الموضوع: جايلى عقد عمل مهندس مدنى بدبى

المشاركة الأصلية كتبت بواسطة linuxstorm

مع احترامي لجميع المشاركات

اولا انا مهندس و شغال في الإمارات

احب اقولك يابن الحلال ان دة عرض مناسب

و الناس اللي بتقول ارقام كبيرة عن العيشة و الكلام دة كل واحد بيكون لية طريقتة في الحياة و المصاريف

و هنا راتب المهندسين بيبدأ من 3500 للي لسة جديد في الدولة

وانا اعرف ناس بتاخد راتب اقل من الراتب دة و عايشة كويس

في الاول مش هتعرف توفر لحد ما تفهم البلد

لكن بعد كدة هتعرف تتأقلم و تظبط امورك وهتاخد خبرة عمرك ما هتاخدها في مصر ودة هيفرق معاك في المستقبل

وربنا يوفقك

المشاركة الأصلية كتبت بواسطة aif

بص يا بشمهندس
لو كنت مش بتشتغل في مصر او بتشتغل شغل تعبان
كنت ح اقولك سافر وأهو ع الاقل تكسب خبرة في المجال وخبرة في البلد اللي انت فيها ويبقي قدامك مجالات للانتقال لعمل افضل خلال السنوات القادمة
لكن انت شغال في مصر في شركة كبيرة
يبقي المنطق انك ما تضحيش بوظيفتك في مصر عشان شغل في شركة صغيرة بمرتب متواضع
اصبر علي نفسك كام سنة في اوراسكوم ممكن ما تحتاجش تسافر للخارج اساسا لان فرص الترقي فيها كويسة وممكن بردو تسافر برة معاهم لان لهم مشاريع كتير خارج مصر
بعد 3 او 4 سنوات خبرة في اوراسكوم ممكن تلاقي فرص افضل 100 مرة من كدة

المشاركة الأصلية كتبت بواسطة amrezzat82

يا جماعة العروض بتكتر كل يوم فى الخليج و المرتبات للأسف بتقل للمصرين و ده احصائيات مؤكدة و عن تجربة للأسف ، ده غير قرف الفيزا للمصريين مقارنة بالأسيوين و الهنود و طبعا الأجانب
أنا مهندس ميكانيكا تصميم عندي 9 سنين خبرة و بعمل شغل ناس أجانب عندهم يجي 30 سنة خبرة وكنت بآخد على الأكثر ثلثهم فى شكرات كبيرة جدا و لللآسف مش لاقيهم دلوقتى كمان
نصيحة لو عايز تسافر عشان تستقر و مش ناوي تتنطط هناك و تكسب خبرة و تنتقل لحاجة أحسن يبقى بلاش لأنك مسافر صغير و ظروف الشركة من كلامك اي كلام
اسأل ظروف السكن ايه بالظبط و لو حبيت تسكن بره حيدوك بدل سكن و مواصلات كام
فى كامبات عمال بتبقى مجهزة نظيفة جداا فأسأل عشان تحكم صح
الأسعار دلوقتى ال 2-4 سنة خبرة مرتبهم 5000 الى 8000 و السكن على الشركة

نظرا للمرتبات المتفاوتة فى اوراسكوم ممكن تاخد 1800 و ممكن تاخد 4000 فى نفس المكان ف لو أنت قربت على ال 4 يبقى ده ميزة هنا و حتتعلم كام سنة و بعدين تطلع على حاجة أنظف كتيير

المصاريف فى اي دولة ممكن تصرف 1000 فى الشهر و ممكن ال 5 كلهم على حسب انت عايش ازاي

المشاركة الأصلية كتبت بواسطة secret-man

انا شايف ان خبرتك عاديه على حد كلامك واظن هما خدوك علشان اسم الشركه الى انت فيها وليس الخبره لان خبره المهندسين تتطلب تكون كبيره هنا فى الامارات علشان يحطلك مرتب فوق 10 الاف وسكن وسياره كمان وده هنا انا بشوف ناس بتاخد 20 و25 الف وفى فوق عن كده كمان حسب وضعه وخبرته وليه عربيه خاصه ليه وسكن استديو محترم

لكن موضوع الاوفر بتاعك ال5 الاف درهم هو بصراحه كرقم ميكفيش عيشه لو انت عايش براحتك فى مصر فهتيجى هنا هتتعب بيهم
تانى حاجه من رايى لو يقدرو يحلو معاك موضوع السكن والمرتب هو هو انا شايف انك تسافر والمرتبات هنا بتزيد بسرعه لان ممكن فى نفس السنه تزيد مره او مرتين كمان حسب تسليم المشاريع وتقييم الشركه فى السوق وشويه امور كده بتزبط موظفينها وتقدر بدل دخلت البلد تنقل على شركه تانيه وديه حصلت مع ناس كتير اوى وزبطت امورها وعايشين ملوك

طبعا مش هكلمك بقا عن البلد وكل شيىء فيها لان الامارات دلوقتى رقم 1 فى الخليج

ربنا يوفقك ومتنساش تستخير ربنا برضه وتسال قرايبك او اى حد قريب منك وبيخاف عليك ينصحك برضه لانه ادرى بظروفك مننا لاننا مهما كان منعرفكش شخصيا علشان يكون حكمنا كامل على الموقف

وربنا يرزقك الى فى الخير ان شاء الله ولو احتجتت اى حاجه فى الامارات انا تحت امرك

شكرا يا جماعة لكل الردود ... فى الاول اوراسكوم مش زى ماحضرتكوا فاهمين هى اه خبرة كويسة بس مش فلوس يعنى انا حديث التخرج مرتبى 2500 و فى ناس معايا خبرة عندهم 30 سنة مثلا مرتبهم 4500 يعنى مفيهاش مستقبل و كل الناس الكبيرة اللى معايا زهقانة من المرتبات و مش عاجبهم الوضع فانا اخدها من قصرها دلوقتى احسن بدل ما اسيبها بعدين وانا كبير .... بالنسبة للعقد بتاع دبى انا شايفة مجرد بداية ... هو هيدنى عربية بالبنزين يعنى مش هصرف مواصلات كل اللى هصرف اكل فى حدود 1000 درهم و سكن لو برة فى حاجة كويسة موجودة ب 800 درهم و ممكن اتكلم معاه فى بدل سكن يعنى هصرف 1800 قول 2500-3000 درهم عشان ابقى مرتاح و ده كلام ناس من دبى و هحوش 2000 درهم يعنى 4000 مصرى .... وبعدين فعلا بيبقى فى زيادة سريعة كل سنة على الاقل ومش بتبقى قليلة غير انى وانا هناك ممكن الاقى فرص احسن و مرتبات اعلى .... ولا ايه رأى حضراتكوا ؟؟؟