الموضوع: الأوفردرايف... يعني إيه؟؟؟

المشاركة الأصلية كتبت بواسطة اشرف الجندى

اشكر ك على هذة المعلومة القيمة جدا لانى فعلا كنت محتار فى هذة الخصية بس لى سؤال انا لما سالت ميكانيكى قال اوعى تشغلة فى السرعة العلية دة ممكن يبوظ الفتيس كلة مع انى فهمت من كلام حضرتك ان ممكن اشغلة على سرعة 120k علشان اسبت السرعة على كدة تمام فممكن توضيح ويا ريت كمان افهم يعنى اية السيارة ثلاث سرعات فقط يعنى اول وثانى وثالث فقط ولا اية وشكرا

تشغيل الأوفردرايف معناه إن لمبة O/D off تبقى مطفية

في الحالة دي العربية شغالة بالأربع سرعات...

بس في المقابل.. سحب العربية أضعف.. والسرعة الرابعة مش هتقدر تجيب بيها السرعة القصوى للعربية.


إنما لو لمبة الأوفردرايف لو منورة.. ده معناه إن الأوفردرايف مفصول.. وبالتالي العربية بتبقى شغالة بـ3 سرعات بس (أول وتاني وتالت.. والرابع مش هيتعشق).. وسحب العربية أحسن بشكل عام.. وتقدر توصل للسرعة القصوى للعربية على السرعة التالتة

الميكانيكي لما بيقوللك "أوعى تشغله على السرعات العالية" بيبقى قصده يقول "أوعى تخلي لمبة O/D off منورة في السرعات العالية"

وهو بيقول كده لإنه فاهم إن اللمبة لما تبقى منورة يبقى الأوفردرايف شغال.... إنما الحقيقة إن الأوفردرايف بيبقى مفصول

وهي دي الحتة اللي بحاول أقولها في الموضوع.. لإن الناس فاهمة الموضوع بالعكس.


إنما حضرتك تقدر تفصل الأوفردرايف على السرعات العالية (يعني تخلي اللمبة منورة)... بس اللي هيحصل إن الدوران الموتور هيعلى قوي (غالبا هيبقى في الثلث الأخير من مدى الـRPM)...

واحتمال إنه يأثر على الجيربوكس يبقى موجود لو حضرتك ما عملتش حسابك ودوست بنزين كفاية علشان يعوض فرق الدوران

الموضوع زيه زي أي كيك داون بيحصل أثناء السواقة العادية.



...

المشاركة الأصلية كتبت بواسطة karkour33

عاوز اعرف لما استخدمها او افصلها مفروض مكونش دايس بنزين ؟؟ ينفع اشغلها ونا لسة بطلع بالعربية ولا لازم اكون بجري علي سرعة معينة ؟؟ اشعر فرامل ونا بشغلها اقصد يعني الوضع الامثل لاستخدامها او قفلها

ممكن تفصل الأوفردرايف (تخلي اللمبة تنور) وانت ماشي بالعربية... عادي جدا... ويفترض إنك تحول عادي بدون أي احتياطات خاصة.

أصلا.. انت ممكن تعشق أي نسبة "أمامية" من الجيربوكس (l .. 2 .. D) وانت ماشي بالعربية... بس المهم إنك ما تخليش عداد الـrpm يعلى قوي..

ويفضل تهدي سرعتك لحد ما توصل للسرعة المعقولة اللي تناسب التعشيق.


أعتقد هو ده الاحتياط الوحيد... إلا إذا كان فيه احتياطات خاصة مكتوبة في كتالوج العربية في الحتة دي.


والوضع الأمثل لفصل الأوفردرايف بالنسبة ليا هو واحد من اتنين:

1- إني أكون سايق جوه المدينة ومش متوقع إن سرعتي تزيد عن 80 كم/س
2- إني أكون عايز أشد بالعربية على الطريق السريع ومش عايز العربية تعشق الرابع علشان آخد أكبر عزم.



...

المشاركة الأصلية كتبت بواسطة karkour33

شكرا لسرعة ردك يا باشا بس لو الاوفردرايف للجري مكانوش حطوا سبيد و كيك داون في(فيكترا 94) و زرار نورمال و باور في (فيتارا القديم) كانوا اكتفوا بالزرار السحري اللي بيقوي العزم و يقلل الاستهلاك و يشد عالطرق السريعة و يوصل العربية للسرعة القصوى بالغيار التالت
الاوفردرايف ينور يعني تمشي بسرعة ثابتة علي طريق سريع سفر مثلا بثلاث غيارات فقط من غير حرق عالغيار و يوفر في الاستهلاك
و الاستخدام التاني له لو طريق مزحلق و مش عاوز تضرب فرملة مفاجأة تعوم العربية بتنوره زي تسقيط نقلة من غير فرامل او زي engine brake
و مينفعش جوة البلد لانك هتفرمل كل شوية او تقف في اشارة وغلط تبتدي تتحرك بالعربية و هو منور دة اللي فهمته من الكتالوج

الكلام دة كله حضرتك ذكرته في الموضوع قولت انه لتوفير الاستهلاك و الهداوة مش للشد و بعدين في ردك قولت للشد و الحرق عالغيار

أولا أنا متشكر جدا لحضرتك إنك جبتلنا صفحات الكتالوج اللي بتشرح كيفية استخدام الأوفردرايف..

الحقيقة أنا قريت ال3 صفحات دول كذا مرة... وما لقيتش أي حاجة من اللي حضرتك قلتها دي مكتوبة في الكتالوج اللي حضرتك جايبه..

في الصفحة الأولى.. كل اللي مكتوب هو إنك لما تخلي اللمبة منورة في التابلوه يبقى الفتيس شغال 3 سرعات مش 4... وإن اللمبة هتنور بمجرد ما الكونتاك يكون معمول على الوضع on.

في الصفحة التانية..بيشرح إن الفتيس عبارة عن 3 سرعات + أوفردرايف.. وإنك حتى لو جبت عصاية الفتيس على D4 وانت فاصل الأوفردرايف فالفتيس بردو هيبقى 3 سرعات.

في الصفحة التالتة.. بيشرح امتى تستخدم كل وضع من أوضاع عصاية الفتيس.. وإن الوضع L والوضع 2 ليهم سرعات معينة لازم العربية ما تكونش ماشية أسرع منها علشان تعشق..والوضع D هو اللي بتستخدمه في الحالات المعتادة

وفي الصفحة دي مفيش أي ذكر لموضوع الأوفردرايف

ومفيش حد قال أبدا إن فصل الأوفردرايف جوه البلد والزحمة مضر .. كل الموضوع إن استهلاك البنزين ممكن يزيد شوية صغيرين.. واحتمال ما يزيدش أصلا لو متوسط سرعتك ما زادش عن 60

وعموما.. فصل الأوفردرايف أو استخدامه راجع لطريقة سواقتك.. وهو يعتبر وسيلة لزيادة التحكم في حركة العربية وأداءها.

أما بالنسبة للمود الاسبورت.. فده مجرد إنه يخلي الموتور ينقل على دوران عالي جدا مش أقل من 5000 RPM.. وفيه مود كمان اسمه economic.. أو الاقتصادي... علشان اللي بيحب ينقل بدري ويوفر بنزين. ودي مجرد أساليب في سواقة العربية.. زي اللي معاه فتيس مانيوال وبيحب يشد كتير بالعربية أو اللي بيحب سواقة هادية

كلها طرق علشان تحس بسيطرة أكتر على العربية علشان تاخد منها اللي انت عايزه.


تاني... تشغيل الأوفردرايف يعني اللمبة مطفية

فصل الأوفردرايف يعني اللمبة منورة

OFF يعني مطفي.. ON يعني شغال.



...