الموضوع: نتكلم بصراحه بقي...الواحد يشتري ماركة ايه ف البلد دي

المشاركة الأصلية كتبت بواسطة شريف

و الحكومة هتعمل كدة ! و تبين سرقات رجال الاعمال !! و تخسر المليارات السنوية دي من موازنتها !!!

الاول انا هتكلم عن نقطة الجمارك
حصيلة الدوله الكلية من الجمارك سنويا حوالي 14 مليار جنية (دول حصيلة الجمارك على كل حاجه : عربيات - قطع غيار - اجهزة طبيه - سلع استهلاكية ...الخ)
نسبة العربيات (بأنواعها ملاكي - نقل - معدات ثقيلة) + قطع الغيار = الثلث 33% = 4.5 مليار جنيه
لو شيلنا ثلثلهم فقط قطع غيار يبقى جمارك العربيات بأنواعها حوالي 3 مليار جنية
حجم دعم البترول السنادي 100 مليار جنية بعد ما كان وصل لأكتر من كده
من هنا نكتشف حجم الدخل الى بيدخل للبلد من الجمارك على السيارات
من الناحية الاقتصادية 3 مليار فقط جمرك السيارات من 1000مليار حجم الموازنه العامة يعنى 0.3% مش مكمل حتي تلت 1% يعنى مش ده الى هيضلع البلد

النقطه الاهم هل الحكومه هتقدر تنزع ورقة التوت عن الوكلاء والتجار وتشيل الجمارك على العربيات
ده فعلا الرهان وده الى هتكشفه الايام الجايا

المشاركة الأصلية كتبت بواسطة amrelsaqqa

ماهو المفروض بنفس المبدأ اصلا ان الجمارك عمالة تقل تدريجيا من فترة والمفروض اننا ما شاء الله عمالين نحس بانخفاض الاسعار !
مين قال ان الموضوع هيتم مرة واحدة بعد 5 سنين ؟ ولا 4 سنين !

على فكرة الفيرنا -مش هيبقى- تكلفتها 45 الف جنيه
هى الريدي العربية الفيرنا بتقف على غبور بـ 35 الف بالكتير ومن سنتين كانت 28 الف بالظبط والكلام ده من مصدر ثقة

ثم انا اضمن منين سعر الدولار ساعتها مثلا !

في مثل حلو بينفع في المواقف دى وبتخليك تقطع الشك باليقين لو لا قدر الله لقيت نفسك بدأت تصدق لا اراديا:

"الحداية ما بتحدفش كتاكيت"

هييجى يقولك الجمارك بقت صفر بس بقى اسمها ضريبة مبيعات ومشروع قرار بتعديل نسبة رسم التنمية ( وكله بالقانون ) ، تقدر تفتح بقك ساعتها ؟ :d

كمان 4 - 5 سنين هيحصل انخفاض للاسعار لسببين :
الاول : انخفاض الطلب على السيارات لارتفاع تكلفة تشغيلها (وضحت النقطة دي بالتفصيل فى موضوع آخر قبل كده)
الثاني : رفع الجمارك بشكل كامل عن السيارات وده تأثيرة المباشر ان الناس هتفهم وتقدر تحاسب التاجر وتقولة العربيه دلوقتى ليه ازيد من بره بعد ما الجمارك اتشالت

محدش حس بانخفاض فى 3-4 سنين الى فاتوا لسببين :
الاول : الفرق راح في كرش الوكيل والتجار
الثاني : ان المشتري معندوش ثقافة السؤال وحساب التاجر
لو حضرتك جيت تكلم حد دافع 90 الف فى فيرنا ولا لانوس وتقوله خسارة فيها هيقولك هنعمل ايه الله يخرب بيت الجمارك واساسا عربيته معلهاش جمارك اصلا

بخصوص سعر الفيرنا انا عارف ان تكلفتها اقل من 45 الف وعارف اني لو قلت كده محدش هيصدقني لكن لو حضرتك بصيت على مشاركه اتكلمت فيها بالارقام لو حسبتها هتلاقيها رقم قريب جدا من الرقم الى حضرتك ذكرته

بخصوص الدولار : احنا بنتكلم عن سعر العربيات مش عن سعر الدولار زي ما ممكن يطلع ممكن برضو ينزل
هضرب لحضرتك مثال العربيه الى سعرها عالميا 12 الف دولار بتقف على حضرتك حاليا بـ 22 الف دولار كمان 4-5 سنين بعد شيل الجمارك وانخفاض الطلب على السيارات هتقدر تحاسب التاجر وتقوله ليه مش بـ 12 الف دولار زي بره ؟
بغض النظر الدولار بكام ساعتها

بخصوص دخل الجمارك للدولة انا اتكلمت بأرقام فى الموضوع ده في المشاركه السابقة لو ركزت فيها كويس هتكتشف ان جمارك السيارات نسبتها ضيئله جدا جدا بالنسبة للدولة (3 من 1000)
وهيبان ان الهدف الاساسي لها هو استخدامها كغطاء لعدم كشف سرقة الوكلاء والتجار