الموضوع: قصه دراميه من واقع الحياه حدثت لي للعظه والعبره

ابويا عند عمي ليس شقيق ابي بل ابن عمه ويأتي عمي الاخر ها ؟ ... لسه ملقيتوش لايمن عروسه ؟ ... لاء لسه عندك انت عروسه ؟ .... اه عندي واحده ميه ميه ... طبعا عمي ده عمره ما قعد معايا ولا يعرف طريقة تفكيري ولا المواصفات اللي انا عايزها ... قول يا وجدي ايه مواصفات البنت اللي عندك ؟ ... بص بنت زي القمر وعندها 31 سنه وبنت ناس ..... ابويا يجلس معي في البيت ويخبرني بما قاله عمي وكان ردي عليه هكذا ... خخخخخخخخخخ روق يابا دي اكبر مني ب 8 سنين انا هاخد واحده قد امي .... ياض حلوة دي بنت المقريء المشهور (.....) ... ياراجل ؟ ... اي والله ... ولما هي بنته ليه قعدت لحد السن ده بدون جواز طالما هي جميله ومستوى اجتماعي عالي زي ما بتقولوا ؟ اكيد فيها حاجه .... ياعم روح شوفها وخلاص انت خسران حاجه ان ماعجبتكش نشوفلك غيرها .... لالالالا مش عايز اشوفها انا متأكد ان فيها حاجه وكمان حتى لو مش فيها فرق السن رهيب بيننا ... امي تسمع الحوار في صمت وخلوا بالكم انتوا من الوليه دي في الاحداث القادمه هههههه ... (ابي) خلاص انت حر ... تمر الايام وتأتي اختي المتزوجه لزيارتنا ... نتحاور في امور عامه انا وهي والاهل ثم يفتح ابي موضوع الزواج مرة اخرى لنجد ان اختي تعرف هذه الفتاه فهي كانت زميلتها في المعهد ... وبعد ان علمت اختي بهذا الامر قالت لهم لا تناسبه دي عندها تخلف عقلي (طبعا انا اذكر ما حدث ولا اعيب فيها حاشا لله) ....اااااااااه شوفتوا بقى !!! مش قولتلكم هيطلع فيها حاجه !!! ... (ابويا) تخلف عقلي ازاي ؟ معاقه ذهنيا يعني ولا ايه ؟؟ .... المهم بعد الحوار ادركت ان عندها مرض اسمه تأخر عقلي كنت قد قرأت عنه من قبل حيث هناك فرق شاسع بينه وبين الاعاقه الذهنيه ....
الوليه امي بقى مش مهديه السر وعايزة تجوزني بأي طريقه راحت مكلمه اختي من ورايا وقالتلها ما توريهاني يانحمدوا وراحوا شافوها في البلد اللي العروسه منها حيث لم تكن من بلدتنا ... وطبعا اختي لم توافق ولكن بعد الضغط من امي لم ترى اختي بدا من الرفض وذهبت معها الى المعهد لتراها امي ... بعد ان رأتها امي اعجبتها واخبرت اختي ان تكلمها عني ...
طبعا اختي لديها بعض الصور الخاصه بي على هاتفها الجوال واخبرتها امي ان تريها صوري وان وافقت مبدئيا تحاول اقناعي لاحقا بعد موافقه هذه العروسه ....
بكيزة بكيزة خدي عايزاكي في موضوع ... موضوع ايه يانحمدوا ؟ ... تعالي بس نقف في حته هاديه شويه ... ها؟ كنتي عايزاني في ايه ؟ ... بقولك مفيش جديد معاكي ؟ ... جديد في ايه ؟ ... مفيش عريس جالك تاني ولا حاجه ؟ ... لاء بعد العريس الاخراني ده مفيش حد اتقدم تاني ... طيب انا عندي ليكي عريس .... والله ؟ ... ويبقى اخويا كمان تحبي اوريكي صوره ؟ ... ياريت ... وبعد ان رأت الصور اعادت اليها الموبايل وتركتها وذهبت دون رد ههههههه .... المهم اخبرتها لاحقا في مقابله اخرى انني قصير عليها وتريد شخص اطول منها كي لا يسخر منها الناس !!! .... وهذا ما دار وراء الكواليس دون علمي واخبرتني اختي لاحقا عما حدث
ملحوظه : نوع اعاقتي قصر قامه مع اعاقه في القدم علشان تقدروا تفهموا الاحداث بس وهذه العروسه من بلد مجاورة لنا وابيها مقريء مشهور وجاء على قناة الرحمه من قبل
...............
هذه اول عروسه اتصادف بيها بعد حصولي على الوظيفه
لسه فيه تااااااني ..............
تابعوني .........

العروسه التانيه ... وبعد ان انقذني الله من العروسه الاولى اذ بي اقع في عروسه اسوأ منها وكانت مواصفاتها انها غير متعلمه بجانب انها ليست جميله ومستوى اجتماعي متدني ... الخ من المواصفات التي لا يتمناها الحيوان وكانت اقتراح امرأة سفيهه بتشجيع زوجة خالي عليهم من الله ما يستحقون ... طبعا رفضت بشده بعد ان علمت بهذه المواصفات ولكن اللي غايظني ان ابويا وامي لم يجدوا مانعا في ذالك يعني لو انا قولت اه عليها كانوا وافقوا بدل ما كانوا يقفوا ضدي ان وافقت لكن لم انسى لهم انهم وافقوا بأزبل ناس في البلد لاختي في خطبتها الاولى والحمد لله انقذها الله من تلك الزيجه ورزقها الله بشخص اخر طيب وذو خلق ... اختيارات اهلي كلها شمال شمال شمال ربنا يهديهم (وقال ايه ابوك وامك اكبر منك ويعرفوا مصلحتك) بلا خيبه مقوله مشهورة كنت اصدقها من قبل والان غيرت رأيي فيها .....
وتبقى وفاء متصدرة عرش فتيات الاحلام حتى الان ....
تابعوا معنا بعد الفاصل ...........

العروسه الثالثه .... كانت اختيار سلفة اختي مواصفاتها كالاتي مؤهل متوسط ومستوى اجتماعي متوسط واخواتها تعليم ازهري وناس متدينين من بلد مجاورة العروسه بها اعاقه ايضا وقصيرة القامه وبعد الرؤيه الشرعيه لم تعجبني شكلا بجانب اني خشيت ان تعيقها اعاقتها عن اداء واجباتها تجاهي وتجاه بيتها ولكن خشيت ايضا ان ارفضها خوفا من اكسر بخاطرها اذ يبدوا انها اعجبت بي وبعد يومين جاء الرفض من طرف اهلها وقولت بعدها الحمد لله انها جت منهم .....
العروسه الرابعه ..... فتاه اراها كثيرا تمر من امامي اعجبتني ويبدوا عليها انها على خلق وددت ان اسأل عنها
..... ايوة يا خالي تعرف بنت ساكنه جنب بيت مراتك شكلها كذا كذا تشبه اخت مراتك فلانه ! ..... يالهوووي انت عايز تتجوز دي؟ .... مالها يعني ؟ .... دا ابوها حرامي وكمان شغال في البلاعات .... ياراجل ؟ .... والله .... نهار اسود بس البت باين عليها بنت ناس خلاص خلاص سيبك منها المركب اللي تودي ... طبعا خالي يقصد فتاه اخرى غير التي اشرت اليها وعلمت ذالك بعد مده وبعد ان صرفت نظر ... شوفتي ابنك ياسوسن عايز يخطب بنت فلان ... طيب والبنت ظروفها ايه ممكن لو البنت كويسه نعزلها عن ابوها .... البت غلبانه على نياتها بس ابوها ابن ستين في سبعين .... خلاص هات مراتك نروح نشوفها ... مرات خالي ايه رأيك ياعلانه لو اتقدملك حد في مثل ظروف جوزي؟ (حيث خالي في مثل ظروفي) .... ياريت انا اطول ... ابن الحاجه دي عايز يخطبك ... ماشي انا موافقه ... (امي) ايمن بقولك كلمنالك البت فلانه بنت فلان .... (أنا) يا نهار ابوكم اسود !!! مين ؟ .... فلالالانه بنت فلاااان .... اقسم بالله ما تفتحوا الموضوع ده معايا تاني لانتي حره فاهماني ؟ ... انا مالي مش هي عاجباك وكلمت خالك عليها ؟ ... لاء مكلمتش خالي عليها ... امال خالك بيقول انك بتسأله عليها ليه ؟؟ ... انا مسألتش عليها خالص دا انا بقوله فيه بت كذا كذا راح هو قالي كذا كذا فصرفت نظر على اعتقاد مني ان البنت دي معاها دبلوم ومؤدبه وجميله وبنت ناس وحتى لبسها نضيف مش باين عليها !! ... ردت مرات خالي ااااااه انت قصدك البت الفلانيه بنت فلان لالالا دي مش هتوافق دي ... بقولها ايه مش هتوافق ؟ مين اللي ميوافقش بمين ؟ هي بنت مين اصلا ؟ .... ابوها مبسوط وناس غنيه ... (ولو) انا مؤهل عالي وهي باين عليها مؤهل متوسط ومستوايا الاجتماعي اعلى منها هي معاها ايه اصلا .... (مرات خالي) دي مش متعلمه اصلا .... كمااااااااااان ؟ وتقولي مش هتوافق ؟ (في سري) يا بنت الكلب لو مكنتيش مرات خالي كنت عملت معاكي الدنيئه ... بعد كام يوم مرت من امامي مرة اخرى وحكيت لصديق لي ما حدث وطلع عارفها جدا وشكرلي في البت بس ابوها طلع بيشرب حشيش وبانجو ... قولتله ومرات خالي بنت التيت مستكتراها عليا ... ايا كان ما حدث فهي لا تناسبني لانها غير متعلمه ومستوى اجتماعي حقير ولو اردت الزواج بها كنت قدرت بفضل الله ان اجعلها توافق بي ولكن بعدما عرفت حقيقتها صرفت نظر نهائيا وحينما اراها تمر بجانبي اتجاهلها وكأني لم اراها ....
والى اللقاء في الحلقه القادمه .............................

العروسه الخامسه ........... واااااه من العروسه الخامسه
اسمعوا معي .....
ابي عند عمي مرة اخرى ويأتي عمي الاخر الذي جلب لي العروسه الاولى ... بعد دقائق من الحوار يفتح عمي هذا موضوع زواجي مرة اخرى ... بقولك يا ابو ايمن عندي ليك عروسه حلوة لايمن ... مواصفاتها ايه علشان اقوله ... ابوها فلان من عيله كذا وناس فقراء وهيوافقوا ... (ابويا) ماشي هقوله وارد عليك ... ابويا يدخل عليا وانا جالس امام الكمبيوتر ... ايمن عندي ليك عروسه ... (انا) لاء مش موافق من قبل ما تقول ... يا ابن ال (...) اسمع بس الاول ... مش عايز اسمع .... يضحك ضحكه خفيفه يابني اسمع بس مني وبعدين قول لاء .... خلاص قووول ... فيه عروسه بنت ناس غلابه وشكلها مقبول ... الخ .... (أنا) خلصت اللي عندك ؟ ... ايوة ... انا مش مواقف يلا بقى شوفلك مصلحه ... يابني اسمع الكلام والله اي واحده هتروحلها هتجري وراك بالشبشب (يقصد علشان الاعاقه) .... لازما يابني تاخد واحده اقل منك علشان تقدر تتحكم فيها وما تعايركش مش تاخد واحده تحملك تمن انها وافقت بيك !!! ... كل هذا وانا اسمع الكلام من اذن واخرجه من اذن اخرى ... خلص بقى يابا انا مش فاضي وورايا شغل ع النت ... اسمع بس الكلام علشان هتروح بكرة عندهم علشان البت واهلها يشوفوك ... (أنا) الساعه كام ؟ ... (أبويا) بعد المغرب .... (أنا) اوك ... وجاء اليوم الثاني وقبل اذان المغرب بالحق ابويا كان بيقولي هنروح عند الجماعه المعاتيه اياهم دا انا هديهم زمبه من الاخر .... ذهبت الى المسجد وصليت المغرب وبعد الصلاة اوسوس نفسي (انا هغيب لحد الساعه 11 بالليل وارجع بعد ما يعدي الميعاد) ويبقوا يقابلوني ... من سوء حظي جيت بدور على الشبشب بتاعي في المسجد علشان اخرج واهرب لقيت الشبشب اتسرق ... الغريبه ان ابويا قابل ابو البت بعد صلاة المغرب هو ومراته فعزمهم عندنا في البيت علشان يشوفوني الاول قبل ما اروح عندهم البيت .... في نفس الوقت اللي شبشبي مسروق فيه ومش عارف امشي اضطريت ابعت حد من العيال الصغيرة عندنا البيت علشان يجيبلي شبشب جديد امشي بيه وابويا طبعا كان منتظرني في البيت وعارف اني راجع البيت بعد الصلاة ... النكسه بقى عرف انا قاعد فين لما الواد راح عندنا البيت ... راح ابويا جه مع الواد علشان يخدني عرفت بسرعه بديهه مني انه ابو البت عندنا في البيت ... شدينا مع بعض في الشارع هو عايزني اروح وانا مش عايز وفي النهايه روحت .... اول ما شوفت ام البت وابوها قولت اعوذ بالله استغفر الله العظيم انا هناسب الناس دي !!! بدون الدخول في تفاصيل بعد ما ام البت وابوها خرجوا من البيت بعتوا الرد مع عمي بالرفض .... قولت اتفوا عن ابو اشكالكم وشديت مع ابويا وامي انهم عطوا فرصه لناس زي دي ترفضني رغم اني رافض بتاتا الموضوع ده من الاول ...
مواصفات العروسه دي كالاتي
غير متعلمه متوسطه الشكل على حسب قولهم
ابوها فلاح وبيتاجر في الحمير ههههههههههه وناس استغفر الله العظبم
منهم لله ابويا وامي خلوني استكبر واشتم في ناس مش ليهم ذنب في اللي حصل
فينك ياوفاء ااااااااه ياني ياني ..................

فيه خمس عرايس تاني بعد دول نفس نظامهم سكه واي كلام وتم اجباري على الموافقه باحداهن
ومن بين هؤلاء الخمسة عروسه اقل من وفاء بكثييير اعجبت امي ووافقت بي ... حاوت امي مرارا ان تقنعني بها ولكن دون جدوى وارسلت اليا بعض الناس كي يقنعوني ولكن دون جدى ....
ياض يا ايمن ما تفتريش حرام عليك احنا عايزين واحده تعيش وتقضيلك مصلحتك وخلاص ... احمد ربنا بدل ما تقع في واحده تطلع عنيك .... واذ بي انفعل عليها بشده وما عملتيش ليه كده ساعة وفاء يا اختي وفاء اللي كانت تعليم عالي وكنت بتشكري فيها ما حاولتيش تدبسيني فيها ليه كانت هي اولى من الاشكال الرمامه اللي انتوا بتجبوها انتي وابويا ... وابويا اتعصب عليا وشدينا مع بعض جامد وصوتنا جاب لاخر الشارع لان خلاص ابويا عطاهم كلمه وفهمهم اني موافق من غير ما ياخد رأيي هو وامي وكان الموضوع هيتم خلاص لولا جدة البنت بوظت الموضوع وقالت لابنها اللي هو ابو البنت لاء متوافقوش احنا عايزين واحد طويل كتفه في كتفها خخخخخخخخخخ ......
ودي كواليس ما دار قبل ان يبوظ الموضوع ....
اقسملك بالله يا امي ان الموضوع ده لو تم انا هطلع عنين البنت لحد ما تطلب الطلاق وابقوا سلمولي ع القايمه اللي هتكتبوها .. اسمعوا الكلام حرام عليكم هتظلموا البنت انتوا حرين هتشيلوا ذنبها ...... وما زالت مصرة على موقفها ..........
طيب اعمل ايه دالوقتي اهرب !! وما ارجعش الا بعد ان ينتهي ميعاد الفرح طيب والشغل هحتاج اعمل بقى اجازة اعتيادي وشغلانه شهر ولا شهرين واقعد عند حد من اصحابي وبعدين ارجع ...
اووووف نفسيتي تعبت اوي في الفترة دي لحد ما جدة البنت بوظت الموضوع قولت الحمد لله ...
ومن ساعه الموقف ده ابويا وامي خرجوا بره الموضوع وكفوا عن البحث عن عروسه او على الاقل اصبحوا يأخذون رأيي قبل اي شيء .....
لاني اخبرت امي انهم لو دبسوني في واحده مش عايزها هطلع عنيها يا اما ههرب ومش هيعرفولي طريق جره

والله لولا اني شخصيتي قويه كنت زماني لبست في الحيطه من زمان وعجبي

لاحظوا ان مفيش ولا سكه عدله من السكك اللي قولت عليهم دول
وان وفاء كانت ضفرها برقبتهم
لذالك اللي ربنا يرزقه بواحده زي وفاء يحمد ربنا لانه لو اتكبر عليها مش هيقع في واحده احسن منها لاء دا هياخد واحده تحت تحت تحت واسوء منها بمراحل انا اتصادفت مع بنات كتير ملقيتش واحده ربع وفاء
وحاسس اني هتجوز واحده اوحش منها شكلا وموضوعا ربنا يستر
مفيش الا واحده كانت من اختياري ماتت الله يرحمها (كانت من الاخر) ربنا يرحمها