الموضوع: مشكله عاطفية

بسم الله الرحمن الرحيم
لازم اطول لان الموضوع مش بسيط بس عايز ارائكم معايا اتعرفت علي بنت هي قريبتي من بعيد شويتين وتبقي بنت اخت مرات اخويا في نفس الوقت تمام قربنا من بعض علي الفيس كنا بنتكلم بال 9 ساعات وراء بعض وصلنا لدرجه تعلق جامده واعترفنا بحبنا لبعض مع بعض بقالنا اكتر من 3 شهور مفيش أي مشاكل متفقين في كل حاجه الا في حاجه واحده وهي اني من مكان زي قريه بس مش قريه بالمفهوم العام للناس وهي كانت عايشه فيها بس بعد فتره نقولوا لمدينه جنبنا بحوالي 15 دقيقه لما كنا بنتكلم في تفاصيل الجوازواحلامنا وكده قالت بس انا مش عايزه اعيش هناك قولت محدش عارف النصيب فين وربنا يسهل ممكن نعيش في اي مكان حسب شغلي وكده وهي قالت ماشي لحد امبارح لقيتها بتقولي انا فكرت كتير ومش هينفع اعيش هناك وده قرار وانا بفكر بقالي كتير وهي في سياسه واقتصاد وانا في حقوق في كلامها امبارح بتقولي كفايه اني رضيت بالكليه بس مش هتنازل في المكان الي هعيش فيه خلي التنازلات لحاجات كبيره وهي كان في ناس عايزين يتقدموا في طب وهندسه وكليات قمه بس هي كانت بتقولي انا اختارتك انت طب ليه مش عايزه تقعدي فيها بتقولي اعزار بتخليني اشد في شعري مش عايزه ولادي بتكلموا فلاحي تقولي انا مش بحب بيت العيله اصلا والكبيره بقي تقولي مش عايزه احس اني نزلت عن مستوايا او الي بحلم بيه الغريب ان اهلها عادين جدا دا اسمه ايه انا احترت انا غلطان كده ؟؟ حد يقولي الحل لو سمحتوا

المشاركة الأصلية كتبت بواسطة kemoztanta

ممممممممممم ، بص هو طموح مشروع انها ترفض تعيش في جو القرية وتحب تعيش في مدينة والي اخره ، بس هي جايباها بطريقة مش حلوة ، اصل مهما كان محدش هيهرب من أصله ! وبالمنظر دا بكرة تقولك متنزلش بلدكم تشوف اهلك ولا هترضي انها تيجي معاك وتبدأ بقي مشاكل وصداع انها تتسبب في انك تقاطع أهلك !!

راجع نفسك وعيد تقييمها وهل دا بس اللي مأزمها من ناحيتك ! وبعدين موضوع الكلية دا لا تسمح أبدا انها تقلل منك فيه تاني مرة ، هتبقي ذله ليك طول عمرك لو رضيت بالكلمة دي تتقالك عادي منها كدا.. مالها الحقوق ! وبعدين محاميين كتير متجوزين أطباء ..هو انت معهد ولا دبلوم عشان تفكر حتي تطرح موضوع فرق التعليم دا

في النهاية شوف مميزتها وعيوبها و أوزنها وكن صريح وواضح مع نفسك ومعاها ، انك غير راضي عن كذا وكذا فيها و هي برضة تقولك هي غير راضية عنك في كذا وكذا وشوف هتتفقوا ولا لاء ، سيبك من كلامكم بالساعات والرغي دا كله مش هيشفع بعد الجواز لو لاقدر حصل مشكلة بينكم..

تعتقد حضرتك في حاجه تتقال بعد ما قالت ده قرار مش هتراجع فيه وهتنازل والكلام ده دا غير كلام اهلها الي دايما كانت تقولي هما في البيت مش هيجوزوني غير لواحد مستواه عالي انا مش بقول الكلام ده علشان في مشكله فانا بقول الوحش بس هي فيها حاجات كتير حلوه بس تبقي ايه جنب الكلام الي انا كاتبه فوق ده