الموضوع: باسات p7 تفحت سيفيك ( العربيتين ستوك ) :)

رغم اني ماكنتش عايز أشارك بس بصراحة الكام رد الأخير حفزني أني أشارك

أولا احب أشكر صاحب الموضوع inspiron علي موضوعه
وأوجه كل شكري لكل من شارك فيه زي أ/ هاني 63 والأخ العزيز أحمد عبدالهادي لانوس 2004 ومحمد جيتا وجاب رولز وأخي أ/ محمد ميني كوبر وتامر وكل الأسماء المشاركة وعذراً لو كنت نسيت حد

بسم الله الرحمن الرحيم

قبل أي شئ أحب أقول وجهة نظري في الموضوع - وهو المقارنة بين الصانع الأوروبي والصانع الأسيوي- واعتقد دة كان الهدف من النقاش علي مدار ال12 صفحة السابقيين لردي

نبدأ بالصانع الأوروبي الأول
وجهة نظري في الصانع الأوروبي انه بيعمل عربية تتناسب أولا مع متطلبات مستهلكينها من بلد المنشأ او علي أقل تقدير مع معايير الجودة والكفاءة التي تتطلبها القارة الأوروبية - وكلنا نسمع طبعا عن المعايير الأوروبية في التصنيع ولمسناها كلنا في منتجاتهم (جميع منتجاتهم وليس السيارات فقط)
ودعونا نتحدث عن جودة الصناعة الأوروبية في شتي المجالات مروراً بالسيارات وهي موضع حدثنا أساساً
لما تتكلم عن مثلاً خلاطات المياة (الحنفية) يبقي لازم تنزل تشتري إيطالي (إيديال استناندارد) او ألماني (جروهي) (مش كوري ولا صيني ولا حتي ياباني)
لما تنزل تشتري نظارة شمس - لازم إيطالي (بوليس - بولار - راي بان - الخ الخ الخ) كلها إيطالي او فرنساوي وليس كوري او اسيوي
لما تنزل تشتري حذاء (أعزكم الله) لازم ايطالي او انجليزي
لما تنزل تشتري خلاط او كيتشن ماشين مالتي بروسيسور - لازم ألماني او فرنساوي (براون او مولينيكس)
لما تنزل تشتري كالون لباب الشقة - لازم ايطالي او ألماني وطبعاً الأغلي والأأمن علي الأطلاق
لما تنزل تشتري
لما تنزل تشتري
لما تنزل تشتري
هتلاقي نفسك دايماً بتختار الأوروبي لأنه الأجود والأمتن وصاحب العمر الأفتراضي الأطول

يبقي من الأمثلة البسيطة في حياتنا اتربي عندنا ثقافة ان الأيطالي - الفرنساوي - الألماني هو الأجود والأمتن وصاحب العمر الأقتراضي الأطول واحياناً الأجمل

وعلي الجانب الأخر هتلاقي نفسك لما تحب توفر او تشتري حاجة تقضية حال وتاخد يومينها وتترمي هتلاقي نفسك بتختار الكوري او الصيني او السنغافوري او الأسيوي عموماً وطبعاً بيكون قطعة مقلدة طبق الأصل من الأوروبي

طب تعال لصناعة السيارات ودة مجال حديثنا أساساً

هتلاقي ان الأوروبي في القرن الثامن عشر واوائل التاسع عشر (عصر الحروب وفكرة السيادة) عايز يغزو العالم اولاً وينزه شعبه ثانياً
أخترع مركبة تسير علي عجلات
وهنا جت فكرة العربية اللي كانت مستمدة من الآلة البخارية عموماً اللي استخدموها في القطارات
واخترعوا السيارة
وطوروا السيارة
وفضلوا يطوروا في السيارة

في الجانب الأخر أحقاقاً للحق كانت اسيا هي كمان بتصنع وتنافس زي تويوتا ونيسان (داتسون)

وفضلوا تقريباً ماشيين بالتوازي لحد اوائل التسعينيات (فيما عدا مرسيدس طبعاً اللي دائماً لها السبق في العديد من الأختراعات والتكنولوجيات المستخدمة حتي وقت كتابة هذه السطور)
فيما عدا بعض القفزات من الأوروبي في بعض الأنجازات والسبق في عدة اشياء زي مثلا الجر الأمامي اللي كان السبق للأوروبي فيه

المهم

هتلاقي ان موديلات الثمانينات تقريباً متشابهة علي الجانبين الأوروبي والأسيوي
يعني لو اتكلمنا عن التكنولوجيا في الوقت دة هتلاقي ان مثلا التويوتا كورولا كانت كاربراتير وايضاً الفولكس كاربراتير
الا ان هوندا سبقت كتير اوي في السبعينيات وبالتحديد في وقت الحرب عام 73 لما الدول المنتجة للنفط قررت تقطع الأمداد عن امريكا
وهنا كانت الحاجة لسيارة موفرة جداً في الوقود وترك السيارات الأمريكية الفارهة
وتألقت وقتها المعجزة هوندا سيفيك بأول موديلاتها عام 74 تقريباً
كانت سيارة صغيرة الحجم وموفرة لأقصي درجة في الوقود بالأضافة لقوة محرك مقبولة
ودة ابداع هوندا حتي الأن - محركات صغيرة تولد قدرة كبيرة وموفرة في الأستهلاك لأبعد مما تتخيل لدرجة جعلت الكربراتير في الهوندا ينافس اعتي محركات الأنجيكشن الأوروبي ويولد قوة حصانية تقترب منه

ومنذ اوائل التسعينيات بدأت الفجوة في الأتساع شيئاً فشيئاً
فنجد مثلا سيارات اوروبية موديلات 93 و94 بمحركات انجيكشن - والتي لم تعرف طريقها إلي الأسيوي إلا في أواخر الألفية الثانية (2008 - 2010)
وللعلم - لمن لا يعرف الفرق بين الأنجيكشن والكارب
اي محرك انجيكشن لابد له من كونترولر لحساب نسبة الخلط بين الهواء والبنزين وتقدير توقيت الشرارة في الوقت المناسب لتقليل الهدر من الوقود والأستفادة بكل قطرة منه
اما الكارب - فيتم تقدير نسبة الخلط يدوياً وضبط الأشعال يدوياً - أي ان الفني يقوم بضبط توقيت الأشعال مع توقيت دخول الهواء والوقود يدوياً مما ينتج عنه بعض الفقد في الوقود وتأخير او تقديم من توقيت الأشعال
طبعاً دي فكرة عامة سريعة مبسطة عن الفرق بين الحقن الأليكتروني والكاربراتير

ونجد مثلا دخول أنظمة التحكم الألكتروني في الفرامل والثبات منذ منتصف التسعينيات (96 - 97) في الأوروبي والتي لم تعرف طريقها للأسيوي إلا في أوائل ومنتصف الألفية الثانية (2004 - 2005)

الإيموبلايزر في الأوروبي من 95 وبدأ تشغيله في الأسيوي بدأ من 2010

والأمثلة كثيرة جداً علي تطورات رهيبة في الأوروبي ولا توجد في الأسيوي الا بعد 2010


ثانياً تعال نتكلم عن الأسيوي وفكر الصانع الأسيوي
سلعة رخيصة (لأن القارة الأسيوية فقيرة الا من رحم ربي وبعض دول الخليج)
سلعة تفتقر للجودة - لأن المستهلك علي نياته ومش بيدقق
سلعة غير متقنة - لأن المستهلك اساساً بيرضي وبيفرح بالقليل
وكلامي مش مرسل ولا من فراغ

تعال نقارن ونتكلم

اولا هوندا متطورة جداً للأمانة - بس مش عشان خاطر عيونكم
لأن هوندا في المقام الأول دائماً تستهدف القارة الأمريكية والسوق الأمريكي في المقام الأول وبالتالي بتصنع بجد ومش بتهرج

اما باقي المصنعين الأسيوين فهتلاقيه بيصنع وفقاً لمتطلبات المستهلك النهائي (علي عكس المصنع الأوروبي اللي بيصنع وفقاً لمعايير بلد المنشأ والقارة الأوروبية كما اوضحت في بداية حديثي)
بمعني
هعملك عربية قليلة الأعطال والصيانات (عشان توفر اهو يا عم وماتتكلفش حاجة) بس في المقابل اللي ادهولك ترضي بيه وماتفتحش بوقك
يعني اقصي احلامك وطموحك معايا (تكييف ثلاجة - زجاج كهرباء "واو" - وكمان ياعم سنتر وفتحة سقف عشان تنبسط)
وكلامي دة علي تويوتا لحد موديلات 2008 مش هقولك علي اكسيل ولا اكسنت
تويوتا لحد 2007 او 2008 (لحد اخر موديل في الشيب رقبة الجمل) كانت بتنزل تكييف وباور وزجاج ومرايات كهرباء وضم وسنتر ودمتم بود
هتقولي بس كانت بتنزل الخليج بجنوط ومحركات 1600 وانجيكشن واير باجز وabs وووو
هقولك ماهو دة مربط الفرس
في حاجة اسمها انزل لمصر بباكيدج وانزل الخليج بباكيدج تاني ؟؟؟؟ ليه هو انت ماعندكش معايير وحد ادني من التجهيزات وعوامل الأمان ؟؟؟

لكن تعال بقي نبص كدة علي الأوروبي الجميل ربنا يخليهم لينا
بيجو في 406 عام 96 كانت انجيكشن وقمة في الفخامة والرفاهية
أوبل في 96 انجيكشن وabs وزي ماتحب تقول قول في الفيكترا الفراشة
فولكس في 95 بالأيموبلايزر والمفتاح بالريموت والسنتر والأنذار الفبريكة (مش وولف المصري)

دي طبعاً امثلة بسيطة وسريعة كدة للمقارنة الخفيفة بين الأوروبي والأسيوي


تعال بقي لمربط الفرس بين الجيتا والأوكتافيا والليون والسيفيك

زعلت اوي لما اتقال ان سيات واسكودا دخلاء علي فولكس

فولكس اشترت حصص في شركات كتيرة جداً ووسعت قاعدتها لتنويع منتجاتها
وزعت التكنولوجيا بتاعتها علي قاعدة اكبر من المنتجات وعممتها في منتجاتها
والسبب
لو فرضنا انها صرفت مبلغ وقدره علي تكنولوجيا معينة عندها وليكن الTSI او الDSG بتاعها
عشان تلم اللي صرفته دة نزلت المحركات TSI والفتايس DSG في العديد من موديلاتها الصغير قبل الكبير ولو زودت علي ثمن العربية 100 يورو بس هتلم فلوسها اللي صرفتها دي في خلال يومين مبيعات
لما عملت الشاسيه الجديد بتاعها MQB وراحت منزلاه في الجولف7 والليون الجديدة والأوكتافيا A7 والأودي A3 هي كدة وزعته علي مستوي المجموعة بتاعتها وراحت منزلاه علي المكنة TSI بالفتيس DSG تقوم تستفاد من وزنه الخفيف في انها تنزل عليه محركات بسعة أقل وتزود قوتها بتربو وتعوض فرق تأخير التربو بفتيس ابن عفريتة سريع اخر حاجة 7 غيار بينقل غيارته في اجزاء من الثانية
تقوم تلاقي عندك عربية تحفة - موفرة في البنزين وسريعة وقوية وتتوافق مع معايير البيئة بأقل انبعاثات واقل استهلاك تقوم واخدة المركز الأول في تطوير المحركات
شوفت المعادلة سهلة ازاي ؟؟؟؟
وبردو هي لما نزلت نفس الPlatform في عربيات كتير وفرت تكاليف انتاج وكسبت مبيعات

تحياتي لفولكس العبقرية

أسف علي التطويل
وشكراً لكل من تابع المشاركة للنهاية