الموضوع: السلام عليكم انا عضو جديد معاكم و كنت عاوز اسال شويه اساله

المشاركة الأصلية كتبت بواسطة white ashe

السلام عليكم
الف الف شكر والله بدعيلك انت والاخوه الكرام
احلي حاجه في حضرتك ان ردودك علميه و مقنعه
و معلش لو مفهاش تعب يا ريت صور ال3 مواتير و اكوادهم عشان و انا بشتري ابقي عارف و بارك الله فيك

جزاك الله خير وكلنا بنتعلم من بعض

دى صورة الـ 1.4 الـ 60 حصان والكود بتاعه AKK او ANW او AUD وعلى فكرة هو نفس شكل الموتور الـ 1.0 اللى بتنزل بيه العربية والكود بتاعه ALD او ANV او AUC مع اختلاف ان الغطاء مكتوب عليه 1.0 بدل 1.4



ودى صورته من غير الغطاء



ودى صورة الـ 1.4 الـ 75 حصان وده مشهور بإسم 1400 2 كامة والكود بتاعه AUA او APE



ودى صورته من غير غطاء



ودى صورة الـ 1.4 الـ 101 حصان والكود بتاعه AUB او AFK

هو نفس شكل الموتور الـ 2 كامة ولكن كابلات البوجيهات لونها أحمر



وارد جدا تلاقيها موتور 1.0 وده اللى بتنزل بيه فى مصر وكمان ممكن تلاقيها 1.6 او 1.8 او 2.0 ودى من مميزات الابيزا والجولف انك تقدر تسقط فيها مواتير بأحجام مختلفة وبدون تعديل او لعب فى اساسيات العربية

لكن الـ 1.4 الواحد كامة والاتنين كامة هتلاقيهم منتشرين اكتر

المشاركة الأصلية كتبت بواسطة white ashe

انا فعلا مش عارف اشكرك ازاي بس بدعيلك والله
طيب كنت عاوز اسالك سؤال بصراحه هو انهي الافضل ابيزا 97 ل 99 ولا 2000 ل 2002
و معلش هو الابيزا احسن حاجه في فئه العربيات ال ب 40 الف ولا في حاجه احسن بصراحه انا عارف انك في قسم سيات بس بسالك السؤال ده كاني اخوك الصغير لاني شوفت في كونتاكت كار حجات كتير هوندا سفيك و لانوس و فيرنا و كليو و ريو و فيات بموديلات كتير و سكودا و اوبيل و بولو و جولف و في بعض الانواع زي الفيات بيبقي فيها موديلات 2007
لاني مش هيبقي معايا فلوس افضل اصلح و اصرف

المشاركة الأصلية كتبت بواسطة white ashe

و معلش ايه رايك في الكولت
ويسلام لو تقلي نوع و موديل تبقي ريحتني من الحيره الي انا فيها و يسلام لو قلتلي مميزات و عيوب العربيه
و انا شاب و اول عربيه فعاوز حاجه تكون سابته و فيها تسارع و اعتماديه و انا فهمت من حضرتك ان الابيزا بيتسقطلها مواتير كبيره فعلي ما اعتقد كده ان العربيه سابته جدا عشان السرعات العليا

- لو انت معاك 40 يبقى تجيب عربية 35 وتخلى الباقى معاك لأن اى عربية هتجيبها لازم هتعملها طقم سرفيس او صيانة دورية زى تغيير زيوت وفلاتر و سيور وبوجيهات وهتلاقى حاجات تانية طلعتك وانت مكنتش شايفها فيها وهتبان مع المشى

بالنسبالى تانى اختيار يجى بعد الابيزا هى السيفيك جميلة طبعا وثبات وجرى كويس جدا بس 35 دى تجيبلك سيفيك 93 وهتبقى حالتها تعبانة

الكولت تيجى بعد السيفيك بس هى عربية نادرة وصعب تلاقى فيها حالة نضيفة وكمان السعر ده يجيبلك واحد 91

خليك فى ابيزا 2000-2002

المشاركة الأصلية كتبت بواسطة white ashe

شكرا جدا معلش تعبتك معايا و كل سنه و انت طيب
و معلش تقولي احسن اماكن اكشف فيها علي العربيه

وانت طيب

للاسف مش هقدر افيدك فى الموضوع ده لانى من اسكندرية
بس عموما احسن حل انك تاخد العربية وتروح للميكانيكى المتخصص بتاعها

المشاركة الأصلية كتبت بواسطة white ashe

السلام عليكم
معلش هتعبك معايا عاوز اعرف الفرقق بين ابيزا 2000 و 2001 و 2002
و قدامي ابيزا 2000 كوبيه كنت عاوز اعرف الفرق بين الكوبيه و العادي غير عدد الابواب
و معلش هو المواتير ال 2000 سي سي و 1800 سي سي تربو الحجات دي بتركب علي العربيه من غير تعديل في القواعد او الحوض و العربيه هتبقي حلوه في السبات علي الباور هورس العالي وقدامي كولت 99 و سيفك 92 و93

المشاركة الأصلية كتبت بواسطة white ashe

و معلش ايه رايك في ابيزا 2006 اتوماتيك انا اسف جدا انا عارف اني تعبتك

الابيزا من 2000 الى 2002 نفس الشىء
الطبيعى بالنسبة للكوبيه فى اى عربية انها بتكون نسخة شبابية وبالتالى بتختلف فى حجم الموتور انه بيكون اكبر وفتحة سقف وجنوط ولكن الموضوع مش قاعدة
يعنى فى بعض الاحيان بيكون الكوبيه زى العادية والفرق فى عدد الابواب

الجيل ده من الابيزا نزل فيه مواتير من 1000 الى 2000 سى سى بدون تعديل القواعد ولكن الاختلاف بيكون فى العفشة والفرامل لأن كل ما تكبر قوة الموتور كل ما تحتاج عفشة اكبر وفرامل اكبر

الكولت والسيفيك من العربيات اللى انا بحبهم خصوصا الموديلات اللى انت قايل عليها

الابيزا 2006 جميلة جدا ولكن قطع غيارها أغلى من الموديلات اللى قبلها ومش متوفرة كتير

الفيصل فى الانواع اللى انت محتار مابينها:
1- احتياجاتك (سيارة شاب ولا سيارة عائلة) وطريقة سواقتك واستخدامك (بتحب تجرى وغرز ولا هادى) (داخل المدينة ولا بتسافر كتير)
2- حالة العربية
3- توافر قطع الغيار والميكانيكية فى محافظتك

الـ 3 عوامل دوول هما اللى هيحددوا انت هتجيب انهى عربية لأن بصراحة كلهم جامدين ولا غبار عليهم