الموضوع: رابطه مالكي الباسات b5&b5.5 من 1996 الي2005

المشاركة الأصلية كتبت بواسطة mo3az elgohary

السلام عليكم يا احلي منتدي
انا لسه متابع الموضوع بقالي كام يوم و مسبتش صفحه واحده مقريتهاش بجد استفدت كتير وخصوصا من الاستاذ احمد سعد والله مشاء الله عليك ربنا يحفظك انسان محترم اويييييييييي والله مش بتمل او تزهق او تبخل باي معلومه علي حد رغم ان في اساله كتير متكرره لكن حضرتك بتكتبها تاني بالتفصيل ربنا يجازيك خير علي تعبك ده :)
و معلش انا كان عندي استفسار خارج عن الموضوع شويه وكنت عايز خبرت حضرتك فيه :) انا من عشاق الجولف 4 بس لما قريت الموضوع ده اتشديت اوي للباسات بس في حاجه محيراني شويه ازاي الباسات فئة اعلي من الجولف لاكن سعرهم متقارب جداا هل الباسات اعطالها كتير ولا مش عمليه زي الجولف ولا ايه الحكايه وانت تفضل ايه جولف 4 ولا باسات b5 ؟ مع الافتراض انك مش فارق معاك شنطة العربيه, مع ذكر سبب اختيارك و معليش سؤال كمان ايه هو متوسط سعر الباسات في وقتنا الحالي ؟؟ هل هو فعلا من 65 ل 70 ولا من 75 ل 80 ؟؟!
وشكراا لك علي تعبك و مجهودك المتميز :)

ياباشا الله يخليك ودا واجبي تجاه الاعضاء والاصدقاء مبدايا كده مقارنه الجولف بالباسات مش هتنفع لان دي حاجه ودي حاجه تانيه الباسات سياره مصنفه سياره فارهه والموديل ده من الباسات مشترك مع الاودي a4 في العفشه والموتور والشاسيه والكهرباء ولما كنت بشتري عربيتي كنت بشتريها من واحد معاه من الزيرو وحلفلي انها كانت ب175000ج سنه 2000 ايام ماكان الدولار ب3.5ج م يعني احسب لو دلوقتي تبقي بكام تقريبا هتبقي الضعف وده تقريبا سعر الاودي 2014 اللي في مصر دلوقتي يعني الباسات عربيه فارهه عن الموديلات اللي نزلت بعدها مشكله العربيه دي انها لما كانت جديده كان صباح الخير ياتوكيل كده تدفعلك مش اقل من500ج في صيانه طبعا سنه 2000 كانوا حاجه كبيره ده غير ان كان قطع غيارها زي البي ام في الغلو ويمكن اعلي في حاجات ولاكن دلوقتي مفيش الكلام ده قطع غيارها ببلاش وارخص من الياباني زي البومه مثلا بس هيا كعربيه طبعا مالهاش حل لو نضيفه والله بدون مبالغه انا عمي معاه فانتازيا ولما بركبها بحس انها اقل من عربيتي في الثبات والخامات بس هيا طبعا متطوره اكتر وابشنز اعلي فرق السن اكيد عموما الباسات عربيه مختلفه كليا عن الجولف 4 وقطع غيارها معمره جدا واقوي واتقل من الجولف 4 اغلي حاجه فيها طقم المقصات الامامي وتمنه الفيبي وده انضف حاجه 3500-4000ج وهما عباره عن 8 شدادات و2 شداد ميزان و2 باره دريكسيون وفيه طقم اسمه توبران ب2500ج وده كويس والاستيراد ب1200ج كاملين وتاني حاجه فيها انها معقده شويه في شغلها يعني لازم متخصص فولكس فاجن يشتغل فيها ويكون فاهمها يعني مش اي حد هيعرف يشتغل فيها لانها مختلفه في شغلها ومبادئها كسياره عن باقي السيارات في العفشه بالذات غير انك لو من هواه الجري بتبقي مش حلوه معاك ده بالنسبه لل1600 لانها عربيه تقيله اوي دي عيوبها اما الجولف عموما فدي سياره شبابيه ورياضيه وطياره فولكس فاجن علي الارض عربيه مالهاش حل في الجري والثبات والمناوره العاليه جدا بالذات لو متسقطلها 1800 تربو بتبقي غبيه في الجري والتجميع وطبعا ده نظرا لصغر حجمها وخفه وزنها بما لايؤثر علي الثبات وعربيات الجولف معروفه من زمان لا غبار عليها بس متعتها في الجري والشد والغرز اما لو انت مش من هواه الجري وكده فهتحس انها عربيه مش عائليه لانها صغيره من جوه وشنطتها صغيره وبرضه دي من وجهه نظري اما ممكن يكون ليك وجهه نظر اخري وحسب مزاجك وكمان لاني طويل فالجولف لما بقعد فيها برجع الكرسي لورا فمحدش هيركب ورايا خالص وبالنسبه للجولف فقطع غيارها كتير اوي واكتر من الباسات كمان لانها مشتركه مع البورا والاوكتافيا a4 والاودي a3 والسيات توليدو فقطع الغيار موجوده واسعارها برضه مش غاليه وان كانت فيها حاجات ارخص من الباسات وحاجات اغلي علي حسب وفي حاجات مشتركه بس مش كتير وطبعا سبب تقارب الاسعار ان الجولف 4 مطلوبه والباسات كله بيخاف منها لان الكل فاكر ان قطع غيارها مولعه نار ولاكن مفيش الكلام ده ده غير اعتقاد الناس بان عفشتها بتبوظ بسرعه وبرضه ده اعتقاد الناس لان اي عربيه في الدنيا لو حططلها قطعه غيار مضروبه اكيد مش هتعيش زي الاصليه او القطعه النضيفه عموما وسعر الباسات النضيف بيبتدي من 70000وممكن توصل الي 80000لو عربيه حاله وفابريكا بره وجوه ومفيهاش الهوا واللي اقل من 70000ج بيبقي محتاج شغل في العربيه طبعا انا بتكلم علي الموديل الشكل بتاع 2000 ال2001 بتعلي شويه وممكن توصل 85000ج للنضيف منها وحاله شاذه فعموما شوغ انت متطلباتك ايه عاوز عربيه عائليه يبقي الباسات علي طول عاوز عربيه شبابيه وجرايه يبقي الجولف 4 وعموما زي ماقولتلك الالماني قطع غيارها معمره جدا والعربيتين مفيهومش اعطال شائعه والالماني القديم كله احسن من الجديد في كل الموديلات فشوف انت هتعمل ايه وربنا يوفقك للاصلح واي استفسار انا تحت امرك

المشاركة الأصلية كتبت بواسطة muhammad 80

امبارح أول مرة أكلم مشرفنا الجميل منسق القسم أحمد سعد أستشيره فى مشكلة فى العفشة وما شاء الله عليه موسوعة والأهم أخلاقه وذوقه واهتمامه بمساعدة الناس ربنا يكرمه
بجد الواحد بيكون سعيد جداً لما يلاقى ناس بتساعد وتهتم من غير سابق معرفة ولا مصلحة إلا حب مساعدة الناس
ربنا يجازيك خير ويكرمك :)

يامحمد باشا ده لا شكر علي واجب واهم حاجه ابقي طمنا عملت ايه

امبارح وانا راجع من السفر كنت مفول العربيه قبل ماتحرك واتحركت من القنطره الي حلوان مسافه 236كم وكنت ماشي بسرعه 120كم/س والطريق مفتوح وماشاء الله العربيه عملت معايا استهلاك قياسي للبنزين انا صورت العداد بعد ماوصلت الي حلوان هتلاقوا مؤشر البنزين نزل شرطه وعداد الرحلات عامل 236كم الشرطه دي تساوي 10لتر بنزين والحمد لله العوامه والمؤشر عندي تمام كله يشوف الصوره ويقول ماشاء الله