اركب المواسير ولا لاء

**saddam** · 12-01-2014 07:15 PM

صديقي المواطن
مشكلة سوء إدارة بلد ومنظومة فشل وفساد ولا حل لها سوى حلين يا إما تبيع وتعزل في كمباوند يا إما بصفتك الوريث الوحيد تفتح فتحة في شقة في الدور اﻷرضي ودخل العربية فيها أنا عن نفسي بصفي وحعزل قريب بإذن الله وأشوف أي كمباوند في زايد أو أكتوبر و حتفضل تلاقي مكان تركن فيه حتى.بعد 200 سنة ﻷن المشاريع دي بتبقه مقفولة ومفيش فيها لا تعلية أدوار ولا هد وبنا عشوائي كل دقيقة وحتعيش عيشة نظيفة صدقني الزحمة والزنقة سبب 90% من اﻷمراض والعلل اﻹجتماعية المصرية
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**canner** · 12-01-2014 07:59 PM

معلش انا رأيى مش ح يعجبك و مش ح يعجب ناس كتير
1- لو عملت كده و غيرك قلدك ح تبقى سنيت سنة سيئة و ح تاخد ذنب كل واحد يعمل زيك
2- لو عملت كده و جه واحد يجى يركن و يلاقيك حاطط السلسة و عربيتك موجودة او مش موجوده ح يقول حسبى الله و نعم الوكيل
3- لو ربنا جه سألك يوم القيامة عن السلسة دى ح يبقى احسن انك كنت ركبتها و لا لأ
4- لو وضعت عنك هذه الفكرة من اجل الله تعالى ربنا ح يجازيك عنها حتى لو مش فى العربية
5- لو الاذى جه فى العربية يبقى الحمد لله تعالى و ما تعرفش فدى ايه بداله

فى الاخر تقبل كلامى فانا و الله لا اريد لك الا الخير

**salodas** · 12-01-2014 08:36 PM

المشاركة الأصلية كتبت بواسطة canner

معلش انا رأيى مش ح يعجبك و مش ح يعجب ناس كتير
1- لو عملت كده و غيرك قلدك ح تبقى سنيت سنة سيئة و ح تاخد ذنب كل واحد يعمل زيك
الراجل هيركن عربيتة مش هيعمل معصية.

2- لو عملت كده و جه واحد يجى يركن و يلاقيك حاطط السلسة و عربيتك موجودة او مش موجوده ح يقول حسبى الله و نعم الوكيل .
خد حقك قبل ميتاخد منك .

3- لو ربنا جه سألك يوم القيامة عن السلسة دى ح يبقى احسن انك كنت ركبتها و لا لأ
الله أعلى وأعلم .

4- لو وضعت عنك هذه الفكرة من اجل الله تعالى ربنا ح يجازيك عنها حتى لو مش فى العربية
أكيد ربنا هيجازية طبعا ... واكيد برضو مش هيلاقى ركنة .

5- لو الاذى جه فى العربية يبقى الحمد لله تعالى و ما تعرفش فدى ايه بداله
لا تلقى بانفسكم فى التهلكة .... ميبقاش ابنى فى ايدى وأروح أدور علية .

فى الاخر تقبل كلامى فانا و الله لا اريد لك الا الخير

تقبل مرورى

**Elawany13** · 13-01-2014 09:38 AM

للأسف السلسلة والماسورة مش حل
ويتظلم غيرك
هتحل مشكلتلك لحظيا وبتخلق مشاكل عديده بعد كده
بالمنظر ده وبالتفكير ده ابقى قابلنى لو عرفت تركن بعد كده فى اى مشوار انت روحته
لإن ببساطة كل واحد مننا هيعمل زيك ويدق ماسورة ويحجز مكان ركنته
وكل واحد يسيب عربيته فى الشارع تحت بيته وخلاص
ده غير اعاقة المرور فى الشارع حتى ولو مفيهوش عربيات بسبب الطوب والمواسير
انا لما بعدى من شارع مدقوق فيه مواسير بدعى على اللى عملها
مش علشان الركنة لا علشان مجرد المرور
عربية جايه وعربية رايحة ولا تاكسى عاوز ينزل زبون ومواسير يمين وشمال

**أبو آسر** · 13-01-2014 10:17 AM

من حقك تركن أمام بيتك ومحدش يركن مكانك وتحجز مكانك وده مفيهوش أي حرج ولا حرمانية ولا يدخل في باب سن سنة سيئة لأن دي وسيلة للحفاظ على حقك من أن يسلبه منك غيرك ومش بتعمل معصية علشان يتقال إنك بتسن سنة سيئة لكن لو حد قلدك في حاجة مش ملكه يبقى هو اللي هيتحاسب عليها لوحده مش انت زي واحد اشترى كمبيوتر علشان يتعلم علوم نافعة ومفيدة قام جاره مقلده واشترى كمبيوتر زيه بس علشان يتفرج على أفلام مش كويسة ! فهل يتقال إن الأول هيتحاسب على سن سنة سيئة ؟!
ده بالعكس ممكن يكون ده مستحب كمان لو هتحصل مشاكل من ناحية إن حد ركن مكانك وحجز المكان لفترة طويلة وجيت كلمته مثلا معجبوش الكلام حصلت مشكلة وخناق ... إلخ فانت في غنى عن كل ده خد مكانك فقط ولا تعتدي على حق أحد
للأسف طالما مفيش قانون في البلد وكله بيمشي بمزاجه فلازم كل واحد ياخد حقه بدراعه ولو معملش كده هيتاكل ويموت كمدا وقهرا وهيظنه الناس ضعيف وهيستغلوا ضعفه في أذيته لكن لو كل واحد أخد حقه بدراعه وبما يرضي الله بدون اعتداء فربنا قال (ولمن انتصر بعد ظلمه فأولئك ما عليهم من سبيل # إنما السبيل على الذين يظلمون الناس ويبغون في الأرض بغير الحق)
والله أعلم

**محمد يوسف** · 15-01-2014 10:25 AM

أنا شخصيا باكره المنظر ده جدا وبادعى من قلبى على كل واحد بيعمله لأنه أذى للناس وباعتبره نوع من البلطجة والفتونة... انت حضرتك ممكن توصى البواب يمنع حد يركن غيرك قدام بيتك لكن دق المواسير ده تصرف غير حضارى ...ومتهيألى (مش متأكد ) فيه فتوى ضده

**w-m-a** · 15-01-2014 04:20 PM

بص يا سيدى هو فى حركه تانيه بتريح شويه بس بتعتمد على ادب الناس عندك فى الشارع
تجيب 3 بستلات بويه او بالونات موتور المياه
وتملاهم اسمنت وزلط وترشق فيهم ماسورة
وممكن تربطهم بسلسله
وفى الحاله دى انت حاجز المكان لكن لم تقطع الطريق او تؤذى احد
لو فى طوارئ وحد محتاج يركن او يعدى عربيه هيتاخرهم على جنب
بس هذا يعتمد على ادب وذوق الناس فى الشارع

**khaled_sabry** · 16-01-2014 06:44 AM

المشاركة الأصلية كتبت بواسطة w-m-a

بص يا سيدى هو فى حركه تانيه بتريح شويه بس بتعتمد على ادب الناس عندك فى الشارع
تجيب 3 بستلات بويه او بالونات موتور المياه
وتملاهم اسمنت وزلط وترشق فيهم ماسورة
وممكن تربطهم بسلسله
وفى الحاله دى انت حاجز المكان لكن لم تقطع الطريق او تؤذى احد
لو فى طوارئ وحد محتاج يركن او يعدى عربيه هيتاخرهم على جنب
بس هذا يعتمد على ادب وذوق الناس فى الشارع

اشكرك على الفكره دى
و هى مطبقه برضه فى شارعنا من قبل بعض الجيران - بس االكلام ده لما بيخرجو ساعه او اتنين و يرجعو على طول
لكن ماتنفعنيش للاسف لأنى بنزل من الساعه 7 الصبح و برجع على الساعه 6 او 7 المغرب
ده غير ان لو حد اتزنق مثلا من العربيات الماره فبتلاقيه بيزق الحاجز و مش بيرجعه تانى مكانه
و بعد كده بيجي احد الجيران اللى مش بيبقى واخد باله اصلا من الحجر و بيركن عادى

على فكره انا لغايه الناهرده راكن العربيه تحت البيت بقالى اسبوع بسبب القصه دى
و يتهيألى ركنى لها بشكل مستديم بيعيق المرور اكتر من لو كنت حاجز المكان بمواسير

و علشان مايبقاش فيه سوء فهم انا ناوى اعمل مواسير على بعد متر مثلا من الرصيف بحيث امنع الركن (لأن فيه ناس تانيه بيعملوها على بعد 2.5 متر علشان العربيه تدخل و يقفل وراها )