الموضوع: L3 رائعة byd الجديدة كل شئ عنها بالتفاصيل والفيديو والصور

عفشتها بتجيب لها عفشة تويوتا 2005
فلتر الهواء ب 15جم صينى ويركب بتاع الكروﻻ اﻻصلى
فلتر البنزين نفس السعر
فلتر التكييف من 15 الى25 حسب السعر والخامة
بوجيهاتك ان جى كى عادى وبراحتك لو عاوز بلاتنيوم
الموتور معذرة مش هاقدر افيدك فية اوى
ﻻن عربيتى 1600cc
اللى قولته لحضرتك ده بيركب لجميع موديلات البى واى دى
ماعدا fo الصغيرة

المشاركة الأصلية كتبت بواسطة ابوجنى2112

عفشتها بتجيب لها عفشة تويوتا 2005

فلتر الهواء ب 15جم صينى ويركب بتاع الكروﻻ اﻻصلى
فلتر البنزين نفس السعر
فلتر التكييف من 15 الى25 حسب السعر والخامة
بوجيهاتك ان جى كى عادى وبراحتك لو عاوز بلاتنيوم
الموتور معذرة مش هاقدر افيدك فية اوى
ﻻن عربيتى 1600cc
اللى قولته لحضرتك ده بيركب لجميع موديلات البى واى دى

ماعدا fo الصغيرة

عزيزى ابو جنى

والله يا اخى الفاضل وحشتنا مشاركاتك الجميلة فأين انت ؟

وبالمناسبة الشخص الذى فى التوكيل الذى رد على تليفون الزميل من المؤكد انه كان مريض ودرجة حرارته مرتفعة
ويجب على التوكيل ان يعطوه اجازة حتى يرتاح
او يتعلم يرد صح على العملاء

لأنه ببساطة شديدة جدا انت لا تحتاج عبشة تويوتا ولا أى شئ اخر هل تعرف لماذا ؟

لأن العبشة امام وخلف بالمساعدين والموتور بمشتملاته والفلاترجميعا والفتيس المنيوال بالدبرياج والفتيس الأوتوماتيك
والريداتير ومراوح التكييف والتبريد

متطابقين كوبى بيست فى L3 وفى F3

واى صبى ميكانيكى سيعرف هذا بعد 5 دقائق من معاينة السيارة

لذلك فقطع الغيار الميكانيكية للسيارة l3 متوفرة فى التوكيل والمحلات الخارجية ليس فقط الأن بل من عدة سنوات لأنها نفس قطع غيار f3

ولأن السيارة غير معروفة للأن

( ببركة التوكيل وتصرفه العجيب الذى لم يعمل لها اى دعاية )

فلا تطلب من المحلات قطعة غيار ميكانيكية لها بل قل له انها لسيارة f3
وستركب بالمللى بأذن الله

اما لو سألتنى فما الفرق بين السيارتين اقول لك اقرأ هذا الموضوع من بدايته وانت تعرف الفرق

والله يا أبو جنى لا اعرف كيف يترك التوكيل اى حد والسلام
يقول اى كلام فارغ
لعملاء محترمين ينون شراء السيارة

المشاركة الأصلية كتبت بواسطة khaled bebo

والله يا جماعة انا احترت ....... قريت الموضوع ده من أوله لآخره ورحت اتفرجت على العربية وشكلها عاجبنى والأوبشن كمان بس بخاف من أى عربية عليها مشاكل علشان دول تحويشة العمر مش هزار يعني

نفسى في نصيحة بجد أعمل ايه أشترى لانسر جديدة وخلاص علشان الاقى فلوسى تانى ولا ادفعها في عربية زي كده وناس كتير بتحذر منها وممكن كل فلوسى تضيع فيها

ياريت اللي عنده العربية دي من فترة يقولى عاملة معاه ايه وانا لو لقيت واحد بس في الشارع راكبها هاوقفه واسألة انشالله يشتمنى ههههههههه

ومعلش ياريت السادة الأعضاء يقولو لى موقع الشركة على الانترنت علشان مش عارف الاقية

وليه توقف حد فى الشارع .. انا اجيب لك صاحبها لغاية عندك

ده تقرير زميل فاضل فى المنتدى استلم السيارة فعلا
وطبعا كلام صاحب السيارة أكثر ثقه من اى حد أتفرج عليها ومشى
ارجو ان يفيدك والرجل لن يتأخر فى اجابة اى سؤال

المشاركة الأصلية كتبت بواسطة moe khodairy

السلام عليكم و رحمة الله و بركاته

هذا هو التقرير الذي و عدت به عقب شرائي byd l3 مانيوال و تجربتي بعد 500 كيلو،في الحقيقة انا لسه مكاملتش ال 500 كيلو بس في زملاء كانوا عايزين التقرير بسرعة فكتبته على عجل و اتمنى انه يكون وافي و بيرد على كل تساؤلات السادة الزملاء بشأن العربية و طبعا انا تحت امر أي حد عايز يسأل في أي حاجة.

أولا: مواصفات السيارة (لمن لا يعلم) :

- سعة الموتور 1500cc
- هورس باور 107 حصان
- مانيوال
- فتحة سقف
- مفتاح بصمة ذكي لتدوير السيارة و فتح السيارة من ثلاثة اماكن و هي الشنطة و الابواب الامامية
- navigator و به مجموعة برمجية من الادوات المساعدة مثل الالة الحاسبة
- الكاسيت يشغل dvd, usb, aux fm,am
- تلفزيون رقمي يستقبل القنوات الارضية digital tv
- تارة القيادة multifunction بها ازرار تحكم في الصوت و تغيير mode و القنوات او المحطات
- مخدع امامي به مكان للتخزين و به مدخل ال aux و usb و مخدع خلفي
- 5 جنوط سبور 15
- فرامل abs وebd
- 2 air bags للسائق و للراكب الامامي
- ايموبيلايزر و جهاز انذار
- حساسات للركن parking sensors
- كاميرا خلفية للركن تعمل تلقائيا مع المارشدير rear camera
- تكييف (طبعا)
- 4 زجاج كهربائي و ضبط كهربائي للمرايات
- زجاج خلفي و زجاج جانبي خلفي ملون
- تثبيت لكرسي الاطفال
- فتح الشنطة و تانك البنزين من الداخل
- العربية معاها كوريك و مفتاع عجل و مثلث

ثانيا: تجربة الحجز و الشراء

قمت بزيارة معرض شركة الأمل -مرة أولى- الموجود بشارع نزيه خليفة خلف الحرية مول بالكوربة لمشاهدة السيارة انا و زوجتي و قمت بركوب السيارة و تدويرها و تجربة التكييف و خلافه و فعلا اعجبت بالسيارة و اقتنعت بها دونآٓ عن السيارات الاخرى في فئتها مثل الايمجراند و الانفي و m11 و لا مجال للمقارنة مع الفيرنا و اللانوس مع الاحترام للجميع طبعا.
سألت الموظف المسؤول عن السعر فقال 88,000 فقلت له من الاخر كام؟ فقال -من غير تحوير-: ممكن ننزل ألف جنيه. طبعا انا لما لاقيته قال كده على طول قلت في نفسي المرة اللي جاية لما اجي احجز ممكن يبقى في كلام تاني.
المهم، رحت مرة تانية علشان احجز و ادفع عربون و اختار اللون كنت رسيت في المرة الاولانية على اللون النبيتي لانه هو اللي شفته و شفت السيلفر و الفيراني بس لاقيت اللون الاحمر معروض المرة دية و مكانش موجود المرة اللي فاتت و دخل دماغي جداو قررت اني اختاره ، و انا بتكلم مع الموظف في السعر قلتله ها اخر كلام ايه؟ قاللي زي ما قلنا المرة اللي فاتت مش هينفع انزل اكتر من الف جنيه، يعني السعر هيبقى 86,000 !!! :d
المهم، انا ماعلقتش و قلتله يعني ده اخر كلام ده انتوا حتى مش بتدوا اي هدايا؟ قاللي و الله هو ده اللي هقدر اعمله و ده السعر النهائي.
دفعت ألف جنيه و جيت اختار اللون الاحمر قاللي بس الاحمر ممكن يتأخر لمدة عشر أيام قلتله مش مشكلة، قاللي طب قول لون تاني يبقى احتياطي و ألح في الطلب بس أنا رفضت لأني حسيت انه ممكن يكون عنده ستوك في المخزن او عربية في المعرض من الوان تانية و عايز يخلص منهم او عايز يفضي المخزن شوية بدل مايطلع من المصنع بحجة ان اللون هيتأخر!! و فعلا طلع عندي حق و استلمت بعد 3 أيام!! فنصيحة اختار اللون اللي انت عايزه و ما تتنازلش.

ثالثا: تجربة الاستلام

كنت حجزت يوم جمعة لاقيته بيكلمني يوم الاثنين الصبح بيقولي العربية وصلت! رحت في نفس اليوم اتفرجت عليها و دفعت باقي المبلغ ناقص الف جنيه و قلتله اني هستلم بكرة الثلاثاء.
و انا بفحص العربية استعنت بموضوع قديم هنا على المنتدى عن كيفية استلام f3 للاخ الاستاذ ابو ياسمين و وضعه الاستاذ باسم نجيب استعنت بيه كمرجع لترتيب افكاري و عملت للموضوع كوبي على الايباد معايا و استخدمته ك check list و انا بفحص العربية.
اطمنت انه كله تمام و مفيش مشاكل تقفيل خالص و فعلا العربية تقفيلها جيد، الموظف جربلي ال navigator و قالي فكرني بكرة اديك الميموري كارد بتاع الخرائط -و قد كان-
لاقيت زيت الباور ناقص شوية خليته تاني يوم اشترى زيت و كمله لحد max و لاقيت خربوش صغير جدا ناحية باب السواق و قاللي هعملهولك باللبوليش بس ما راحش ، هو اصلا الخربوش لايذكر بس الواحد و العربية جديدة بيبقى حاسس ان العالم كله شايفه : D
الموكيت بتاع العربية كان متوسخ بلون اسود تقريبا من المصنع بس هما في المعرض نضفوه.
العربية كانت عاملة بتاع 34 كيلو تقريبا.
رحت تاني يوم فعلا و كان معايا واحد صديقي استلمت و دفعت الباقي و اخدت ضمان الكاسيت و المانيوال و ورق العربية و جواب المرور، الموظف قاللي 50 جنيه علشان الورق اديتهمله و اديته 100 جنيه اكرامية ليه و للناس اللي في المعرض.

رابعا: تجربة القيادة:

كنت قلقان من رحلة العودة للهرم و خايف مااخدش بسرعة على الدواسات و ابعاد العربية بس القلق ده تلاشى تماما بعد ما ركبت العربية و زبطت المرايات و وضعية الكرسي و طلعت على البنزينة اللي بجوار المعرض فولت ب 130 جنيه -التانك 50 لتر- و القلق و الخوف تلاشوا فعلا حتى قبل ما اكون على صلاح سالم، العربية سواقتها سهلة جدا و ناعمة و سلسة و الباور حلو جدا.
صوت الموتور هادي و عزل السيارة جيد
قعدة العربية مريحة و الكراسي جلد و مريحة و بامكانك التحكم في ارتفاع كرسي السائق، كمان اشتريت مسند الظهر من كافور و مريحني في السواقة (ب 17 جنيه)
التكييف جيد جدا ليلا (على واحد) و جيد نهارا (ممكن واحد او اتنين أخري)
سحب العربية جيد جدا و بيتأثر بالتكييف ، طبعا انا لسه في التليين فآخري في rpm بيكون 2 و ماعدتش 100 كيلو/ساعة
الفرامل هايلة، طبعا ممنوع الفرملة المفاجئة او القرص على الفرامل في التليين بس انقذتني في موقف وحيد و انا شايف ان في المجمل ادائها هايل.
العربية عالية الى حد ما، بمعنى مش بتحك في المطبات خالص، سواء قانوني او مطبات اهالي
العفشة سلسة مش ناشفة ولا طرية و ده بشهادة كذا حد ركب جنبي.
درج التابلو صغير شوية و يتعوض بان المخدع الامامي به مكان للتخزين و كمان الابواب الربعة فيهم اماكن تخزين.
الإضاءة تحفة، النور الواطي ليه 5 مستويات يتم التحكم فيهم من بكرة في لوحة التحكم على يسار التارة بيخلوك كاشف الطريق كله ، النور العالي مفيش وصف ليه ده طبعا غير الشبورة ورا وقدام.
المفتاح الذكي ده اخترااااع، كنت في الاول مش حاسس بقيمته بس مع الاستخدام بقيت مبسوط بيه جدا، مش بحتاج اني اقعد ادور في جيوبي على المفتاح و خصوصا لو كنت شايل ابني الصغير او شايل حاجات كتير، بضغطة واحدة تفتح العربية و بضغطة تقفلها ( طبعا العربية مش بتقفل لو نسيته جوة )
بالنسبة لزرار engine start فده خلاني النهاردة اهرب من السايس امبارح بسرعة اسطورية :d
الزرار ليه 3 ضغطات: الاولى للكاسيت و التانية للكهرباء كلها و التالتة للتدوير مع دوسة الفرامل.
صوت الكاسيت حلو ( 4 سماعات و 2 تويتر ) مع امكانية التحكم في توزيع الصوت.
الشنطة واسعة جدا
الموكيت فاتح جدا و لازم يتعمله فرش في اقرب فرصة

خامسا: المشاكل

-باسمع صوت خبطة خفيفة في الناحية اليمين قدام لما بنزل في نقرة
-البكرة بتاعت ضبط ارتفاع الكرسي اتخلعت مع اني استخدمتها مرة واحدة بس، هي عاملة زي دراع رفع الزجاج يدويا في التركيب، مشرشرة و بتركب كبس.
- ال navigator بطل يشتغل و بعد كده اشتغل بعد ما عملت reset للجهاز و دلوقتي التليفزيون عامل نفس الحركة، تقريبا في مشكلة في الsoftware بتاع الجهاز و لسه هكلم الضمان.

سادسا: الترخيص (مرور فيصل)

ضريبة 3 سنوات : 850 جنيه
تأمين اجباري 3 سنوات : 320 جنيه
طفاية و شنطة اسعافات : 200 جنيه
ملف : 65 جنيه
اكراميات و باركينج و حافظة ورق و مسامير نمر (ايوة مسامير نمر علشان اشترتها من بره لانهم سلموني النمر من غير حتى مسامير! ) : بتاع 120 جنيه

خد بالك:

و انت بترخص لازم تبقى عارف ان الموديل ده l3 لسه جديد و محدش تقريبا عارفه فالموظفة طلعتلي الرخصة f3! و كان حوار، امين الشرطة بيقولي ما تمشي حالك و اعملها انت بالقلم! قلتله يعني يبقى معايا فيرنا و ارخصها اكسنت؟ راح مبلم، طبعا دخلت للموظفة و فهمتها و جبتلها الملف تاني و وريتها الفحص و جواب المرور و قعدت من تاني و استنيت دور جديد، و طلعت الرخصة فيها الموديل : L3 gs-1 ، هو انا مش عارف هو ايه gs-1 ده بس احسن ما تطلع عربية تانية خالص، الحمد لله... ربنا ينجينا كلنا من المنظومة الفاسدة دي.

الخلاصة:

السيارة رائعة بكل المقاييس شكلا و مضمونا و بتقدم حل حقيقي عملي للسوق المبالغ في اسعاره و الفقير في امكانياته و كمالياته فهي تتفوق على جميع اقرانها من نفس الفئة السعرية و حتى غيرها في الفئات الأعلى حتى 150,000 جنيه...بتدفع فلوس بتاخد قدامها اداء و كماليات و ماركة زي الغول هتاكل السوق السنين اللي جاية بدل ما تدفع فلوس و تاخد ماركة بس! و اعتقد اننا سنراها في الشوارع كثيرا في العام القادم دون حتى التسويق لها من قبل الشركة الوكيلة. ربنا يدينا خيرها و يكفينا شرها انا و اسرتي و الناس اللي ماشية في الشارع.

يا رب يكون التقرير كان وافي و شامل لجميع الجوانب المهمة و تحت امر الجميع في الاسئلة.

ملحوظة: تعمدت عدم وضع صور لان الاخوة في المنتدى هنا كانوا قايمين بالواجب و زيادة و مقدمين موضوعات عن العربية فيها صور و اعتقد ان الناس هنا عارفين شكل العربية كويس من جوة و من برة.

المشاركة الأصلية كتبت بواسطة moe khodairy

بالنسبة للسادة الزملاء اللي سألوا عن ايه اللي يميزها عن الايمجراند، و الكلام اللي جاي ده وجهة نظر شخصية قد لا تمثل اي قيمة ... انا كنت ناوي اجيب الايمجراند و نزلت اتفرجت عليها مرتين، و اتفقت مع الراجل اللي في المعرض على كل حاجة و كنت مقتنع بيها و سألت ناس كتير و كنت كل ما بلاقي حد راكبها في الشارع كنت بوقفه و اسأله عليها.
الايمجراند عربية شكلها فخم فعلا و شيك وانا بحبها بس لاقيت جدال كبير حواليها و ناس بتشتكي و ناس لأ و اللي بيشتكوا كل واحد فيهم بشكوى مختلفة عن التاني يعني المشكلة مش في باتش واحد مثلا، لا ده في مشكلة فعلا اكبر من كده، فحسيت انها زي البطيخة و اتقفلت منها و في ناس كانت بتقول انها بتحك في المطبات، و كمان انا لما ركبتها و ركبت ال l3 و شفت التقفيل حسيت ان في فرق و كمان حسيت ان في فرق في الدهان.
ده زائد الاوبشن الزيادة اللي في ال l3 زي ال ( navigator و كاميرا الباركينج و التليفزيون و مفتاح البصمة و الستارت انجين و فتحة السقف)
و زي ما قلت هي اذواق و لولا اختلافها لبارت السلع و ربنا يبارك لأي حد معاه الايمجراند

المشاركة الأصلية كتبت بواسطة moe khodairy

الله يبارك فيك و ربنا يخليك...
- ال navigator مش باشتراك ولا حاجة هو في كارت ميموري عليه الخرايط و بيحدد موقعك مع الاقمار الصناعية و بيقولك انت فين على الخريطة.
- التليفزيون بتشغله بزرار و بيتولف اتوماتيك زي الرسيفر و بيقرا القنوات الارضي اللي هي من الاولى للتالتة و قنوات النيل و النايل تي في، حوالي اتناشر قناة و بتقلب بينهم من الجهاز نفسه او من التارة.
- قعدة الكراسي مريحة و الفرش خامته حلوة و الدواسات مريحة و دواسة البنزين مرتاحة مش مزنوقة زي الايمجراند.
- فتحة السقف كهرباء طبعا بس مش اتوماتيك يعني مش ضغطة واحدة و بتفتح فتحة كاملة للخلف و و فتحة بزاوية عشرين لفوق من ورا.
- في حاجة كمان و هي وجود سينسور لحزام الراكب الامامي يعمل حين ركوب الشخص فقط.
- معدل استهلاء الوقود اللي هو شئ مهم جدا : 9.9 لتر لكل 100 كيلو يعني بتعدي 500 كيلو في التفويلة مرتاحة و ده اقل واجب و ذلك مع استخدام التكييف.