آسف جداً اتأخرت فى التقرير بتاعى :) نظراً لبعض الظروف
المهم حقول النقط المهمة لأنى أعتقد انها حتفيد ناس كتير
المشكلة كانت العربية لما بعدى بعض المطبات الرخمة شوية أول ما أعدى بالفردتين اللى قدام العربية بتنزل تهبد على المطب أو ساعات تحك جامد من تحت
بالنسبة للفحص رفعنا العربية وكشفنا على المساعدين والمقصات واليايات والتشخيص جلب المقصين قدام تحت (العدلين مش المحنيين) بايظين
الحل جبنا جوز مقصات جداد (نوع اسمه rts ألمانى وتمنهم ٩٠٠ جنيه للمقصين)
الحقيقة مكنتش مقتنع أوى بالموضوع بس بعد التغيير فرق كتير فعلاً الأداء وحتى الآن متكررش موضوع الهبد والحك على المطبات الحمد لله
بعد كده قالولى روح اظبط زوايا بس وانا ماشى بقيت اسمع صوت زى نشر الألوميتال وأنا ماشى ومع الفرامل بحس الدواسة بتتهز جامد وبتبان اوى لما اهدى بالعربية جامد لما سرعتها تقل وتقرب تقف
رجهتلهم فحصوا التيل والطنابير وقالولى كان فيه صفيحة بتحك فى الطنبور وعدلناها
مشيت لقيت الأمور احسن وهى ماشية بس موضوع الفرامل لسه فقالولى اظبط زوايا الأول
رحت بريدجستون اظبط زوايا وقالى خلى العفشجى يظبط العجلة اليمين نص درجة للخارج والشمال نص درجة مش فاكر فى اى اتجاه عشان متحدفش منك يمين ولو مش حاسس بيها اوى نظبط على كده فقلتله اظبط المهم ظبط الزوايا على كده وخرجت لقيت الفرامل احسن لكن مازال العيب موجود بيبان لما اهدى جامد
رجعت تانى لمركز الصيانة واحنا بنتكلم الميكانيكى بتاعهم سمعنا فقالى دى عيب abs
بصراحه كلامه مش مقنع حط العربية على الجهاز مقالش فيه مشكله
رفعنا العربيه وفكينا الحساسات من جنب العجل قدام من جوه لقينا الحساسات فعلا عليها شحم خفيف وتراب
رشوهم بال wd 40 ونشفوهم وركبنا وطلعت اجرب
لقيت الدنيا ظبطت وزى الفل بصراحة كنت مستغرب اوى من التشخيص ده ومكنتش مقتنع خالص بس النتيجة هى اللى حكمت فحبيت احكيلكم القصة دى يمكن حد منكم يواجهها فيبقى عارف المشكلة فين بدل ما يلف ويدور زى ما حصل معايا
المفضلات