الموضوع: بالفيديو: خرطوم مية الردياتير المقطوع فى البيجو 301 (نتيجة سوء تصميم مروحة الردياتير)

المشاركة الأصلية كتبت بواسطة Ahmed Amin

المنتج متوافق مع بيئة العمل.
بدليل إن فيه ملاك 301 كتير رخصو ومشيو بالعربية ومنهم اللي عدي 30 ألف من غير ما يقابل المشكلة دي.
ومنهم اللي بيقرا كلامنها دا دلوقتي ومحصلتلوش لأنه كان معاه عامل بيرفع البصمة عنده ضمير وكان واقف علي أيديه.
يعني القطع اللي حصل عندك بسبب أيد لعبت في مكان الخرطوم ومرجعتهوش مكانه, ولو كان العامل رجعه مكانه زي ما حصل مع باقي الأعضاء المحترمين مكنتش حصلت مشكلتك..

والحوادث حاجة تانية, ومحدش بيرمي اللوم علي صاحب العربية ومتدخلش الحوادث في الموضوع لأنها ملهاش علاقة بموضوع المروحة.
دي حاجة, ودي حاجة.
وربنا يستر طريقك وطريقنا كلنا.

طالما إن حضرتك بتتكلم عن الضمير, يبقى من باب اولى إن شركة بيجو يكون عندها ضمير و تنبه على العملاء الجدد من خلال مواقع التواصل الإجتماعى و منافذ التوزيع المعتمدة لما تبقى فى مشكلة متكررة زى قطع خرطوم مية الردياتير. أول حاجة قالهالى المهندس من شركة بيجو لما اتصلت بيهم و قولتله على المشكلة, قالى "إنت رخصت العربية؟"

الحاجة التانية بالنسب لموضوع إختبارات الأمان:

انا ماقلتش إنها مش امان, لكن المؤكد إن العربية مادخلتش إختبار الأمان الاوروبى و ماينفعش إن حضرتك تقول إنها امان بناءً على إفتراضات و مقارنات و إن واحد عامل حادثه "وربنا سترها" ولو حضرتك مش مقتنع باللى انا بقوله, إتفضل أقرأ التعليقات الموجوده تحت الفيديو على اليوتيوب: https://www.youtube.com/watch?v=sLjZn5wt6xI


إجمالاً و فى الأخر, لأ فى عيب فى تصميم الإطار الخارجى لمروحة الردياتير, و ماينفعش تقول ماهو فى ناس كتيرة رخصت و الفنى رجع الخرطوم و المفروض إن انا و الناس اللى وقعوا فى نفس المشكلة كان لازم ناخد بالنا, المفروض إن الشركة يا سيدى الفاضل تنبه على المشترين, المفروض إن الشركة تشطف الحد البارز القاطع للبلاستيك المحيط بالمروحة و سبب القطع.

انا مابدخلش الحوادث فى بعضها و لا حاجه, الإستاذ مارو اللى وقع فى نفس المشكلة قبلى بـ 3 شهور العربية طلعت دخان وهو ماشى بالعربية, لو الراجل ده ارتبك لما يلاقى محرك عربيته بيطلع دخان و هو على طريق سريع و فرمل, ممكن يعمل حادثه, لكن الحمد الله ربنا بيسترها.

لكن مش هانفضل نقول معلش و ربنا بيسترها و نبرر للشركات - مش معنى كده إنى لا قدر الله بتهمك بالتبرير, دى وجهات نظر - لغاية ماتقع مصيبه و نقول ياريت ضغطنا على الشركة إنها تنبه على العملاء من خلال المواقع و التليفون, وإنها تشوف حل للموضوع ده فى الإنتاج القادم.

المشاركة الأصلية كتبت بواسطة ahmed amin

ياسيدي أنا مش بقول أنك بتتهمني بالتبرير وأنا بقولك وجهة نظري زي ما وضحت لك.
وأنت ليك تتقبلها أو لأ.

أنت بتقول
يعني هما في التوكيل بقي عندهم علم إن فيه ناس كتير وقعت بالمشكلة دي بعد الترخيص,,
بسبب أيد ناس معندهاش ضمير بتحرك الخرطوم من مكانه ومش بيرجعه لمكانه الطبيعي ودي عربية زيرو, يعني لو عنده ضمير المفروض يرجع الحاجة مكانها.

والخطوة القادمة إنهم يأما يعدلو دا في الموديل الجاي,, يا أما يحذرو العملاء سواء شفوي أو بأستيكر.

لكن في الوقت الحالي مش كل الناس حصلها دا,,
يعني سبب المشكلة أيد العامل المهمل اللي بيرفع البصمة مش التوكيل ولا شركة بيجو.


وبالنسبة لموضوع أختبارات الأمان أما مش بفترض إن العربية أمان بناء علي صور حوادث ولا مقارنات,
أنت قلت وتسألت أنها مدخلتش الأختبارات ليه, وبدأت تشك شك مش في محله بإن فيه سبب لكدا,,

فوضحت لك السبب أنها مش موجهة للسوق الغربي اللي بيتعمل له أختبارات,,
وإن فيه عربيات أغلي منها بكتيرررر ومدخلتش أختبارات الأمان برضه.

و انا - و اى عميل - مابنطلبش اكتر من كده, إن الشركة تنبه على الناس عند الشراء إنهم يخدوا بالهم و يراقبوا فنى الترخيص, وفى الإصدار القادم إن شاء الله يعملوا التعديل اللازم.


وعشان نفسى ليها حق عندى, فانا ملزم إنى اقول إنى لا مستنى إعتذار من الشركة (بناءً على تصميم الإطار الخارجى للمروحة و بناءً على عدم التنبيه على العملاء حتى الأن) و لا مستنى يغطوا تكاليف الإصلاح, لكن حق الناس عليا إنى لما اشوف خطأ إنى ألفت النظر ليه عشان ماحدش يقع فى نفس الخطأ, و الله اعلى واعلم النتيجة ساعتها ممكن تكون إيه.


فى نقطه مهمة لازم أذكرها, صحيح إن وجود الإيرباجز و نظم الفرامل abs + ebd بيضيف نقط إيجابية عند اختبار عوامل الأمان, لكن فى حاجات كتير ممكن تأثر على امان الركاب بما فيها تصميم الكراسى اللى جوه العربية.


حاجه اخيره, انا باشكرك جداً على حسن تفهمك لتعليقى على ردودك و إنك ما اخدتهاش على إنى باتهمك - لا قدر الله - بالتبرير لصالح الشركة, و إنك مقدر إن ده نقاش جماعى مفتوح للجميع لإبداء الرأى و الرأى الأخر من خلال الأدلة و التجارب الشخصية, و أتمنى إننا دائماً نكون كده فى مناقشتنا للوصول للأفضل و الأحسن.