الموضوع: حرام ولا حلال اللى بيحصل ده يا جماعه !!!!!

المشاركة الأصلية كتبت بواسطة Dr Ahmed

وحاجة كمان
اللى مرمى على الأرض ده معندوش وقت يستنى الإسعاف أو النجدة
أنا شفت لحظى السئ فيديو على ميتاكافى لترلة خبطت واحد سايق موتوسيكل وبعدين مشيت عليه مرتين .. مش هقول لكم الراجل حصل له إيه لأن مجرد ذكر اللى حصل متعب لأقصى درجة
فسواء لينا خبرة فى الإسعاف أو لا فأول هام نبعد البنى آدم ده عن الخطر لإنه مش هيستنى عربية الإسعاف ولا النجدة - كأنك معدى على واحد بيغرق أو مولّع أو واقع فى بلاعة وماشى عادى وجايز تفكر تتصل بالنجدة!! .. ما إحنا عارفين النجدة بتاعتنا - لو وصلت هتوصل إمتى!!! دا إذا وصلت أساسا!! فأكيد طالما حياته فى خطر شديد لازم تمد له يد العون بسرعة..

بس.. ويارب ما نتحط فى الفتنة دى ويارب ثبتنا على الصح لو قابلناها ويارب ما تحطنا مكان اللى محتاج مساعدة من البشر وإرحمنا برحمتك جميعا وسلم طريقنا كلنا

وبأحيى أخويا الفاضل سامح على التنبيه الصحيح للآية الكريمة (ولا تلقوا بأيديكم إلى التهلكة) لإنها فعلا من الآيات المظلومة بيننا فى إستخدامها دايما فى غير موضعها

المشاركة الأصلية كتبت بواسطة Dr Ahmed

تخوفات المعترضين جايز تكون منطقية دنيويا
بس مش هتنفع فى الآخرة لما يسألك ربنا عن الروح اللى كنت تقدر تنقذها وهربت منها

وإذا كان الله فى عون العبد مادام العبد فى عون أخيه
وإذا كان بيفرج عن العبد كربة من كربات يوم القيامة لو فرج عن أخيه كربة فى الدنيا

يبقى هنروح فين فى الدنيا والآخرة؟

يا د. أحمد : كلنا بنخاف من ربنا و من الثواب و العقاب ، و كما تدين تدان ، و كلنا ممكن نشرب من نفس الكأس (اللهم أحفظنا) ، أصلا ماحدش قال نمشى و نسيبه ، قلنا نتصل من اى مكان من غير ما ادخل رجلى فى الموضوع ، و بعدين مش بنتكلم على اللى خبط واحد لا قدر الله ، لو راجعنا هنلاقى كل اللى حصل معاهم كده اتحملوا المسئولية و وصلوه للمستشفى و بيتحملوا تبعات كده سواء هما غلطانين أو لأ ، ربنا يحفظنا و يكفينا الشر جميعا
احنا الكلام ابتدأ أصلا على اللى تلاقيه مخبوط و مرمى فى الشارع و اللى خبطه هرب و سابه ، هنا اللى بنقول بلغ بس بدون ما تقف له علشان ما تتحملش خطأ غيرك و تدفع انت الثمن بداله
و بعدين ممكن نتكلم بواقعية شوية يا د. أحمد : واحد على طريق سريع مخبوط بعربية سرعتها على الطريق ده لن تقل عن 60كم/ساعة و واقع على الأرض ، اول حاجة حضرتك ها شك فيها ان عنده كسر فى العمود الفقرى أو فى الجمجمة (و خاصة قاع الجمجمة) ، و سعادتك سيد العارفين ان تحريك المصاب فى ظروف زى دى ممكن يتسبب له فى شلل ده غير انه خطر على حياته ... و طبعا كلنا عارفين تعليمات الأسعافات الأولية بعدم تحريك مصاب حوادث الطرق و الموتوسيكلات علشان السبب ده و لابد من انتظار الأسعاف علشان معاهم الرقبة اللى بتثبت الفقرات العنقية و تمنع اى حركة لها فتحافظ عليه من الشلل أو الوفاة ، و تثبيت الظهر لو فيه اشتباه اصابة فى العمود الفقرى
و ده موجود فى الأسعاف ، و طبعا مش مع اى فرد سايق ، و كتير مالهومش خبرة ازاى يعمل كده (و احيانا أطباء ماتعرفش ازاى تعمل كده للأسف)
فهل سيادتك تفضل انى أكون المتسبب فى شلل أو وفاة الشخص لأنى حركته (حتى لو بنية كويسة) ، ده غير المخاطرة بوقوع حادثة تانية بسبب وقوفى و جريى فى نهر الطريق علشان أوصل له ؟؟
أنا عن نفسى شايف ان الأسعاف فرصتها أحسن بكتير عن أى واحد فينا ، و علشان كده بأويد الأتصال بيها ، و لكن برضه من غير ما رجلى تيجى فى الموضوع
و على فكرة ، أنا فى كلامى كله ما دخلتش فى نقطة التهور لعبور الطريق من أماكن غلط ، مع انى مقتنع فعلا ان اللى بيعمل كده يبقى زى المنتحر ، و المفروض ان مالوش دية ، و لكن مش موضوعنا علشان كده مش بافتح النقطة دى فى الحوار

المشاركة الأصلية كتبت بواسطة Dr Ahmed

وأظنه هو وأهله يفضلون حتى كونه معاقا عن كونه ميّت متقطع..

لأ يا د/ أحمد
أحيانا وفاة الإنسان بتكون رحمة من ربنا عن معاناته و أهله بسبب حدوث اعاقة
طبعا لو حصل بيكون امتحان من ربنا و جزاء الصابرين عظيم
لكن والله العظيم و شفتها بعينى أحيانا الإنسان أهله بيتمنوا موته رحمة ليه و ليهم
و أحيانا هو نفسه للأسف بيتمنى كده
دى وجهة نظر من هذه النقطة فقط