الموضوع: حرام ولا حلال اللى بيحصل ده يا جماعه !!!!!

طب انا بقى هحكيلكو حكايتي اللي تضحك قعلا
من ايام اعدادي كده فالكليه او بعديها بسنه انا كنت ماشي فألماظه قدام الملحق العسكري لسفارة الامارات بعربيتي وواتنين من بتوع الدليفري بتوع السوبرماركتات والدراي كلين اللي بيوصول الجات فالسبت اللي وراهم فالعجله عاوزين يعدوا الشارع الواسع ده بالعرض بالعجل والحته واسعه وانا ماشي على 60 قلت استنى الراجل يعدي هديت ل 50 على اني اكمل واقف لقيتو وقفلي قلت اعدي لقيتو بيعدي هديت شويا كمان وهوه وقف جيت اعدي اتحرك فوقت مينفعش فيه الحركه لمست طرف العجله القدماني بطرف الاكصدام من اليمين لقيتو هوا اتنطر جوا العربيه عندي واتكسر البربريز وشوية اصابات فالصاج كده وشوفت الراجل اتنطر على الارض و بيتزحلق على وشه على قزاز العربيه قلت خلاص كده مش هيتقلي يا باشمهنس طول حياتي ويبقى حلو بقى كده لو اطلع مالسجن بعد تلات سنين ولاحاجه وقفت طبعا وحتى لو مكنش حصل حاجه للبربريز كنت هقفوقبل مانزل من العربيه اتاكدت اني مش سايب لا مفاتيح ولا اي حاجه فالعربيه تتسرق عشان والواحد بيتكلم وكنت عامل حسابي على خناقه والحمد لله اللي هداني لكده ونزلت الاقي الراجل والله لواحده لقيته بيقولي اتكل على الله انت انا محصليش حاجه الحمد لله انها جت على قد كده مادام الواحد بصحته كل شيء مفيش مشاكل وربنا يعوض عليك .... دا كان كلام اللي اتخبط طبعا الواد اللي كان بيعدي معاه راح خلاه يفرد ضهره كده فالجزيره اللي فالنص وانا بدأت اطلب فالاسعاف لقيت ان امن الملحق العسكري الاماراتي طلبها لوحده وبلغ عن الحادثه فقسم النزهه عشان ييجي وهوه كان امين شرطه وتقريبا شاف الحادثه بعد ما حصلت مش وقتها المهم لقيتلك الناس اتلمت وصاحب المحل اللي بيشتغل فيه جي وهوه شخصيه حد بعتلو قالو تعالى شوف الواد اللي عندك خبطتو عربيه المهم جي يكلمني بيقولي اتقو الله اييييييييييييييه الدنيا هطييييير حد يخبط حد على 140 قلتلو 140 ايه ياراجل يا مفتري العربيه دي لو جابت 140 خدها حلال عليك مش عاوز ابوها... قالي انت معاك رخصه قلتلو اه قالي تسمح توريهالي قلتلو اوريهالك مين يا عم... انت في حاجه فدماغك ولا ابوك وانت صغير كان بيجبلك بدلة ظابط كل عيد ... انت عبيط فدماغك ولا ايه... وقعدت اديهمو شويه وقولتلو انا مش مطلع رخصتي الا لظابط...وخد دي كمان انا بس عشان الراجل الطيب اللي قاللي روح ربنا يستر طريقك ده انا مش عايز اتكلم بس معلش يعني محدش يعدي بعجله بعرض الطريق وبيزحف بيها كده وده مش مكان عبور مشاه وريني فين خطوط المشاه ثانيا العجله مركبه زيها زي العربيه عاوز يروح الناحيه التانيه من الطريق يمشي 50 متر هيلاقي يوترن ياخدو ويرجع يكمل طريقو انما يعدي وبيكحت برجل ورجل تانيه عالبدال اهو اتلخفن ومعرفش يوقفها ... المهم الراجل راح مستشفى هليوبوليس واتعملو 14 غرزه فوشو وابويا عرض عليه عملية تجميل رفض مبلغ تعويضي رفض قال مبيقبلش العوض والراجل جزاه الله كل خير مخدش حاجه مين بقه اللي ياخد؟!!! الشاويش بتاع القسم ده عشان يقفل المحضر لهف من ابويا 100 بلبل وانا عارف انها اشتغاله بس مش عارف اعمل ايه اما عرفت تاني يوم كنت هموت من الاكتئاب عالمية جنيه دولم كانو راحو للراجل اللي خد 14 غرزه حتى احسن .......... ده اللي حصلي والحمد الله انها حاجه بسيطه بس عاوز اقولكو ان انا عملت الحادثه 8 بليل خلصت المحضر الساعه 6 ونص الصبح ودا كلو يدوبك قضيه من غير قضيه فعليا امال بقى لو كان لا قدر الله عاهع حصلت ولا وفاه كان ايه اللي هيحصل ... ربنا يستر
بس عندي حكاية تاني لواحد صاحبي حصلت بعد يوم او يومين من بعد ما حادثتي حصلت ايه الفرق بيني وبينو هوه خبط طيار ديليفيري وقع فالارض وطلع صاحب المطعم اللي بيشتغلو فيه متفق مع مستشفى كل ما حد من اللي عندو يتخبط يضربولو اوراق وحاجات ب 21 يوم فايلبس كده اللي خبطه قضيه ويبقى مستعد للتفاوض على اي مبلغ عشان يطلع منها وصاحبي بعد ما خبط الواد نزل وساب العربيه فيها المفاتيح راحم خدو مفاتيح العربيه منو وقالولو فين رخصتك وبطاقتك خدوهم منو وراحو عالمستشفى اياها وضربو العاهه التمام والواد في ليلتها بات فالتخشيبه والواد حكالنا يعني ايه تخشيبه ..... انا مش عايز احكي عشان لازم هتعدي على الفاظ كده مينفعش تتقال فرمضان فانا ممكن كده فالعيد ابقى احكيلكم يعني ايه تخشيبه وبعد كل ده ابوه دفع 5 بواكي عشان ابنو يطلع منها ومتبقاش قضيه ...

همه دول حكايتين حبيت احكيهم انما انا رأيي المساعده من بعيد دا حل وسط كويس الا لو كنت محامي شاطر زي مرتضى منصور كده يعمل اللي هوا عاوزه انشالله يدوس عالميتين والصاحيين والناس كلهم هيعرف يخرج نفسو منها.

بس بصوا للموضوع ككل اغلبية الناس اللي احنا بنقول عليهم متخلفين اللي همه واقفين على الاوتوستراد على جمب و طرف الجلبيه فسنانه ومستني يجري قصاد العربيات عشان يعدي وكل ده تحت كبري المشاه دول اغلبهم عالم جهله متعلموش او تعليمهم على قدهم متبصوش لينا احنا من صغرنا بابا وماما كانو بيقولولنا بصو يمين وشمال قبل ما تعدو انما دول بقى بسطاء هيتعلمو قوانين مرور فين طب انا فاكر ان الحضانه بتاعتي فالسعوديه كان فيها زي طرق واشارات على صغير زي اللي فاغنية ليلى نظمي اشارة المرور بتقولنا انتباه دي وكنا بنتدرب عليها كل ترم مره فازاي نعدي ويجي حد يشرحلنا قوانين المرور يعني مثلا وانا عندي 5 سنين عارف ان الحاره اليمين فالاشاره لازم تبقى فاضيه عشان الناس اللي بتخش يمين مبتقفش فالاشاره وكده يعني وكان بيجيلنا دكاتره تقولنا ازاي نعمل اسعافات اوليه ..... دا فحضانه ياخونا واتكرر معايا الموضوع فابتدائي واعدادي.

ونيجي للحكومه مهي لازم تحط تشريعات تحفظ حقوق الناس هيه الغلطه فالتطبيق والاستسهال محدش عاوز يحقق ويشوف مين اللي غلطان هوه اقفش فاللي قدامك وخلاص و فنفس الوقت لو تساهلو اي حد يتخانق مع حد يقتلو بعربيتو وتبقى قتل خطظا وخلاص.

تيجي بقه لضعف نفوس الناس المخبوطه ةاهاليهم اللي بيعتبروها فرصه و دا برده من الجهل يا جماعه الناس دي اتعلمت غلط واتربت غلط وحتى الدين والعقيده والحاجات دي عندهم غلط في غلط فا هوه من جوا مش شايف انو بيعمل حاجه غلط اما بيتبلى على انسان و مش شايف حاجه غلط اما يكسر عربيه لحد خبط حد من قرايبو رغم ان قريبو ده ممكن بيعدي على كوبري واتخبط وهوه اللي غلطان بس الجهل يا جماعه وحش احمدو ربنا ان انحنا وعينا عالحياه لقينا اللي ودانا مدارس نضيفه وفضل ورانا لغاية ما دخلنا جامعات وفهمنا وبقينا اشخاص ان شاء الله ربنا مديها القدره انها تشيل البلد فالفتره القادمه وان شاء الله نخليها احسن.

والجهل مسؤوولية وزارة التعليم والداخليه اي الحكومه

معلش انا طولت عليكم بس كنت بفضفض ياخونا والموضوع جميل فعلا وكويس انو اتفتح لأنو موضوع محير وانا قلت اللي عندي ويارب اكون قدرت اوصولوا