مبدئياً, اللى أنا كاتبه قد يحمل فى بعض جوانبه الخطأ (ما فيش إنسان معصوم من الخطأ), لكن أنا باتكلم عن تجربه عملية مع البيجو 301 هاى لاين و إجتهاد قدر ما إستطعت من البحث فى مراجعات اوروبية للسيارة البيجو 301 و تجميع قدر الإمكان لأراء بعض الملاك المصريين اللى إشتكوا من حاجات (زى التيل و البوجيهات و الفلاتر), وفى الأول و الأخر رأى باقى الملاك هو الفيصل (عشان ماحدش يتهمنى أنا كمان بإنى متحامل على العربية و بقدم شكوى كيدية, زى ما حصل مع العضو الكريم أبو هند (مع حفظ الألقاب) ).


ملاحظة: الحاجات اللى قبلها (*) معناها إنى حكمت عليها بصورة شخصية قائمة على تجربة إستخدام 2100 كيلو على مدار الشهرين اللى فاتوا, غير كده يبقى من آراء و تجارب بعض الملاك للعربية و الأعضاء هنا فى المنتدى (منهم الجداد و منهم القدامى).


أرجو من الأعضاء الجدد اللى مقدمين على شراء العربية إنهم يبحثوا جيداً فى آراء الملاك وعدم إعتبار كل اللى انا بقوله إنه كلام مسلم بيه (و يبقى سبب فى عذوفهم عن شراء السيارة), فى الأول و الأخر إنت اللى هاتركب العربية و إنت اللى هاتدفع فلوسها, شوف الإنتقادات و شوف المدح فى المميزات, وفى الأول و الأخر هو قرارك أنت.

و خد بالك إن فى فرق ما بين رأى واحد إشترى العربية لسه قريب (انا جايبها من شهرين و مشيت بيها 2100 كيلو) و بين واحد قطع 10000 كيلو فما فوق و بدأ يدخل فى موضوع الصيانة و المصنعيات و قطع الغيار و الأسعار و العمر الإفتراضى للقطع الإستهلاكية (زى التيل و البوجيهات و الفلاتر و غيره).

يا ريت اللى يشارك برأيه يقول فئة البيجو اللى معاه (مانيوال - أتوماتيك - هاى لاين) و فترة إستخدامه و عمل كام صيانه.


[gdwl][/gdwl][gdwl](*) للإسف زى ماقلت قبل كده إن العيب الجوهرى فى العربيات البيجو هو كيفية تعامل التوكيل مع مطالب و مقترحات و شكاوى ملاك العربية[/gdwl]

على سبيل المثال, خارج مصر تقدر تركب جهاز إنذار صوتى للـ 301, فى مصر ماتقدرش, والمبرر إيه؟ أصل فيها نظام إيموبليزر , (طيب إيه علاقة ده بده؟).


الناس إشتكت من موضوع تيل الفرامل و قصر عمره الإفتراضى (أحياناً أقل من 10000 كيلو و احياناً أخرى أقل من 15000 كيلو), فى ناس قالت إن التيل ده محافظ على البيئة و خالى من الإسبستوس المسبب للسرطان و مستخدم فى البى إم دبليو و ماركات تانية مشهورة, ولما سألت خدمة العملاء هل سبب الإستهلاك السريع للتيل إنه خالى من الإسبستوس, كانت الإجابة لأ, ده بيرجع لطبيعة الإستخدام.

* ملاحظة: بناءً على تجربة من بعض الأعضاء, لو التيل خلص قبل 10000 كيلو, بيتم تغييره فى التوكيل تبع الضمان بدون دفع أى مصاريف.

(*) ولما غطا الكنترول مالهوش أهمية, نزل ليه فى أول إصدار, و دلوقتى التوكيل بيقول - لما سألتهم - إن موضوع إضافة غطا الكنترول - للعربيات اللى نزلت من غيره - قيد الدراسة.


نظام تدفئة كرسى السائق, حد سمع عنه فى أى فئة من الفئات الثلاثة للعربية, موجود فى الكتالوج, بس طبعاً حسب كل سوق, و بما إننا فى مصر, فمش موجود, نظام الـ esp برده مش موجود, ليه؟ عشان تخفيض سعر العربية

ماهو سعر العربية لو زاد اكتر من كده, ما الواحد يجيب فورد فييستا بكل عوامل الأمان (وسائد و ستائر هوائية - abs - ebd - esp ) و عيش بقى مع عوامل الرفاهية فى السيارة, وكل ده بسعر 167000 (وده بعد الحركة الرخيصة من وكيل فورد هو كمان لما زود 9000 جنيه على سعر العربية موديل 2013 فى مقابل الإستلام الفورى بعد ما كان سعرها 158000 جنيه بالرغم إننا كنا فى شهر 3 من العام الحالى).



ممكن حد يقولى إحنا وصلنا لغاية فين من الشكوى الجماعية؟


ردود التوكيل:
تيل الفرامل بيخلص قبل 15000 كيلو (حسب الإستهلاك),
خرطوم الردياتير اللى بيتقطع عند الترخيص (هانحط إستيكر) * لمين بقى؟! للفنى الغلبان اللى غالباً معاه محو اميه
تغييرالبوجيهات قبل الميعاد المقرر (العملاء اللى بيقولوا إن إستهلاك البنزين عالى),
تغيير فلتر البنزين قبل الميعاد المقرر (أصل البنزين مغشوش),
تغيير فلتر التكييف قبل الميعاد المقرر (أصل مصر جوها مترب),
عايزين نحط زيت توتال زى الشركة ما بتوصى (كل سوق و ليه ظروفه),
فين غطا الكنترول (الموضوع ده قيد الدراسة),
فين نظام فرامل esp اللى بينزل فى موديلات أوروبا (أصل مصر مافيهاش ثلج على الطرقات زى أوروبا و عشان نخفض سعر العربية).
عايزين نظام تنبيه صوتى (العربية فيها إيموبليزر)


زى ما انتم شايفين كل حاجة ليها رد يخلى مسؤلية الشركة, حتى فى الحاجات اللى هاندفعلهم فيها فلوس (زى الإنذار الصوتى) بصراحة الموضوع بقى مزعج لأقصى درجة, و الواحد زهق من إنه يفضل يرد و يناقش فى حاجات بديهية, و مش كده و بس, بدأت الاحظ توجيه إتهامات لملاك العربية - زى أبو هند (مع حفظ الألقاب) - بالتحامل على شركة بيجو و توجيه إتهامات كيدية للشركة, لمجرد إننا بنطالب بحقنا, وبنطالب فى الحصول على خدمة افضل بعد البيع.


الواحد دماغه صدعت من الردود و التبريرات و تحسيس الواحد بالذنب (كل مانطلب حاجة أو نلفت النظر لحاجة خطأ) ويتقاله إن العربية نازلة أول فئة بـ (abs + ebd) العربية فيها 2 وسادة هوائية و الحاجات دى بتنزل فى الكورى اعلى فئة بس, و مش معقوله شركة كبيرة زى بيجو تعمل خطأ فى تصميم مروحة الردياتير ...... علماً بإن العربية تفتقد كثير من أساسيات الكماليات:

(*) 1- العبقرى مصمم العربية حاطط فرامل اليد كلها تحت مسند الذراع (الكونسول) فى الهاى لاين, يعنى فى حالة الطوارئ لو فرامل العربية حصل فيها مشكلة, لازم الأول ترفع المسند و بعد كده تسحب فرامل اليد (إن شاء الله ساعتها هاتكون نزلت تحت المقطورة).

* لو فى شركات تانية حاطه فرامل اليد كلها تحت الكونسول, مش معناه إن ده صح, إنتشار الخطأ مايخليهوش صح.

(*) 2- لما بتوصل موبايلك فى شاحن العربية لازم تحطه على الكرسى - أو على حجر - اللى قاعد جنبك, ليه؟ الباشا المصمم نسى (معلش بقى, اصلها شركه جديدة واول مرة تعمل تصميم عربية) إنه يعمل فتحة فى ذراع المسند عشان تحط الموبايل المتوصل بالشاحن.

* لو فى شركات تانية عامله كده, مش معناه إن ده صح, إنتشار الخطأ مايخليهوش صح.

(*) 3- العربية النيسان - انا مش بعمل مقارنة - اللى نازلة من 4 سنين و كانت عامله 90 الف جنيه فيها اماكن تخزين فى التابلوه من فوق و فى الأبواب و زراير فى الأبواب و غلق كلى للشبابيك بضغطة زر و فيها abs, و يبقى الواحد دافع 136000 (ده السعر الرسمى) و محتاس انا و اللى معايا فى العربية, لا في مكان نحط الموبايلات, و اللى بيركب ورا بيدور على زراير الإزاز و مش عارف إنها فى ظهر مسند الذراع ( الشركة بتوفر فى الأسلاك, عشان كده حطه الزراير كلها فى وسط العربية من قدام لورا مش فى الأبواب).

4- تعالوا بقى للناس اللى بتقول يا باشا إنت راكب ماركة شيك (يعنى إنت بتدفع 46000 جنيه عشان الشياكة و الماركة و التقفيل الأسبانى و الباركينج سينسور ونظام الـ ebd)

- التقفيل الإسبانى و التصميم الفرنسى: (*) شفرة حادة تقطع خرطوم مية الردياتير.

- تيل بيخلص قبل 10000 كيلو بوجيهات مسودة قبل 10000 كيلو و فلاتر تكييف و بنزين لازم تتغير كل كام الف كيلو (*) ولازم ترزع الأبواب عشان تتقفل و خلافه)

(*) - الشياكة (وجهات نظر): و هيا الشياكة إن الواحد يميل يمين لما يجى يقفل / يفتح الإزاز, ولما يجى يجيب الموبايل او الفلوس الفكه (زى فى البنزينة) تميل شمال تحت عند الباب, ولما تيجى ترفع فرامل اليد تقول للى قاعد جنبك شيل إيدك من على المسند و خلى الموبايل المتوصل فى الشاحن فى إيدك و ذراع المالتيميديا اللى مالهوش لازمة لإنه ورا الطاره, و كل ده ليه؟ عشان يوفر كام 100 جنيه


منهج التوفير (الذكى):

1- مافيش كالون للباب اليمين و للشنطة (ما أخدتش بالى لإن فى ريموت)

2- عدم رش دواخل العربية (برده ما أخدتش بالى لغاية واحد من الأعضاء ما قال عليها).

منهج التوفير (الزيادة عن اللزوم):

1- مافيش أى اماكن تخزين لا فوق التابلوه, ولا فى الأماكن العلوية للابواب.

2- زراير الإزاز جنب الفتيس.


فى رأى الشخصى, وجود الزراير فى الأبواب مع وجود مكان تخزين فوق التابلوه افضل من ذراع المالتيميديا اللى حاطه ورا الطاره, على الأقل الواحد هايحس بشياكة البيجو.




خلاصة الكلام, لازم نستمر فى توجيه طلبتنا على صفحة بيجو مصر على الفيسبوك, ويكون تحرك جماعى مش فردى, وفى خلال إسبوع نبدأ ننشر طلبتنا على صفحة بيجو فرنسا, غير كده يؤسفنى إنى أقول إننا مش هانوصل لنتيجة إيجابية (اللهم إذا كان وضع إستيكر على خرطوم مية الردياتير كان مطلبنا الوحيد).


النقطة الأخيرة, هل إحنا فعلاً بنتحامل على الشركة؟

الأخوة الافاضل اللى عايزين يردوا على كلامى, ياريت الأول تشوفوا مواصفات العربية اللى بتنزل فى اوروبا و بتتباع بكام يورو (شوفوا مراجعات الفيديو فى أوروبا), و الإمكانيات اللى بتتقدملهم بعد البيع, و شوفوا إحنا فى مصر بندفع كام يورو فى العربية و مواصافاتها إيه و محرومين من إيه بعد البيع, و الناس اللى عايزه تدخل فى موضوعات زى إتفاقية الجات و الجمارك فى مصر و سبب إرتفاع سعر العربية و إن اللى إحنا بندفعه فى الصيانة عبارة عن ملاليم بالنسبة لأوروبا, البركة فى باقى الأعضاء يشرحوا نظريات التسويق الدولية وفقاً لمتوسط الدخل للفرد و تناسب سعر السيارة و قطع الغيار لمتوسط دخل الفرد.


لينكات بمطالب الأعضاء و فيديوهات مراجعة للبيجو 301 و إزاى خرطوم مية الردياتير بيتقطع

لو حد عنده لينكات تانية ياريت يشاركها عشان الكل يستفيد

http://www.nilemotors.net/Nile/418931-a.html

http://www.nilemotors.net/Nile/414762-301.html

http://www.nilemotors.net/Nile/419135-301-2015-a.html

http://www.nilemotors.net/Nile/419008-a.html

http://www.nilemotors.net/Nile/414445-a.html

http://www.nilemotors.net/Nile/411572-301-2-a.html

http://www.nilemotors.net/Nile/416176-301-10000-a.html


[youtube]http://www.youtube.com/watch?v=sLjZn5wt6xI[/youtube]

‫بيجو 301 - قطع خرطوم مية الردياتير‬‎ - YouTube


حاولت أضيف لينكات اليوتيوب بس دائماً بتتحط بطريقة غلط, ياريت اللى يقدر يضيفها صح فى كومنت و يقول عملها إزاى, ولو فى شرح عن طريقة رفع صور هنا للمنتدى يبقى شئ رائع.