الموضوع: تقرير ماروتي 2014

بسم الله الرحمن الرحيم
أنا أبو بلال، مرحب بيكم، طبعا انا متابع من زمان نايل موتورز، واتهريت قراءة في مواضيعكم (صحيح من غير ما أكون عضو)، وده لان كان عندي رغبة ملحّة في اني اشتري سيارة، وكنت محتار حيرة كبيرة بين الجديد والمستعمل، وبين الماروتي واللادا (جداد أو مستعمل) والـ127 مستعمل [نظرا للإمكانيات المادية المحدودة]، وبعد استخارة، وإعانة من الله، اشتريت ماروتي 2014، بعد ما انتظرت فترة طويلة لغاية ما نزلت (كلكم عارفين انها اتأخرت بطريقة غبية)، عامة، حبيت أفيدكم وتفيدوني، وانزل تقرير عن اللي شوفته مع العربية
...........
المسافة المقطوعة:
وقت الشراء (20كم)
الآن (500كم)
...
صوت المحرّك:
وقت التدوير من بعد بيات (ضوضاء واهتزازات مبالغة لثواني ثم هدوء نسبي) ويمكن التغلب على ذلك بشدّ الشفاط لثوان، او دوس بنزين
...
أصوات غريبة في العربية الزيرو:
وقت الشراء: صوت صفير الفرامل الأمامية عالي إلى حد كبير، والمشكلة ان الصفير غير متواصل، بل متقطع (مع كل لفة للكوتش صفارة) ومش عارف ليه، المفروض يبقى الصفارة منتظمة لان الحديدة اياها اللي بيقفش عليها التيل (مش عارف اسمها) مزبوطة بطريقة معتدلة، وده بيوحي الي ان ممكن حاجة مش مزبوطة
الآن: صوت صفير الفرامل الأمامية يكاد يكون معدوم، ولو فيه صوت يعالج بالدوس على الفرامل بشدة مرة واحدة.
....
خشونة الفتيس:
وقت الشراء: خشونة في الغيار الأول، والمارشدير
الآن: الموضوع أهون وأيسر، ومازال الغيار الأول ساعات يعلق لمرتين ويجيب في الثالثة
....
نعومة الدركسيون:
ناعم جدا، لدرجة ان الطفل ذو الثلاث أو الأربع سنوات يستطيع انه يدير التارة يمين وشمال والعربية متوقفة تماما على اسفلت
....
استهلاك البنزين:
استهلاك كويس، هو مش ممتاز زي ما الناس باهرانا ومعشمانا، بس كويس، وده لسبب، ان السيارة كربراتير، مش رشاشات، وده طبعا مش بيوفر في البنزين زي الرشاشات، بس طبعا بيعطيك مزايا الكربراتير، يعني تقدر بعد كده ترمي على التاني (لو البطارية عملتها معاك)، وتتجنب وقوف السيارة الكامل في حالة عطل الكارتة، واللي انت هارشه
....
ضيق الصالون:
السيارة من الخارج شكلها طفولي جدا كما يعرف الجميع(والموضوع ده بيتحسن جدا مع جنوط 13، انا مركبتهاش بس واحد اعرفه مركبها مخلي العربية زي الكيا برايد بالضبط)، ولكن من الداخل (لما تقعد جوا يعني) فالسيارة ليست ضيقة، بل جيّدة، تقارب الكثير من السيارات الأخرى التي هي أضعافها وأضعاف أضعافها في الثمن
.....
ضيق الشنطة:
مقولكش يا معلم، ضيقة، تمامك نزلة إلى السوق(ده لو انتم راكبين فول تانك في العربية)، فمتحاولش تعمل للعربية غطاء، عشان هياخد الشنطة كلها وهترجع تبيعه بنصف السعر، ومتحاولش تشغل الشنطة باي حاجة لان هي المساحة الصغيرة دي اللي حيلتك، يعني متفكرش تسيب جرجن ميا، ولا جركن بنزين في الشنطة
* علاج ضيق الشنطة: السيارة يمكن طيّ الكراسي الخلفية إلى الأمام، (على نصفين، كل نصف على حدة) لمعالجة ضيق الشنطة، لاحظ ان ضهر الكنبة (المقسومة نصفين) معمول حديد، ومتغلف بموكيت متواصل مع موكيت الشنطة يعني متقلقش على ضهر الكنبة، بمعنى
1-لو هتشيل حاجة متوسطة، تنزل نصف ضهر الكنبة إلى الأمام، يبقى عندك مكان شخص كان هيقعد هتستعمله مع الشنطة
2-لو هتشيل حاجة كبيرة، تنزل الكنبة كلها إلى الأمام، وممكن تشيل غسالة يا معالم، او تلاجة صغيرة في العربية، وده بقا غير متوافر في عربيات تانية سيدان، بس الكنبة لا تطوى للأمام
3-لو هتشيل حاجة طويلة، سجاد مبروم مثلا، اي حوار هتعمل الآتي، هتنزل نص الكنبة اليمين لقدام، وهتنزل الكرسي المجاور للسواق لورا (وهتخلع مسند الراس)، وهتحط الحاجة الطويلة على الكرسيين، ولو اتزنقت عادي سيب باب الشنطة مفتوح يديك طول اكتر
.....
الكاسيت والسماعات:
هي مش بينزل معاها كاسيت وطبعا ولا سماعات، وانا صراحة لسه مركبتش، ولكن عامة، انا متضايق من البلاستيكة اللي فوق الشنطة (اللي المفروض يركب فيها السماعات) عشان محجّمة ارتفاع الشنطة، فانا بشيلها (هي بتتفك بسهولة على فكرة وتركب بسهولة)
.....
الحرّ والتكييف
السيارة غير مكيّفة، وبما اني مجبتش شماسات لسه، فلو سبت اي حاجة معدن على التابلوه ربع ساعة هتحرق ايدك لو جيت تمسكها خاصة لو العربية راكنة في الشمس، واثناء الحركة بالسيارة بعد الركنة في الشمس، الدنيا بتبقى حلوة بسرعة لو فتحت الشبابيك
.....
نور السيارة
نور السيارة الأمامي الواطي بيؤذي اللي جايين في المقابل، وبيقعدوا يرعشولي، وكأني مشغل النور العالي بتاعي (وطبعا بيتهيألهم)، فمش عارف هل النور فعلا عالي، ولا الناس بيتهيألها؟
.....
أبعاد السيارة:
العربية صغيرة، وابعادها صغيرة، وسهل ركنها وسهل خروجها، ومفيدة للي بيتعلم سواقة مش هيخبط ويرزع كتير، والعربية اللي قدامك تعدي في خمس دقايق من حتة مزنوقة وتعدي انت في ثانية لان العرض عندك اصغر من العرض عنده ب10 او 15 سنتي
....
الورق والترخيص والمرور:
المعرض جاب الورق بعد 16 يوم من استلام العربية (وده طبعا بعد تهزيق وزنّ بدأ من اليوم الـ، 14، يعني جاب نتيجة ههههه)
فحص لطيف
ملف 26 جنيه
تأمين 245 جنيه (3سنين)
طفاية 148 جنيه (غليت من يوم 1 مايو)
نمر 35 جنيه اللوحتين و10 جنيه خطاط
ضرايب 465 جنيه(3سنين)
المجموع: 930 جنيه (نار في جتتهم، الطرق مهببة وكلها تكسير ومسامير، والسيستم قعد واقع في المرور قرابة الـ3 ايام، وطوابير وزحمة، والرخصة طلعت بـ3 شهور مؤقتا لغاية ما يتم الاستعلام عن الافراج الجمركي او شهادة البيانات حاجة كده [ولكن مكتوب في ضهر الرخصة ان الضرايب والتأمين مدفوعين لغاية 3 سنين] فطبعا بعد 3 شهور هروح ادفع 10 جنيه عشان اطلع رخصة تانية، يبقى المجموع 940 جنيه، قول 950 بالحبشتكنات)
.....
مشكلة تدوير السيارة:
العربية فيها مشكلة، طبعا انا متخضيتش لاني قرأت عن المشكلة دي في منتداكم اكتر من مرة، خاصة من اصحاب الماروتي الزيرو، وصاحبنا اللي كتب موضوع اسمه (طلاسم الماروتي او حاجة زي كده)، المهم:
1-العربية لازم تدوس دوسة واحدة على دواسة البنزين للآخر قبل ما تدور عشان تدور من أول مرة
2-لو العربية قايمة من البيات في الشتا، زي ما قال صاحبنا، تدوس دوسة على البنزين، وبعدين تشد الشفاط درجتين، وبعدين تدوّر، ومتنساش ترجّع الشفاط مكانه عشان متخربش العربية
3-وركز اوي اوي مع النقطة دي، العربية لو بطلت منك في مطب، ولا في اشارة، ولا لأي سبب، تدورها تاني في ساعتها تدور عادي متكسفكش، لكن امتى بقا تكسفك؟ لو انت بطلت العربية وسيبتها مبطلة 5 دقائق وحبيت تدورها تاني، مش هتدور إلا لما تبرد، ومؤشر الحرارة ينزل تحت ال c، (يعني يا إما تدوّر العربية بعد ما تبطل مباشرة، يا إما هتضطر تستناها تبرد خالص، انما نظام اخش اشتري شبسي واطلع، او ربع جبنة من السوبر ماركت واطلع، هتطلع مش هتدور معاك يا معلم)
*ودي حلها في أوقات كتير انك تشد الشفاط برده شدتين عليك وتطول ايدك على المارش شويا (اوعى تزود عن 5 ثواني تخربه)، وان شاء الله هتدور معاك من المرة الأولى أو التانية.
....
صيانة الألف كيلو:
منتظر من الشباب يفيدونا في نوع الزيت، انا لقيت الكلام على الفلتر الكوري حلو، والسؤال، اجيب منين الزيت، والفلتر، انا قاعد في القاهرة، ويريت يبقى فيه اختيارات كتير عشان انقّي الأصلح ليّا.
....
وفي النهاية، ها أنا انضميت لفريق ماروتي نايل موتورز، ولو وصلت لجديد هبلغكم إن شاء الله، نفيد ونستفيد

المشاركة الأصلية كتبت بواسطة elpilot

مبروك ياباشا وربنا يديك خيرها ويكفيك شرها
بس ممكن استفسار بس انت عرفت ازاي انها 2014 يعني قصدك ان مكتوب في الرخصة2014 وكده ولا ايه اصلي دورت علي2014 لما حفيت وملقيتهاش ؟؟؟؟وحضرتك ايه الفرق بينها وبين 2013؟؟
اصلي شاري واحده من شهر تقريبا وكل الناس قالولي ان مفيش 2014 في الماروتي لانها اتوقف تضنيعها خالص وكل اللي موجود2013 ومتعدل الافراج بتاع ل2014 وبيتكتب في الرخصه انه2014 عادي
المهم عشان تتأكد شوف الزجاج بتاع العربية بتاع الباب مثلا من تحت والزجاج مقفول هتلاقي مكتوب عليه كلام كه وتحته مكتوب رقم الرقم ده13 ولا14؟؟
ومرة تانية الف مبروك علي العربية وربنا يباركلك فيها

شوف يا صاحبي، اولا هشوف إن شاء الله، ثانيا، انا فعلا شكّيت في اللي انت قولت عليه قبل ما اشتري العربية، خاصة اني لما بصيت على تاريخ تصنيع الكاوتش في المعرض عشان كنت شاكك في اللي انت بتقوله لقيته متصنّع في الاسبوع الـ11 سنة 2013، فتوقعت انها تكون ماروتي 2013 وفعلا عدّلوا الافراج الجمركي والكلام ده، زي ما انت بتقول، وبعدين رديت على نفسي، وقولت لنفسي، مهو الكلام ده لو فعلا صح (وهو غالبا صح على فكرة) انا مش خسران حاجة اني اجيب ماروتي 2013، لان طالما هم مزنوقين كده في بيع الـ2013، يبقى ال2014 الحقيقية لما تنزل هتنزل غالية الفين تلاته عن الـ 2013، وانا اولى بالفلوس دي، مهي هي، وانا كده كده هجيب، وكنت خلاص على وشك اني اجيب 2013، وعمال اقول اصبر يابني اصبر يابني، زي ما انت جبت، وكده كده هي زيرو بس مركونة ييجي 6 شهور ولا حاجة، بتاعتي وبتاعتك، ولو 2014 الحقيقية نزلت، هتنزل بسعر اعلى بكتير من السعر ده، عشان خاطر يرغّبوا الناس تخلّص ال2013، والكلام ده انا مش شايفه هيفرق كتير
بس انت اشرحلي اكتر الاقي الكلام على الإزاز بالضبط بالضبط؟
انت عامّة هتلاقي على الكاوتش 4 ارقام 1113 يبقى الاسبوع الحداشر الفين وتلاتاشر، لو 0913 يبقى الاسبوع التاسع الفين وتلاتاشر، وهكذا