الموضوع: جايلى عقد عمل مهندس مدنى بدبى

بص رغم انى مش مهندس بس هقولك على تجربتى انا اتخرجت من كلية التجارة عام 93 و اشتغلت اول شغل ليه كنت باخد 160 جنيه فى الشهر و طبعا كنت بتبهدل و بعدين قررت انى اعمل دراسات عليا فى مصر الحقيقة ما اقتنعتش بيها و سبتها و قررت اراسل جامعات فى امريكا كبيرة و صغيرة و كنت باستلف الفلوس علشان اقدم فى الجامعات دى ، و اتعرض عليا شغل فى الخليج فى الفترة دى ب 4 الاف ريال و حاجات كدة طبعا رفضت و اخيرا الفرج جه من عند ربنا ، ردت عليا واحدة من اكبر جامعات امريكا و اتقبلت سافرت و مش عايز اقولك اتبهدلت ازاى هناك بداية من اختلاف اللغة و التعليم و الدراسة و المجتمع و الفلوس و كنت بعيط باليل و اقول نفس ارجع مصر هاهاهاها .
المهم انا خلصت من هنا و مش عايز اقولك جتلى عروض من كل حته من امريكا و من اوروبا و لكن مصر بصراحة كانت وحشانى و رجعت ادور على شغل محترم لغاية ما واحد تركى كان معايا فى الجامعة كلمنى على وظيفة فى تركيا و مش عايز اقولك العز الى انا كنت عايش فيه هناك , عربية بسواق و شقة فخمة جدا و مرتب كبير و الحمد لله كانت تجربة ممتازة و رجعت مصر اشتغلت فى مؤسسة ضخمة برضه بمرتب كبير
هى القاعدة ان فيه الاف من الخرجيين كل سنة من كل الكليات و المنافسة شديدة و الشغل قليل فلازم تبقى مميز علشان تاخد مرتب اعلى ياما بقى بتعليم اعلى يا بشهادات تخصصية يا خبرة استثنائية فى شركات عالمية
الوضع الى انت فيه دلوقتى احسن بكتير من مكتب هندسى صغير فى الامارات ، خبرة اوراسكوم كبيرة و سمعتها حلوة فى الشرق الأوسط كله يبقى علشات تضحى متضحيش علشان يطلعلك الف و لا الفين جنيه زيادة فى الشهر فى مكتب هندسى ملوش اسم ، ياراجل ، اما تعوز تضحى ضحى بخبرة احسن او تعليم احسن و اصبر شوية مش تضحى علشان كام الف زيادة كدة كدة مش هيعملولك حاجة و مش هتعرف حتى تجيب بيهم عربية جديدة