهه

عربيتي الالفا رميو 146

السيفيك وتجربه جديده ,,, بنزين 95 :)

الفا رميو

حكايه مع الالفا رميو

العربيه اتسرقت وتجربه شديييده الصعوبه !!!

الكلمات الدلالية لهذا الموضوع

المفضلات

المفضلات

ضوابط المشاركة