الموضوع: رايكم فى اركب علبه الفلتر دى على العمه دى على امل انها تزود عزم الموتو

ده نفس موتورك ال 1600 MPI ال 8 فالف و العربية اللي قدامك دي اسكودا فيليشيا

اما بخصوص ضغط الهواء و العمه فانا مش مقتنع قوي بالفكرة لعدة اسباب :-
1- اساسا اللي بيتحكم في كمية الهواء الداخلة للمحرك و المناسبة للاحتراق السليم هو البوابة و من قبلها الكنترول اللي بيحسب حساباته حسب قراءات الحساسات و بيفتح البوابة بنسبة محسوبة و ده في السلانسيه فقط (انا بتكلم علي موديل محركك و نوع بوابته )
2- في حالة استخدامك لرجلك و الدواسة لشد سلك الاكسراتير لرفع الار بي ام للمحرك هنا برضه الكنترول بياخد و بيعرف زاوية فتح البوابة من حساس موجود في البوابة و البتالي برضه بيحدد نسبة الهواء المناسبه و بيعرفها و علي اساسها بيحدد كمية البنزين اللي محتاجه تتضخ و سرعة فتح و غلق الرشاشات و معاهم الاشعال عشان يحافظ برضه علي افضل حريق و هنا ملكش تدخل برده
3- اساسا بوابة العربية دي بتسمي احيانا في انظمة الاشعال بوابة الخانق و معناه انها بتخنق فتحة دخول الهواء للحريق عشان تحافظ علي نسبة الخلط و بالتالي ده بيخلق فاكيوم (شفط هواء ) داخل الماينفولد و اسفل البوابة و ده معناه ان اساسا الهواء بيدخل بقوة ضغط = قوة الشفط (الفاكيوم ) المتولده داخل الماينفولد يعني مش محتاجه انك تضغطلها هواء من بره اساسا
4- الفكرة في زيادة نسبة الهواء بيعتمد علي كبر حجم غرفة الحريق و بالتالي سعة المحرك و بالتالي قوته و عزمه = زيادة في قطر فوهة بوابة الخانق = زيادة في خراطيم دخلوها
يعني كل حاجه محسوبة و سبق و قلت من قبل ان بوابات الخانق لكل محركات فولكس حتي 75 حصان سواء 1000 او 1400 او 1600 مقاس واحد 44 ملليمتر
5- الشيء المهم جدا هو درجة حرارة الهواء الداخل لغرفة الحريق و اللي كل ما يعلي كل ما يقلل كفاءة الحريق و لو لاحظنا هنلاقي محركات كتير في GM و KIA و هيونداي و بعض محركات فولكس الكبيرة هتلاقي فيه دورة تبريد مياة المحرك داخله فيها بوابة الخانق و احيانا الماينفولد لتبريده لهذا السبب

طيب لو حبيت تركب تربو مثلا بيعمل ايه ... حسب فهمي بيزيد سرعة الهواء و بالتالي بتقل درجة حرارته و لكن بيقابله تغيير في نسب ضخ البنزين بعملية remapping لوحدة الكنترول يعني مش بنزود سرعته و ضغطه للمحرك و خلاص يقوم يبقي تربو لألألألأ لازم نزود كمان نسبة ضخ البنزين عشان الخليط يكون غني و بيحدث ضغط و قوة مناسبة داخل الغرفة عند الحريق

من وجهة نظري ايضا ان تعديلات الفلاتر الاسبور و القصص دي غير مفيدة اساسا لأن الاوريجينال كافي لتوفير كمية الهواء المناسبة للمحرك و إلا كانو هيخسروا ايه ما كانوا كبروا المواسير و وسعوا الفتلر طالما هيزيد من قوة المحرك

المفيد فعلا هو التربو و لكن له حسابات كثيرة و تعديلات يجب عملها عشان يفيد

تعرف محرك عربيتي الي 1000 سيسي ال 16 فالف ده فيه منه نسخة تربو بيخرج كام حصان 111 حصان مقابل 70 حصان في العادي عندي و تعرف عزمه كام ؟؟ بيخرج عزم 155 نيوتن متر مقابل 90 نيوتن متر في العادي عندي
طيب عشان يعمل كده مغيرله ايه ؟؟؟
1- الماينفولد بدلا من الفبر اللي عندي راكبله اخر المونيوم و
2- وش سلند بدل العادي راكبله VVT اللي هو variable valve timing
3-البوابة بالفلتر فالخراطيم مقاس اكبر
4- نظام حقن البنزين تتابعي و قصه كبيرة في كنتروله و وحدة ال ecu بتاعته و برمجته

نزل فين بقي الموتور ده ؟؟؟ نزل علي الفولكس جول و باراتي في امريكا الجنوبية و خاصة البرازيل

الموضوع كبير يا صديقي العزيز