الموضوع: 16 صمام ولا 8 صمام مين افضل ؟

المشاركة الأصلية كتبت بواسطة wolfin

الوجان اتو ولا المنيوال ؟
16 صمام ولا 8 صمام ؟

فيه حاجة مهمة محدش أخد باله منها


العربية الـ8 صمام راكب عليها فتيس 5 سرعات (مانيوال) .. والعربية الـ16 صمام راكب عليها فتيس 4 سرعات (أوتوماتيك)


لما تيجي تقارن نسب التروس مع بعض... حتلاقي إنه من الطبيعي جدا إن الفتيس الـ5 سرعات هيديك تسارع أحسن... خصوصا إن الرابع في الأوتوماتيك هو هو الخامس في المانيوال


هو مهندسين رينو دول فيه إيه في دماغهم!!! يعملوا حاجة كويسة ويرجعوا يبوظوها من الناحية التانية!!



...

المشاركة الأصلية كتبت بواسطة wolfin

معنى كده ان الفتيس الـــ 5 سرعات بيبقا اسرع ؟

اعتقد لا الموضوع ملهوش علاقة بالفتيس 5 سرعات ولا 4 . بس هو عموماً المانيول بيبقا تسارعه اعلى . وموضوع الــ 5 سرعات ده ممكن يبقا 6 لو عايزين ده بس بيريحو الغيارات عشان الماتور يستحمل



شكراً

مسألة الفتيس دي بالذات مالهاش علاقة بالآراء والاعتقادات

دي مسألة حسابات هندسية وبديهيات لازم نعرفها علشان نحكم صح


مش معنى إن الفتيس أوتوماتيك يبقى أبطأ من الفتيس المانيوال...

لو عندك فتيس أوتوماتيك 6 سرعات... أكيد أكيد أكيد هيكون أداؤه أحسن من فتيس مانيوال 5 سرعات



خليني أشرح بشكل أبسط


على فكرة .. الكلام اللي تحت ده كنت رادد فيه على تساؤل في علاقة استهلاك البنزين بالفتيس في موضوع http://www.nilemotors.net/Nile/329379-rpm.html

لو جربت تسوق عجلة سبق.... جرب تعشق السرعة العالية (الترس الصغير اللي ورا) وشوف كمية المجهود اللي رجلك هتبذله عشان تحرك العجلة من السكون والوقت اللي هتاخده عشان توصل لسرعة معقولة

جرب تاني تعشق العجلة على السرعة البطيئة (الترس الكبير اللي ورا) وشوف أخبار رجلك إيه؟؟؟ أكيد المجهود اللي هتبذله أقل بكتير، وكمان وصلت للسرعة اللي انت عايزها بسرعة... صحيح انت ماشي بسرعة أقل إنما بمجهود أقل


مجهود رجلك ده يعني طاقة... وفي العربية الطاقة = بنزين


المشكلة باختصار إن ساعات مهندسين السيارات بيعملوا تروس أصغر من اللازم... ممكن تخليك تمشي بسرعة أكبر... بس بتاخد بنزين أكتر عشان توصل للسرعة دي... وبيسموا النقلات اللي فيها التروس دي "نقلات طويلة" عشان تقدر تمشي عليها في مدى سرعات كبير على بال ما يوصل الموتور للفات اللي المفروض تنقل عليها... إنما الموتور هيستهلك بنزين أكتر


عشان كده كل ما زاد عدد النقلات في الفتيس كان استهلاكه للبنزين أفضل، لإن الموتور هيبقى مستريح في النقلة... بمعنى إنك هتدوس بنزين قليل وهتاخد تسارع أعلى

وفي الحالة دي النقلات بتبقى "قصيرة"... يعني مدى السرعات بتاعها قصير بالمقارنة مع سرعة الموتور ومش بتدي سرعة كبيرة للعربية.. إنما بتدي تسارع أعلى بكتير

وفي الآخر.... الكورونا هي كمان بتتحكم في كل ده

باختصار... كل ما كانت الفرق بين نسب التخفيض في الفتيس أصغر.. تقدر تاخد أداء أحسن من الموتور

وده السبب إن العربيات الحديثة دلوقتي بتنزل 6 سرعات و7 سرعات.. ودلوقتي كمان 8 سرعات

لو عايز تعرف معلومات أوضح عن مسألة الفتيس دي... ادخل على الموضوع اللي في الرابط اللي فوق



...

المشاركة الأصلية كتبت بواسطة wolfin

اداء احسن ازاى؟ الغيارات الزيادة ولا هيزود ولا هينقص عزم ماتور ولا سرعة عربية . يعنى العربية الا اخرها فى العزم مثلا 128 و 90 حصان و اقصى سرعة 175 مش هتزيد لما اكتر الغيارات فى الفتيس . بس بتريح الموتور. وبعدين ده اسمه ( ناقل حركة ) دى وظيفته لكن الاستخدام الامثل ليه ده موضوع تانى . وفعلا موضوعك مفيد جداً . لكن انا بقارن بين ماتورين 16 صمام و 8 صمام فى الوجان الــ 16 صمام حقن مركزى مباشر و الــ 8 صمام حقن متعدد النقاط مين فيهم افضل ؟

* فضلت اتكلم عن العزم ومين فيهم يكسب كنت فاكر انى اقد اقيس او اقارن عزم الــ 16 صمام بنسب الـــ 8 صمام يعنى عند 3750 ال 16 بيطلع 148 و عند 3000 ال 8 بيطلع 128 . قولت اقيس ال 16 عند 3000 هيطلع كام ؟ عن طريق انى قسمت 148 ÷ 3750 تطلع معدل ضربته فى 3000 طلع عزمه اقل . لكن لما جبت منحنى عزم الماتورين عرفت ان كلامى لا يمكن تطبيقه

* لما نقارن فى معدل استهلاك البنزين ال 8 صمام يكسب . اقتصادى اكتر و ده لانه حقن متعدد و ال16 صمام حقن مركزى مباشر . يعنى واحد بيدخل بنزين سوء فى شوط حرق ولا لا و التانى بيدخل بنزين لما يجى شوط الحرق فى البستم بس وده بيخليه بيستهلاك بنزين اقل . الحقن المركزى المباشر ليه ميزة شويا ان حبه البنزين الا بيدخلو قبل شوط الحرق بيطلعو شوية عزم اقوى بس برضه بيخلى الماتور ميحرقش بكفاءة فيزود الانبعثات. ال 16 بيستهلاك 11 لتر / 100 كليو جو المدينة . و ال 8 بيستهلاك 10 لتر / 100 كيلو جو المدينة

* التسارع من 0 - 100 مين يكسب ؟ الــ 8صمام بيوصل للــ 100 فى 11.50 و الــ 16 صمام بيوصل للــ 100 فى 11.90 يبقا الـــ 8 صمام يكسب .

* لكن العزم و القوة الحصانية دول ليهم عوامل تانيه .


وشكراً

الأداء هو محصلة لكل أجزاء نقل الحركة في السيارة ... وتقدر تقول عليه إنه محصلة الطاقة الخارجة من الموتور في مقابل كل أنواع المقاومة اللي بتواجه العربية ... ابتداء من وزن العربية.. مرورا بأوزان الركاب اللي فيها... وانتهاء بأي إعاقة ميكانيكية نتيجة مشاكل في ضبط السيارة أو صيانتها.

ده معناه إيه...

إن لو عندك فتيس بيريح الموتور زي ما حضرتك قلت من شوية.. ده معناه إنه بيقلل من المقاومة اللي الموتور بيواجهها علشان يحرك العربية


اللخبطة اللي حضرتك واقع فيها دلوقتي إن العربيتين واحدة فيها موتور أفضل بس عليها فتيس وحش... والتانية فيها موتور أقل بس عليها فتيس أحسن

وفي الآخر.. أداء العربيتين متقارب جدا



أنا مثلا كنت راكب هيونداي أكسنت أوتوماتيك 4 سرعات... كنت علشان أعرف آخد استجابة كويسة من العربية لازم أدوس بنزين جامد على الغيار الأول بالذات.. وكنت كتير بشوف أرقام استهلاك رهيبة على كمبيوتر العربية

دلوقتي أنا راكب سيراتو أوتوماتيك 6 سرعات... عليها نفس موتور الأكسنت... وعلشان آخد نفس الأداء بتاع الأكسنت مش بضطر أدوس بنزين جامد كده...

ليه؟؟

علشان الفتيس 6 سرعات

وفعلا... أرقام استهلاك البنزين أقل بكتير وأداء أفضل.. مع إن السيراتو تعتبر أتقل في الوزن


خلي بالك... أنا بقارن اتنين فتيس أوتوماتك استبترونك




لو عايز تقارن صح... قارن عربية واحدة عليها موتورين مختلفين من ناحية التكنولوجيا بس يكون راكب عليهم نفس الفتيس ونفس الكورونا ونفس مقاس العجل


وساعتها نتكلم




بس سؤال صغير...

حضرتك عارف يعني إيه عزم؟؟؟



...