الموضوع: أعلن ندمى الشديد على شراء المسماه 301

المشاركة الأصلية كتبت بواسطة eggroup

المقاله دى علشان أحذر أى واحد حينضحك عليه زى ما أنضحك عليا .. إن سعر العربيه رخيص و العربيه فرنساوى تقفيل أسبانى زز يعنى أوروبى بالكامل و أحسن من الكيا الكورى!!

أنا أشتريت السيارة لزوجتى بناءا على ما سبق و خد عندك يا سيدى :

1. و انا خارج بيها من معرض صلاح سالم رايح أرخص فى مساكن الشيراتون .. و كنا فى الصيف و صلاح سالم زحمه .. حاولت أشغل التكييف .. إشتغل كأنه مروحه .. و فين وفين لما السكه مشيت شويه إبتديت أحس بيه. قولت العربيه جديده و يمكن لسه ما لينتش .. عديها.

2. فيما بعد لو أنت على 6 أكتوبر الساعة 2 الظهر و درجة الحراره 38 و مشغل التكييف .. آجى أدوس بنزين .. العربيه ما بتسحبش خالص و لا كأنك راكب بسكليته .. و لما أدوس بنزين جامد تروح ناطه مره واحده تخليك تلبس فى اللى قدامك.

3. إستهلاك البنزين داخل المدينة 110 كيلو للصفيحه!!! و لا كأنى راكب شيروكى .. العداد بتاعها على الطوالى مدينى 14 لتر لكل 100 كيلو !!! .. رحت التوكيل فى صيانة ال 10000 .. عرفوا المشكله عالطول و كأنها مشكله عامه و قالول لى حانصلخها .. و لكنها زى ما هيا حتى الآن.

4. أول ما اشتريت السيارة و طلعت بيها على الصحراوى .. لقيت شبكة الإكصدام الأمامى السفليه اللى فيها الفوج لايت إنفصلت و وقعت جوه الإكصدام .. الشبكة على كلبسات ضعيفه جدا .. و بقيت لما أرجع أقعد أركبها مطرحها و فى الآخر من زهقى لزقتها بأوهو!!

5. بعد شويه إنفصلت الشبكة الكبيره اللى وراها الرادياتير و هى على نفس الكلبسات الرديئة و لكن وجود الردياتير و المكان المحكوم ما خلوهاش تقع.

أنا دلوقتى عامل 14000 كم .. تيل الفرامل إتكل على الله و بوظ الطنابير!!!!

نزلت علشان أشتريهم من شارع دمشق .. ما حدش عنده خالص و وقفت أتكلم مع تاجر بيجو .. سمعنى مآسى من الناس اللى بتعدى عليه و تشتكى من العربيه و سؤها.

الحقيقة هى غلطة عمرى إنى ركبت البيجو و مش حتتكرر تانى و تو ما يخلص قسطها بعد سنه ونص حابيعها لأول مشترى.

لا حول ولا قوة الا بالله , معلش انك تشتري عربية لسة نازلة ليها عيوب برضو.
يعني انا لما جبت كورولا 2014 اول منزلت كانت واطية شوية علي الارض مع العلم ده مش عيب فيها ده عيب في بلدنا و شوارعنا و الناس المفترية اللي بتعمل مطبات بمزاجها.
بس الفرق مبين توكيل و توكيل انه بيشوف حل, وهما عملو كدا كل الجديد متعدل الارتفاع من الخارج جاهز واللي استلم هيتعدل في مصر بتغيير السوست و المساعدين و البطاحات بما لايؤثر علي الثبات لانها بتنزل كدة بالخارج.
فسؤالي بقا لبيجو ,هل التوكيل ليه رد علي الكلام ده او حلول ؟
و السؤال الاهم حد اتكرر معاه الاعطال دي ولا هي حاجة فردية؟ مع العلم اني سمعت نفس الشكاوى من ناس تانية . لأني بفكر ابيع عربية مراتي اكسنت rb عشان الثبات و اجيب 301 !!