الموضوع: باسات p7 تفحت سيفيك ( العربيتين ستوك ) :)

المشاركة الأصلية كتبت بواسطة inspiron

@hany63

استناد لكلام حضرتك..الباسات اللي مش عجباك دي فانوسها بتمن جوز فوانيس السيفيك :) وخاماتها وعفشتها ووسعها وكمالياتها وقوتها صاج وموتور....وعواااامل أمانها..يخلوا السيفيك تكش علي جنب كده ومتفتحش بقها...الحقيقة اللي مستغرب منه ان حضرتك عارف الكلام ده بحكم انك ركبتها !!! واللي كرهك فيها بس الفتيس اللي سيادتك مستعملتوش صح :) بناء علي توصية الشركة..بفضل الله والله هو الحافظ العربية معايا 15000 كم زي الفل لأني بستعمله صح..ولو لا قدر الله حصل فيه اي حاجة هنقل التجربة بالكامل هنا..ليا تعقيب بسيط..حضرتك عرفت قيمة الياباني.صح.والالماني فيما عدا مرسيدس وبي ام يبقي درجة تانية..بصرف النظر عن الرأي الغريب ده :)

لما اركب عربية سعرها 165 الف جنيه وهي متسواش في نظري 70 الف جنيه واعمل بيها حادثة علي سرعة 60-80 ووش العربية بالكامل يضيع والايرباج ميفتحش !! ولما تصلحها تلقيها مبعجرة زي ما هي لضعف صاجها ! والمصيبة ان ماركتها من المفترض انها كينج اليابان..ده قيمة الياباني ؟؟

ولما تكون وحش الوحوش سيفيك .. 16 كرتونة سيراميك يتشالوا فيها يخلوها تزحف علي الأرض..ونفس الحمولة تتشال في الباسات متهزش منها شعرة..قيمة ياباني بردو ؟؟

القصة مش قصة ياباني ولا كوري ولا الماني ولا بنجلاديشي

القصة في ان كل واحد راكب عربية هي في نظره افحت عربية صمموها علماء الميكانيكا والحركيات بصرف النظر عن نقاط الضعف وبدون اي منطقية وموضوعية..زي ما يتقال كده علي 1600 الماني بطة بلدي عشان بتجيب من 0-100 في 11 ثانية .. ويتقال علي الياباني السيفيك خصوصا انها قاهرة المركبات عشان بتجيبهم في 10-10.5 ثانية...طيب أقول ايه والنبي.

في النهاية علي ارض الواقع صلب الموضوع..الباسات نفخت السيفيك :) وهتفضل تنفخ السيفيك..تقولي اصلها متربنة اصلها متربسة هقولك مليش فيه نفختها :) تقولي اصل سيفيك دي موتورها na nb nc nz هقولك بردو مليش فيه اتنفخت من الباسات.

حاجة اخيرة بقا عشان انا عارف شلة الانس اللي هتيجي توجب في الردود :)

انا لا فارق معايا سيفيك من باسات .. الحمد لله لو قولنا جري الغباوة.هشد الغطا علي الباسات دي تريح يومين وندخل بالسلاح الكاسح..

تحياتي للجميع

برضه واخد الموضوع بطريقه شخصيه و احب افكرك للمره التانيه و الاخيره بان الخلاف للرائي لا يفسد للود قضيه
اولا كلامك عن الياباني و الموزمبيفي على راسي و راءيك يحترم بس برضه من حقي اقول رائيي عشان هوا ده هدف المنتدى تبادل الخبرات و مساعدة الاعضاء لبعض عند حصول اي مشكله
ارد بقى على كل نقطه في كلامك
بالنسبه ان الباسات اقوى كصاج فعلا عندك حق الباسات صاجها محمل بعكس السيفيك اللي صاجها ضعيف و اي عربيه ليها نقاط قوه و نقاط ضعف و ربنا يبعد الحوادث عن الكل بس على العموم السيفيك مش ضعيفه لدرجة ان صاجها بيموج من مجرد ركنة الشارع و ده موجود في عربيات ياباني تانيه ماعلينا
بالنسبه لحمولة السيراميك اللي بتخلي السيفيك تزحف احب اقولك ان الباسات اوطى من السيفيك ٢٠١٠ و ده عن تجربه لنفس المطب بنفس الحموله عشان ما تقولش اني بفتي بس مجربتش موضوع السيراميك الصراحه
نيجي لنقطة ان الباسات فحتت السيفيك هتلقى ان الفيديو اللي سيادتك منزله فيه مرتين من ٤ مرات السيفيك هيا اللي فحتتها على حد تعبيرك و الباسات عدى لما السيفيك داس فرمله يعني بعد ما خلصوا
و عشان برضه اكون واقعي و موضوعي الباسات اقوى بصوره ملحوظه من السيفيك في بداية التسارع اصل مش عشان معايا سيفيك اعيش في عالم افتراضي و اقول اي كلام و لو كنت شفت موضوعي الاخير عن اختبار قيادة ال f30 قلت حرفيا ان البي ام مفيهاش السحبه الغبيه بتاعة الباسات تربو
انما لما نييجي نقارن مقارنه كامله و شامله لموضوع متعة القياده بين الباسات و السيفيك في الطرق المصريه تحديدا الباسات تاخد ٩ من عشره و السيفيك ٧ من عشره بس ده لما يكون الطريق ماشي اما بقى في الزحمه الباسات تاخد ٣ وده مع الراءفه و السيفيك تاخد ٩ من عشره مع التسليم بان اللي سايق الباسات بيعرف يسوقها مش واحد زيي على حد تعبيرك و هرد على النقطه دي لاحقا
يبقى كمجمل السيفيك تفحت الباسات و لامؤاخذه كمتعة قياده كاجمالي خصوصا ان سواقتنا كلها زحمه و احقاقا برضه للحق بسبب الزحمه بتاعة شوارعنا
نييجي بقى لنقطة الفتيس بتاع الباسات اولا كلمة اني مش عارف اسوق العربيه او استعمل الفتيس اعتقد ان خانك التعبير فيها بس مش مشكله هفترض ان مش قصدك
وبعدين حضرتك جاي تقول اني مكنتش بنفذ تعليمات التوكيل طب لعلمك اساسا التوكيل مكنش يعرف ان العربيه فيها دي اس جي اصلا ولا بيشتغل ازاي ما تستغربش اصلي كنت اول واحد في مصر يركب باسات تربو و كنت مقتنع بيها زيك و قريت عن الفتيس كتير قبل ما اشتري لدرجة اني انا كنت بشرح لهم المشاكل جايه منين
و الاكتر من كده بعد ما مشيت بيها ٢٠٠٠ كم و ابتديت احس انها بترعش في الزحمه جبت طاره بشيفتات عشان اسوقها مانيوال بالكامل محافظة على الفتيس يعني قبل الوكيل ما يوصل للموضوع ده بسنتين حضرتك فمش معقول هتقول لي اني مبعرفش اسوق
طب و الطابور اليومي اللي كان في التوكيل اللي مخصصينه للفتيس ده كان ايه تهيؤات مثلا و كل الناس اللي بتلطم من الفتيس دي برضه ما بتعرفش تسوق
حضرتك مكيف سواقتك و طبيعة مشواريك معاه دي حاجه كويسه و ربنا يديمها عليك و بقولها بجد مش مجامله انما اجمالا ده فتيس فاشل
و على حد تعبيرك انا الباسات بالفتيس ده مفكرش اشتريها ولا بخمسين الف و كلامي على فكره عن قناعه مش ردا على كلامك بالمناسبه
اخر حاجه لما تحب تهاجم عربيه ابقى اكتب ممنوع دخول ملاكها و ده تعليقا على تعبير شلة الانس اللي برضه شايفه مش في محله و احب افكرك من سنتين لما حصل سوء فهم مع زميل من قسم الهوندا و اشتكيت من اسلوبه الغير لائق